¹ Yesu aruga mbali yabaire ali, agaruka owabo. Abegesibwabe bamuhondera. ² Ahali Sabato ayegesa omu sinagogi. Bangi abamuhuliire bashoberwa, bebaza bati, “Omuntu ogu ebi byona akabiyaha? Akahabwa bumanyiki obu? Eby'alikukora by'amani bite? ³ Isi ti museremara ogu? Aba mutabani wa Maria, ni murumuna Yakobo, na Yose, na Yuda, na Simoni, na banyanya tutura nabo munu.” Bamwanga. ⁴ Yesu abagambira ati, “Omurangi takaburwaga kitinwa, shana owabo n'omu banyarugandabe n'omwabo mwonene.” ⁵ Tiyakozireyo ky'amani, shana akatekao abarwaire bake emikono mara yabakiza. ⁶ Okutesiga kwabo kukamushobeza. Yesu agya omu byaro ebindi ayegesa ⁷ Ayeta ikumi na babili, abatuma babili babili, abaha n'obushobora bw'okubinga Amashetani. ⁸ Abagambira kutatwara kantu kona kona omu rugendo shana enkoni. Omukate n'enshaho n'amahera omu mifuko ebyo chei. ⁹ Abajubura kujwara enkeito, chonka okujwara ekanzu ibili ayanga. ¹⁰ Abagambira ati, “Mbali muragya enju egyo mulitahamu mwikare omwo kulemwa kugoba orwo mulirugayo. ¹¹ Hona hona mbali balibanga, bakanga n'okubahulira, kamulija kurugayo mulagaze echuuchu aha maguru ganyu, balimanyir'aho.” ¹² Kityo bagenda barangira abantu babone kwechuza amafu gabo. ¹³ Babinga Amashetani gangi, basiiga abarwaire bangi amajuta babakiza. ¹⁴ Omukama Herode abihulira, aha rw'okuba eibara lya Yesu likaba nilirangwa. Abantu abandi bakaba nibagamba bati, “Yohana Omubatiza ahimbukire omu bafu, niyo nshonga aina obushobora buti.” ¹⁵ Chonka abandi bati, “Ni Eliya.” Abandi bati, “Murangi nk'abarangi aba kare.” ¹⁶ Herode orwo yabihuliire ati, “Yohana owo natemireho omutwe ahimbukire.” ¹⁷ Herode akaba atumire ab'okukwata Yohana, bamuboha bamufunga nibamutura Herodia, muka Filipo murumuna Herode, aha rw'enshonga Herode akaba amushweire. ¹⁸ Yohana akaba agambiire Herode ati, “Nikizira ahali iwe kushwera muramu wawe.” ¹⁹ Nikwo Herodia kumukwatirwa ekiniga, akenda kumwita, chonka tiyashoboire, ²⁰ kuba Herode yatinaga Yohana aha rw'okumumanya okwo ali mugorogoki mara mutakatifu, kityo yaba namulinda. Kayamazire kumuhulira yaikara nawawana muno omwoyo, kandi okwo yamuhuliilizaga n'amashemelerwa. ²¹ Bwija bushangwa buli bushango Herode nashemeza ekirokye ky'okuzarwa, akoleire abaramatabe n'abanyiginyabe n'abatwazi ba Galilaya obugenyi. ²² Muhara wa Herodia aija amuzinira amushemeleza amo n'abagenyibe. Omukama agambira omwisiki ati, “Ongambire kyona kyona eky'olikwenda, ndakikua.” ²³ Amwelahilira ati, “Eky'oranyenza kyona kyona ninkikuha, nangu n'enusu yobukama bwange.” ²⁴ Omwisiki aturuka abaza nyina ati, “Nshabeki?” Nyina ati, “Omutwe gwa Yohana Omubatiza.” ²⁵ Achwanisa agaruka owa Herode bwangu bwangu, amushaba ati, “Ninshaba mbwenu aha ompe omutwe gwa Yohana Omubatiza aha sahani.” ²⁶ Omukama ajunara ebishobeize. chonka aha rw'ebyo yabaire alahiire n'enshoni z'abagenyibe, takunda kuchwa kigambo ekyo yabaire agambiire omwisiki ogwo. ²⁷ Arahuka