¹ Ka Yesu yabaire naruga Rwensinga, omwegesibwawe omo amugambira ati, “Mwegesa, olebe amabare oburungi n'amaju okwo gali katangaza!” ² Yesu amubaza ati, “Amaju gahango aga nogabona? Hanu aha taliho ibare elilisigara ahali lindi litagwire hansi.” ³ Yesu ashuntama aha Ibanga ly'Emizeituni alebire Rwensinga. Aho Petero na Yakobo na Yohana baija bonka bamubaza bati, ⁴ “Otugambire okwo ebi bilikwija kubaho, n'akabonero kabyo orwo ebyo biligobelera.” ⁵ Yesu abanza kubagambira ati, “Mulimanya omuntu atalija akabahabisa. ⁶ Bangi balija omw'ibara lyange nibagamba bati, ‘Ndi Kirisito!’ Mara balihabisa bangi. ⁷ Kamulihuliza endashana n'engungungu y'endashana, mutalihwahwana mitima. Ebyo biragiirwe kubaho, chonka amaheleruka tigakabaire. ⁸ Aha rw'okuba eihanga lilitabalira elindi, n'engoma elitabalira ngoma ndijo; halibaho emisisi oku na kulinya, eifa aha na halinya; nawe egi eliba eli ntandikiro y'enaku kusha. ⁹ “Inywe ekikuru mwelinde. Balibakwata babatware omu maramuliro. Mulitelerwa omu sinagogi, mulyemelezibwa omu maisho g'abagavana n'abakama nimuturwa inye, kujulira evangeli amazima omu maisho gabo. ¹⁰ Evangeli elibanza erangwe omu mahanga gona. ¹¹ 11 Kabalibakwata bakabatwara omu maramuliro, mutalifa kubi kuhiiga kyomuligamba. Ekyo mulihabwa omu saa egyo mube nikyo mugamba, kuba t'inywe muliba nimugamba. Mwoyo Mutakatifu n'iwe aliba nagambira aha mitwe yanyu. ¹² Omuntu alisa omurumuna, ishe mwana alisa omwana, n'abaana balishenga abazaire babo babaise. ¹³ Mulinobwa abantu bona nibabatura inye. Chonka omuntu alyegumisiliza kugoba aha ndekelero ogwo alirokoka. ¹⁴ “Chonka kamulibona eihano nyamwita balitaire mbali litasaine kugya (omushomi ashobokerwe), aho aba Buyahudi basingirwe omu mabanga. ¹⁵ Alishangwa ali aha rushwi rw'enju atalisongoka, anga kutaha mwa wenene kwihyamu kantu. ¹⁶ Alishangwa ali omu ndimiro ataligaruka kutwara mwendogwe. ¹⁷ Abakazi baliba baina enda n'abaliba nibonkya omu makiro ago rulibabeera rushengo! ¹⁸ Mushabe bitalibaho mu kirumo kya mbeho. ¹⁹ Nobona omu makiro ago halibaho ebiyengo ebitakabagaho kwema Katonda atonzire ensi kugoba mwaha, mara tibilizoka rundi. ²⁰ K'Omukama atakugufaize biro bya naku ezo, taliho muntu yakurokokire. Ebiro ebyo akabigufaza aha rw'endonkwaze ezo yaronkire. ²¹ K'omuntu alibagambira ati, ‘Leba Kirisito ali aha,’ anga ati, ‘Leba ali kulinya!’ Mutalibikiliza. ²² Abalyehindura Kirisito n'abarangi b'ebishuba balija bakore obubonero n'ebitangazo, nangu kakyakushoboka bahabise n'endonkwa. ²³ Chonka mumanye; nabagambira byona likyali karai. ²⁴ Omu makiro galiinya, ebiyengo byahingwire, eizoba lilibundwa omwilima, n'okwezi tikulyaka, ²⁵ n'enyanyinyi zilikuntuka kuruga aha iguru, n'eby'okutangaza eby'omw'iguru bilitengeta. ²⁶ Aho abantu balibona Omwana w'Omuntu naletwa omu bichwi aina obushobora bungi n'ekitinwa. ²⁷ Alituma abamalaika kuhikanisa endonkwaze kuruga omu nsi zona, kwema ndekelero egi y'ensi kuturuka aha ndijo. ²⁸ “Mwegere aha muti gw'omutini: Orwo amatagi gagwo gamara kworoba gakatutura obubabi, mumanya okwo ekyanda kyailira haihi. ²⁹ Nikwo orwo mulibona ebi byabaho, mumanye okwo Kirisito ali haihi, akwatiliire kwija. ³⁰ Nimbagambira amazima, omuzarwa ogu tigulihwaho ebi byona bitakabaireho. ³¹ Eiguru n'ensi bilichweka, chonka ebigambo byange tibilichweka. ³² “Chonka ekiro ekyo anga esaa egyo taliho muntu alikubimanya, nangu n'abamalaika chei, n'Omwana w'Omuntu chei, shana Tata wenkai. ³³ Mwelinde, mutakunagira mara mushome enshara. Mbali akanya kaligobera timulikumanya. ³⁴ Esaa egyo neshanangana omuntu aija kugya omu rugendo, k'aruga omu nju asiga ahaire abairube emilimo, buli omo ogwe, mara aragira omukumilizi kuzora amaisho. ³⁵ Aha rw'ekyo muzore amaisho orwo mutalikumanya mbali nyin'enju aliizira, nka liliba lili izoba lya bwaigoro anga mu kiro eitumbi, anga aha nkoko mbali ekokoromera, anga bwankya, ³⁶ atalija akabagwamu kibandagara akashanga munagiire. ³⁷ Kandi ebyo ndikugambira inywe nimbigambira abantu bona: Muzore amaisho.”