¹ Orwo obwire bwakeire buti, abakuhani bakuru, n'abagurusi, n'abegesa b'Amateka, n'orukiiko rwona bakiika. Baboha Yesu bamutwalira Pilato bamumunaga omu mikono. ² Pilato abaza Yesu ati, “Iwe oba mukama w'Abayahudi?” Yesu amuhorora ati, “Okwo wakigamba nikwo kili.” ³ Abakuhani bakuru bamutoijera bingi. ⁴ Pilato ashuba amubaza ati, “Toina kyakuhorora? Olebe okwo ebyo balikukutoijera bili bingi!” ⁵ Chonka Yesu tiyayeyongeire kuhorora, ekyo kitangaza Pilato. ⁶ Buli kiro kikuru kya Pasika, Pilato yabataishuliraga omufungwa omo owo bamushabaga. ⁷ Omu bamatu ababaire bali omu kifungo, nibo balinya abaisire abantu omu bushengi, hakaba halimu omo nayetwa Baraba. ⁸ Embaga eija ebanza kushaba Pilato kubagilira nk'okwo yabagiliraga. ⁹ Pilato abahorora ati, “Nimwenda mbataishulire Omukama w'Abayahudi?” ¹⁰ Ahakuba akaba namanya okwo abakuhani bakuru bamulesire orwenshonga yo rwango . ¹¹ Kyonkai abakuhani bakuru batamu abantu oruchuku kumugambira k'abataishulira Baraba, Yesu chei. ¹² Pilato ashuba ababaza ati, “Isi aho omushaija owo mulikweta Mukama w'Abayahudi mugire nta?” ¹³ Bashuba bakunga bati, “Omubambe.” ¹⁴ Pilato ababaza ati, “Aha kiki? Kabiki ak'akozire?” Chonka bonene bakunga bashagaho bati, “Omubambe.” ¹⁵ Kityo Pilato agonza kushemeleza embaga, abataishulira Baraba; Chonka kayaizire kutaishura Yesu kumubamba, abanza amutera. ¹⁶ Abaisherukare batahya Yesu omu kikaare (nigwo mwanya ogulikwetwa Puraitorio); beta omutwe gwona gw'abaisherukare. ¹⁷ Bamujweka ebebo ya zambarau, basiba n'omukako gw'amahwa bagumutaho. ¹⁸ Babanza kumugegeza nokugamba, “Kamelere Mukama w'Abayahudi!” ¹⁹ Bamuteza orubingo omu mutwe, bamuchwera ebichwanta, babandama bamuramya. ²⁰ Kabamazire kumujaamya bamujura ebebo ya zambarau, bamugaruraho emyendo eye. Bashuba bamufunya kugya kumubamba. ²¹ Kababaire nibagenda omu muhanda bagimba omuhinguzi, Simoni owa Kirene, akaba naruga omu kyaro, bamutwaza omusaraba. N'iwe ishe Alekisanda na Rufusi. ²² Baleta Yesu ahalikwetwa Goligota (nikwo kugir'oti omwanya gw'ekitwe ky'omuntu). ²³ Bamuha edivai einemu n'omubazi gwa mira, kyonkai tiyaginyoire. ²⁴ Bamubamba, babegana emyendoye, chonka bagitekera enshoga kumanya ogw'omuntu aratwara. ²⁵ Zikaba zili saa ishatu za bwankya orwo bamubambire. ²⁶ N'omushango ogwo bamutaireho bagumuhandikaho bati, “Omukama w'Abayahudi.” ²⁷ Bamubamba n'abafakare babili, ogu bamuteka obulyo n'ondijo obumosho. ²⁸ (Aho n'ebihandiko bitakatifu bigobelera ebilikugamba biti, “Bakamukwatirana n'abafakare). ²⁹ N'ababaire nibarabao bamujuma nibachunda emitwe bakwese, “Mpahosi! Iwe ayagambiire kukambura Rwensinga okagyombekera ebiro bishatu, ³⁰ oyerokore oruge aha musaraba!” ³¹ N'abakuhani bakuru kutyo hamo n'abegesa b'Amateka bamujamya omu fumoro bati, “Akarokora banu, wenene taina kwerokora. ³² Kirisito Omukama wa Isiraeli, naruge aha musaraba twije tumwikilize.” N'ababambirwe nawe kwakwo bamujuma. ³³ Kazabaire esaa mukaga ensi yona ebambwa omwilima kugoba esaa mwenda. ³⁴ Aha saa mwenda Yesu ataka n'eiraka lihango ati, “Eloi Eloi, lama sabakitani?” Nikwo kugir'oti, “Ktonda wange, Katonda wange, wanagiraki?” ³⁵ Ababaire bali aho kabakihuliire bagamba bati, “Leba, nayeta Eliya.” ³⁶ Omuntu omo airuka, akwata ekikunjuzo akitubika omu siki y'edivai, akitunga aha rubingo omuhaire kunywa, nagamba ati, “Katulinde tulebe nka Eliya araija akamuhanantura.” ³⁷ Yesu ataaga muno, aho ahwamu omwoyo. ³⁸ Orutimbe rwa Rwensinga rutagukamu kabili, kwema eiguru kwija ahansi. ³⁹ Aho omukuru w'abaisherukare ayabaire ayemeleire amulebire, yaboine okwo yataka akashuba akahwamu omwoyo, agamba ati, “Mazimakwo omuntu ogu yaba ali Mwana wa Katonda!” ⁴⁰ Hakaba haliho n'abakazi balebeire hare, omuli abo akaba halimu Maria Magadalena, na Maria nyina Yakobo omuto na Yose, na Salome, ⁴¹ abamuhonderaga kwema Galilaya nibamujuna; n'abakazi abandi bangi ababaire baizire nawe kwema Yerusalemu. ⁴² Omu bwaigoro kikaba kili kiro ky'okwetekateka, nikyo kiro kilikwebembera Sabato, ⁴³ Yozefu owa Arimatea, omutegeki w'ekitinwa omu rukiiko, kandi yategelezaga obukama bwa Katonda, ayeyemamu agya owa Pilato, amushaba omubili gwa Yesu. ⁴⁴ Pilato atangara nayebaza nka yafire. Ayeta omukuru w'abaisherukare, amubaza nka yafire. ⁴⁵ Mukuru w'abaisherukare kayamugambiire okwo yafire, amu Yozefu omubiligwe. ⁴⁶ Yozefu ogwo owa Arimatea agura ekirago kya kitaani, amuhanantura, amuzinga omu kirago kya kitaani ekyo, amuteka omu nyanga eyo wenene yashangirwe ayetemeire omu rwazi. Ahilingisa eibare lihango alikingisa enyanga. ⁴⁷ Maria Magadalena, na Maria nyina Yose, babona mbali Yesu yaziikwa.