atuma omulinzi, kuleta omutwe gwa Yohana. Omulinzi agenda jela atema Yohana omutwe, ²⁸ aguleta aha sahani aguheleza omwisiki. Omwisiki agutwalira nyina. ²⁹ Abegesibwa ba Yohana babihulira, baija batwara omubiligwe baguziika omu nyanga. ³⁰ Entumwa zigaruka owa Yesu zimugambila ebyo zakozire byona n'ebyo zayegesize. ³¹ Azigambira ati, “Mwije nywenka mbali abantu batali, mwikyeho kake.” Nobona abaijaga aba nibagenda bakaba bali bangi, n'akanya k'okulya tibakukaboine. ³² Bagenda bonka omu bwato bagya mbali omwaga gutali. ³³ Abantu bangi bababona nibagenda mara babekomya, baruga omu bigo byona bairukire, batwarwa ogw'amaguru babagoberayo mbere. ³⁴ Yesu aruga omu bwato agya aha mwaro abona embaga y'amani, abaganyizibwa arwe enshonga bakaba bali nk'entaama ezitaina mulisa. Abanza kubegesa bingi. ³⁵ Eizoba kalyatobeile abegesibwabe bamugoba bamugambira bati, “Aha mbali tuli karungu, mara n'eizoba lyatobera. ³⁶ Obataishure bagye omu byaro ebili hei bagure akakulya.” ³⁷ Wenene abahorora ati, “Inywe mube n'inywe mubaha ak'okulya.” Bamubaza bati, “Ichwe tugende tugure omukate gw'edinari 200, tube nigwo tubaha kulya?” ³⁸ Ababaza ati, “Mwina emikate engahai?” Bagya kuleba bamugambira bati, “Etano n'enfuru ibili.” ³⁹ Agambila embaga yona kushuntama aha bunyasi bubisi omu bichweka. ⁴⁰ Bashuntama omu bichweka, 100 omuli 100, 50 omuli 50. ⁴¹ Yesu akwata emikate egyo etano n'enfuru ibili, araramira eiguru, asiima, abegabegura emikate egyo, agiha abegesibwa kabagabira abantu. N'enfuru ibili azibagabira zona. ⁴² Bona balya baiguta. ⁴³ Bashombora entukuru 12 z'obubeguka by'emikate n'enfuru. ⁴⁴ Abaliire omukate ogwo bakaba bali bantu 5,000. ⁴⁵ Yesu ayangua agambira abegesibwabe kuanama omu bwato bakamwebembera buseli, Bethsaida, oku wenene naraga embaga kutaa. ⁴⁶ Kayabaire yarugangaineo nabo atemba omw'ibanga kushaba. ⁴⁷ Eizoba kutobera obwato bushangwa buli omu nyanja, kandi wenene ali wenka aha mwaro. ⁴⁸ Abona okwo balikubuga nibyanga. Omuyaga gukaba nigwija gubataahiremu n'amani. kwema esaa mwenda kwija kukeisa obwire nirwo Yesu yabagobeireo, natambuka aha maizi omu nyanja. Akaba agendeleire kubalabao, ⁴⁹ chonka kabamuboine natambuka aha maizi batina bamanya bati nomuzimu, bakunga; ⁵⁰ orwokuba bona bakamubona batina. Ayanguha abagambira ati, “Mugume, n'inye; mutatina.” ⁵¹ Ataha omu bwato n'omuyaga gurekela. Bashoberwa muno munonga, ⁵² orwokuba ekyakozirwe aha mikate bakaba batakishobokeirwe aha rw'emitima yabo kugumangana. ⁵³ Orwo bamazire kushaabuka bagoba Genesareti, basiga bagoromora obwato. ⁵⁴ Kabamazire kuruga omu bwato, abantu banguha bamanya Yesu. ⁵⁵ Bagenda nibairuka omu byaro ebili heihei, babanza kuleta abarwaire aha mabega, nibabamushangisa hona hona mbali babeire mbamuuliza ali. ⁵⁶ Orwo yabeire eija omu byaro n'omu bigo, baleta abarwaire nibababyamika omu katare, bamutagiliza buzima kukwata ahakijwarokye kisha. Bona abakwatao bakira