¹ Bikashangwa bisigaireyo ebiro bibili kugoba Pasika n'ekiro kikuru ky'emikate etatumbisibwe. Abakuhani bakuru n'abegesa b'Amateka bahiga kukwata Yesu atabamanyire, bakamwita. ² Bagambaga bati, “Tutamukwatira mu kiro kikuru, embaga etaija ekatamwa ekarwana.” ³ Yesu kayabaire ali Betania omwa Simoni omubembe nalya, omukazi aija n'echupa y'eibare einamu amajuta g'eiguzi lihango muno, ahenda echupa egyo engoto, amusheshera amajuta omu mutwe. ⁴ haliho abatamirwe bakatekeleza bati, “Amajuta aga gafaki? ⁵ Gakugulizwe garugwamu edinari ezilikushaaga 300, zigabirwa aboro.” ⁶ Chonka Yesu agamba ati, “Mumuleke; kiki kumwita kubi? Ekyo yankolera kirungi. ⁷ Manya ebiro byona abanaku mwinabo; nimushobora kubajuna mbali mwayendera. Chonka inye timulikwija kumbona biro byona. ⁸ Yakora ekyo yashobora. Omubili gwange yagusiiga amajuta likyali kare nagutekatekera kuziikwa. ⁹ Mara mbagambiire amazima, eky'omukazi ogu yakora balimwijuka.” ¹⁰ Aho Yuda Isikariote, omo omu 12, agya omu bakuhani bakuru kumubanja. ¹¹ Kabahuliire batyo bashemelerwa, baragana kumuha empiha. Kwema aho Yuda ata nahiga obushango bw'okumubanja. ¹² Aha kiro kya mbere ky'Omukate Gutatumbisiibwe, ekyo batambiragaho akataama ka Pasika, abegesibwabe bamugambira bati, “Wakugondize tugyehai kukutekatekera mbali oralira Pasika?” ¹³ Omu begesibwabe atumamu babili, abagambira ati, “Mugye omu kigo, muratanganwamu omushaija ayetwekire emuga y'amaizi. Mumuhondere, ¹⁴ mbali arataha, mugambire nyin'enju muti, ‘Omwegesa nabaza eikumbi mbali araliira Pasika hamo n'abegesibwabe.’ ¹⁵ Araboleka ekichumba omu gorofa, kitekatekire kihoire; omwo mube nimwo mutushemeleza.” ¹⁶ Abegesibwa baturuka bataha omu kigo, babibona okwo yabagambira, batekateka Pasika. ¹⁷ Eizoba kalyatobeire Yesu aija n'eikumi na babili. ¹⁸ Kababaire bali aha meza nibalya, Yesu agamba ati, “Mbagambiire amazima, omuli inywe halimu arambanja, mara nitulya hamo.” ¹⁹ Babanza kujunara buli omo namubaza ati, “Isi n'inye?” ²⁰ Yesu abagambira ati, “N'omo omu 12, nitukoza hamo omukate aha sahani. ²¹ Omwana w'Omuntu nibija kumubaho nk'okwo bywamuhandikirweho, kyonka alibona ogwo alikwija kubanja Omwana w'Omuntu! Hakili k'omuntu ogwo atakuzairwe.” ²² Kababaire nibalya, akwata omukate, asima, agubegura, agubaha nagamba ati, “Tora, ogu mubili gwange.” ²³ Akwata n'ekikompe, kayamazire kusiima akibaha, bona bakinywaho. ²⁴ Abagambira ati, “Obu bwamba bwange obw'endagano empya, obwo barashesha kuchungura bangi. ²⁵ Mbagambiire amazima, tinkishuba kunywa divai kakiro kilinya orwo ndinywa empya omu bukama bwa Tata.” ²⁶ Kabamazire kuhoya oruhoya, baturuka bagenda aha Ibanga ly'Emizeituni. ²⁷ Yesu agambira abegesibwabe ati, “Nimwija kwiruka nywena mukanagaho. Enshonga kikahandikwa kiti, ‘Ndiita omushumba, entaama zenaganage.’ ²⁸ Kyonkai kandamara kuhimbuka ndabebembera Galilaya.” ²⁹ Petro amugambira ati, “N'orwo bona barairuka bakakunagaho, inye chei!” ³⁰ Yesu amugambira ati, “Nkugambire amazima, omu kiro kyambwenu enkoko etakakokoromire kabili, oraba wanyetongire kashatu.” ³¹ Kyonkai Petero agamba n'amani ati, “Tindikwija kukwetonga, n'orwo ndaragirwa kufa naiwe.” N'abasigaire bona bagamba nka Petro. ³² Bakwata omuhanda bagya mbali hayetwaga Getsamene. Yesu agambira abegesibwabe ati, “Mushuntame aha mbe ninshoma enshara.” ³³ Aihyaho Petro na Yakobo na Yohana agenda nabo, aho abanza kugira obushasi bungi n'okushoberwa muno. ³⁴ Agambira abashatu aba ati, “Omwoyo gwange gwina obujune bungi muno kuralira kufa. Musigare aha mara mutanagira.” ³⁵ Ailirayo akandi kake, ajumara ahansi, ashaba ati, “Tata, kakiraba nikishoboka esaa egi empingure.” ³⁶ Ashuba agamba ati, “Aba. Tata, ebintu byona ahali iwe nibishoboka. Banyihyeho ekikompe eki. Chonka tikwo inye ndikwenda, iwe okwo