¹ Yesu n'abegesibwabe bagoba buseli bunu bw'enyanja, omu nsi y'Abanyagerasi. ² Kayamazire kuruga omu bwato, omushaija aruga omu nziiko akwetwe eiSitani aija amutahiremu. ³ Wenene ogwo yaturaga omu nyanga, bakaba batakimuboha, nangu n'omunyororo gwonka kugumutaho. ⁴ Bamukomaga n'empingo n'eminyororo kyonkai eminyororo agigutura, n'empingo azihendahenda ebigutuka. Taliho muntu yakushoboire kumwelenga. ⁵ Omukiro na mushana yaikaraga nakunga omu nyanga n'omu mabanga, nayekaratuza amabare. ⁶ Kayamazire kubonera Yesu harai, agenda airukire amufukamira. ⁷ Akunga n'eiraka lihango, ati, “Nonyenzaki iwe Yesu Mwana wa Rukirabyona? Nakutaho Ktondaa otanshasa.” ⁸ Okugamba atyo Yesu akaba amugambiire ati, “Iwe Sitani omuntu ogu omurugemu!” ⁹ Yesu abaza Sitani ati, “Eibara wab'oi?” Ahorora ati, “Eibara lyange ndi Legion; aha rw'okuba tuli bangi.” ¹⁰ Amutagiliza muno Amasitani ago atagabinga mu nsi egyo. ¹¹ Aho hakaba haliho obuyo bungi bw'empunu nizilya omw'ibanga; ¹² gamutagiliza gati, “Otutaishure tugye omu mpunu.” ¹³ Aba nikwo agajubura, omushaija gamurugamu, gataha omu mpunu, zikaba nizelenga kugoba omu 2,000. Zihilingita aha bulengo, zigwa omu nyanja zitontobera. ¹⁴ Abashumba bairuka, ebyo babona eba baruro omu kigo n'omu byaro. Abantu baija kwelebera ekyabaho. ¹⁵ Bakwata omuhanda baija ahali Yesu, babona ayabaire akwetwe Amasitani ali aho ashuntamire, ajwete mara aina amagezige gona, omuntu ayabaire aina Amasitani, batina. ¹⁶ Ababaire baboine eky'omurwaire w'Amasitani n'ebyaba aha mpunu babarura. ¹⁷ Abantu babanza kutagiliza Yesu k'abarugira omu nsi yabo. 18 Kayabaire nataha omu bwato omushaija ayabaire akwetwe Amasitani amushaba kugenda nawe. ¹⁸ Kayabaire nataha omu bwato omushaija ayabaire akwetwe Amasitani amushaba kugenda nawe. ¹⁹ Yesu ayanga, amugambira ati, “Oshube owanyu obone batahi bawe, obagambire byona eby'Omukama yakukolera, n'okwo yakuganyira.” ²⁰ Omushaija akwata omuhanda agaruka omu nsi y'ebigo 10 ebyayetwaga Dekapoli, agamba ebyo Yesu yamukolera; abantu bona batangara. ²¹ Orwo Yesu yagarukire buseli akashabuka n'obwato, embaga emuhurulira nyingi, aho wenene ali haihi n'enyanja. ²² Eija omukuru omo w'esinagogi eibaralye Yairo. Kayamazire kubona Yesu amugwa omu maguru, ²³ amutagiliza ati, “Kahara kange kali haihi kufa. Singa oije okateho omukono kakire, karore.” ²⁴ Yesu agenda na Yairo. Abantu bangi bamuhondera, nibamufunza oku n'oku omu muhanda. ²⁵ Hakaba haliyo omukazi arwaire ekiganga emyaka 12, ²⁶ yagiire aha batambi batali bake, empiha zamuwireho aha mukono, aburwa kwikya, anenwa kushagaho. ²⁷ Akaba yahuliize Yesu, aho aruga enyuma amuhondeire akwata aha kijwarokye. ²⁸ Akaba nagira ati, “N'orwo ndakwata aha bijwarobye kusha ndakira.” ²⁹ Aho n'aho ekiganga kilekera, ayehulira n'omu rugingo okwo yakira oburwaire. ³⁰ Yesu kuhulira okwo amani gamurugamu, akebuka bwangu amaisho aganaga omu mbaga, abaza ati, “Ayakwata aha bijwaro byange n'ohai?” ³¹ Abegesibwabe bamugambira bati, “Nobona okwo embaga ekutangatangire embaju zona, noshuba nobaza oti, ‘Ayankwataho n'ohai?’ ³² Wenene aleba oku n'oku nahiga ayamukwataho. ³³ Nawe omukazi akashangwa namanya ebyamubaho, aija natina, nachundwa, amugwa omu maisho amugambira amazima gona. ³⁴ Yesu amugambira ati, “Mwana wange, okwesiga kwawe kwakukiza; ogende n'emilembe mara okire oburwaire.” ³⁵ Kayabaire akyagamba haliho abarugire omw'omukuru w'esinagogi, bagamba bati, “Muhara wawe yafire. Omwegesa otamwita kubi; lekera.” ³⁶ Ebyo bagamba Yesu tabitaho mutima, agambira omukuru w'esinagogi ati, “Otatina, iwe ekikuru oyesige.” ³⁷ Atanga ab'okumuhondera, shana Petero na Yakobo n'omurumuna Yohana. ³⁸ Orwo bagobire omw'omukuru w'esinagogi, ashanga abantu nibachura mno. ³⁹ Kayamazire kutaha omu nju ababaza ati, “Kiki nka muliyo nimuchura eyobobo? Omwana tafire anagiire.” ⁴⁰ Bamushekelera. Abaturukya aheru. Akwata Yairo na mukaziwe n'abo yabaire ainabo, ataha omu kiyumba eky'omwana yabaire halimu. ⁴¹ Akwata omwana omukono, amugambira ati, “Talita kumi;” nikwo kugir'oti, “Kaisiki ninkugambira imuka.” ⁴² Niho honka omwisiki aimuka atambuka (akaba aina emyaka ikumi n'eibili), bagwa omu kitangaro. ⁴³ Abatanga muno ekigambo eki kukigambira abantu, ashuba abagambira kumuha ak'okulya.