olikwenda obe nikwo okora.” ³⁷ Aija ashanga okwo banagiire, abaza Petero ati, “Simoni, wanagira? Tiwashobora kurora isaa jimo ryonka? ³⁸ Mutakunagira, mushome enshara mutaija mukagwa omu bilengeso. Mazima omwoyo nigwenda, kyonka obunyama bujege.” ³⁹ Ashubayo ashoma enshara, ashubamu ebigambo byonene. ⁴⁰ Agaruka ashanga okwo banagiire, nobona oturo tukabakiza amani. Eky'okumuhorora tibakiiboine. ⁴¹ Aija omurundi gwa kashatu abagambira ati, “Mukyanagiire kuhumura? Otwo mwanagira nitumara; esaa yagoba, Omwana w'Omuntu yabanzirwe, yanagirwe omu mikono y'abafakare. ⁴² Mwimuke tube nitugenda, leba embanzi yagoba.” ⁴³ Orwo Yesu yabaire akyagamba ebyo, lileta Yuda, omo homu 12, aija n'embaga eina embanda n'erungu ebyo babaire bahairwe abakuhani bakuru na'abegesa b'Amateka n'abagurusi. ⁴⁴ Embanzi ekaba ebahaire akabonero negamba eti, “Owo ndanywegera n'iwe; mumukwate mara mumutware nimumanya.” ⁴⁵ Yuda kayaizire talinda, amugoba, agamba ati, “Mwegesa!” Amunywegera. ⁴⁶ Bamutaho engaro bamukwata. ⁴⁷ Chonka omuli balinya abashangirwe bemeleire haihi, omo ahurutura embanda omu kiraro, atema omwiru w'Omukuhani Nyamukuru okutwi. ⁴⁸ Yesu ababaza ati, “Mwaija n'embanda n'erungu kunkwata okwobon'oti muzinzire omushuga? ⁴⁹ Ebiro byona tuba tuli hamo Rwensinga n'inyegesa, timukankwataga. Chonka k'ebihandiko bitakatifu bigobelere.” ⁵⁰ Aho abegesibwa bona bamusigaho bairuka. ^{51 52} 51 Hakaba haliho omusigazi ahondeire Yesu atajwete, shana aha mubili ayenagireho akendo ka kitaani; bamukwata. 52 Kyonkai wenene abasigira akendo ka kitaani airuka ali bushai. ⁵³ Yesu bamutwalira Omukuhani Nyamukuru; aho abakuhani bakuru bona n'abagurusi n'abegesa b'Amateka literaine. ⁵⁴ Petero agenda namuhondera ayemire hara, alemwa agoba nyakabuga omw'Omukuhani Nyamukuru. Ashuntama n'abalinzi, ayota omuliro. ⁵⁵ Aho abakuhani bakuru n'orukiiko rwona bahanyanyia omushango gw'okutaho Yesu kumwita, Chonka byanga. ⁵⁶ Bangi bamubielere chonka ebyo bamubielire byanga kushanangana. ⁵⁷ Abandi bemelera bagamba ne bishu bati, ⁵⁸ “Tukamuhulira nagamba okwo arakambura Rwensinga eyayombekirwe abantu, ayombeke endijo omu biro bishatu, mara atagyombekesize bantu.” ⁵⁹ Nabyo ebyo tibyafire kushushangana. ⁶⁰ Omukuhani Nyamukuru ayemelera omu rukiiko omugati, abaza Yesu ati, “Iwe toina kyakuhorora? Aba nibakutoijeleraki?” ⁶¹ Chonka Yesu ayesiza, tiyahoroire. Omukuhani Nyamukuru ashuba amubaza ati, “N'iwe Kirisito Omwana wa Nyakusinga?” ⁶² Yesu agamba ati, “Ndiwe, mara nimwija kubona Omwana w'Omuntu asingiire aha bulyo bw'Omushobora, naletwa omu bichwi.” ⁶³ Omukuhani Nyamukuru atagura ebijwarobye, agamba ati, “Obujulizi tukyahiiga obwaki? ⁶⁴ Mwahulira okwo yarogota. Nimuramuraki?” Bona bamuramura okwo alikuragirwa. ⁶⁵ Nikwo abandi kubanza kumuchwera ebichwanta, kumubunda amaisho, kumutera, nibagamba bati, “Toma!” Abalinzi nabo bamutamu empi. ⁶⁶ Petro akaba ali omukibuga amagyaifo, aijwa omuzana omo w'Omukuhani Nyamukuru. ⁶⁷ Kayaboine Petro nayota omuliro, amuhanga amaisho, agamba ati, “Naiwe waba oina Yesu Omunazareti.” ⁶⁸ Petero ayetonga ekigambo ekyo ati, “Tindikumanya by'olikugamba anga kubishobokerwa!” Aho aturuka agya omukibuga n'enkoko ekokoroma. ⁶⁹ Omuzana ayamubweine, ashuba abanza kugambira ababaire bali aho ati, “Omushaija ogu nawe mumo wabo.” ⁷⁰ Petero ashuba ayetonga ekigambo ekyo. Akaanya kakahingwireho kake n'ababaire bali aho bagambira Petero bati, “Ky'amazima iwe oli mumo wabo; aha rw'okuba oli Munyagalilaya.” ⁷¹ Chonka Petero abanza kurapa n'okurahira ati, “Omuntu ogu owo mulikugamba inye tindikumumanya.” ⁷² Niho honka enkoko ekokoroma elya kabili. Nirwo Petero yaijukire okwo Yesu yabaire amugambiire ati, “Enkoko etakakokoromire kabili oraba wanyetongire kashatu.” Aho atekeleza ekigambo ekyo, alira.