¹ Yesu abanza kubagambira omu nfumo, ati, “Omuntu akalima endimiro y'emizabibu, yagitao orugo, yagilimamu ekiina ky'okujungiramu ezabibu, yayombekamu omunara, yamara endimiro yagikwasa abakozi, yakwata omuhanda yagya ensi endijo. ² Kakyabaire kirumo ky'okunoga ezabibu, yatuma omwiru aha bakozibe kabamuha ebye ebyo bayelize omu ndimiro. ³ Bamukwata bamutera, bashuba bamutaishura agenda mikono zisha. ⁴ Ashuba abatumaho omwiru ondijo, bamuhutaza omutwe bamujangura. ⁵ Atuma ondijo, ogwo bamwita, n'abandi bangi batyo, abandi babatera, abandi babaita. ⁶ Akaba akyainayo ondijo, omwanawe omugonzibwa; obugenda bw'eirai nawe amutuma nagamba ati, ‘Barakunira omwana wange.’ ⁷ Chonka abakozi balinya bohyangana bati, ‘Ogu n'iwe musika; tumwite obusika bube bwaitu.’ ⁸ Bamukwata bamwita, bamunaga aheru y'endimiro y'emizabibu. ⁹ Mbwenu aho mukama w'endimiro alikoraki? Kilimwimukya aije aite abakozi abo. Endimiro y'emizabibu aligikwasa abandi. ¹⁰ Timukashomaga bihandiko mbali bilikugamba biti, ‘Eibare lyonene lyonene ely'abombeki bayangire, nilyo libaire ibare likuru ly'akekubo; ¹¹ eki kikakorwa Omukama wenene, mara nitukibona nitutangara?’ ” ¹² Aho bashobokerwa okwo enfumo agichweleire bonene; balenga kumukwata, chonka batina embaga. Bamurugaho bagenda. ¹³ Bamutwekera Abafarisayo n'ab'omuteko gwa Herode kumukwatira omu kugamba. ¹⁴ Baija bamubaza bati, “Mwegesa, nitukumanya okwo oba w'amazima, eby'abantu batekeleza iwe tobifaho. Ekitiinwa kyabo tokiliho, shana iwe ekikuru kwegesa emihango ya katonda. Mbwenu kisaine kuha Kaisari omushoro anga chei? ¹⁵ Emishoro tugigire anga tutagigira?” Yesu ashangwa nabamanyaho obugobya, abagambira ati, “Ahakubaki nimundenga? Mpa edinari ngilebe.” ¹⁶ Bamuleteraho emo. Ababaza ati, “Ekishushane n'ekihandiiko ebili aha dinari nebyoii?” Bamuhorora bati, “Nebya Kaisari.” ¹⁷ Yesu abagambira ati, “Ebya Kaisari mubihe Kaisari, n'ebya katonda mubihe katonda.” Bamushoberwa. ¹⁸ Abasadukayo banga okwo okuhimbuka tikubayo bamugoba; bamubaza bati, ¹⁹ “Mwegesa, Musa akatuhandikira okwo omuntu kufa akasiga omukazi atasigire mwana, omurumuna ashwere omukazi ogwo, azalire omurumuna kifa abaana. ²⁰ Hakaba aliho abarumuna mushanju. Owa mbere ashwera omukazi, k'afa atasiga mwana. ²¹ Owa kabili ashwera omukazi ogwo, nawe afa; n'owa kashatu kutyo; ²² bona omushanju tibasigire mwana. Obugenda omukazi nawe afa. ²³ Aha kuhimbuka omukazi aliba w'ohi? Aha rw'okuba bona mushanju akaba ali mukazi wabo.” ²⁴ Yesu abagambira ati, “Tikyonu mulikuhabira! Na bihandiko, na bushobora bwa Katonda taliho kyomulikumanya. ²⁵ Kuba orwo abantu balihimbuka omu bafu, tibalishwera anga kushwerwa. Balishana nkabamalaika ab'omw'iguru. ²⁶ Kandi abafu kuhimbuka, timukashomaga kitabo kya Musa, mbali alikugamba aha kishaka ky'omuliro, okwo katonda yamugambiire ati, ‘Inye mba katonda wa Aburahamu, katonda wa Isaka na katonda wa Yakobo?’ ²⁷ Taba katonda wa bafu, aba katonda w'abalikurora; aha rw'ekyo muhabire muno.” ²⁸ Aho honene hakaba haliho omwegesa w'Amateka omo, ahulira okwo bahakana. Kayaboine okwo Yesu yahorora kurungi Abasadukayo, amubaza ati, “Omuhango ogukuru kushaaga yona ni guhai?” ²⁹ Yesu amuhorora ati, “Ogwa mbere, ‘Hulira iwe Isiraeli: Omukama katonda waitu, Omukama aba omo. ³⁰ Kandi omgonze Omukama katonda wawe n'omutima gwawe gwona, n'omwoyo gwawe gwona, n'amagezi gawe gona, n'amani gawe gona.’ ³¹ Ogwa kabili nigw'ogu, ‘Ogonze mutahi wawe nk'okwo iwe olikwegonza.’ Omuhango ogw'okushaaga egi tiguliho.” ³² Omwegesa w'Amateka amugambira ati, “Mwegesa oli omu mazima; okw'olikugamba nikwo, kugir'oti Omukama katonda aba'omo, mara taliho katonda ondijo shana wenene. ³³ Kandi kugonza katonda n'omutima gwona, n'amagezi gona, n'amani gona, n'okugonza mutahiwe nk'okwo wenene alikwegonza, kirungi kushaaga ebihongo by'okwokibwa .” ³⁴ Yesu k'ayaboine okwo yahorora nk'omuntu owamagezi, amugambira ati, “Obukama bwa katonda tobuli hare.” Kwema aho taliho muntu yazilize kubaza Yesu kigambo kyona kyona. ³⁵ Yesu ayegesa omuli Rwensinga ati, “Abegesa b'Amateka bakugamba bata okwo Kirisito ali mwana wa Daudi? ³⁶ Daudi wenene omuli Mwoyo Mutakatifu, yagamba ati, ‘Omukama akagambira Mukama wange ati: Shuntama aha bulyo bwange, kuhika orwo ndikunaga omu maguru ababisha bawe.’ ³⁷ Daudi wenene namweta ‘Mukama;’ mbwenu aho Kirisito yaba ate mwana wa Daudi?” Embaga ekaba eli nyingi, emuhulira n'amashemelerwa. ³⁸ Yesu kayabaire nayegesa, agamba ati, “Murayelinda abegesa b'Amateka. Bagonza kugenda bajwete ekanzu ezira zira, n'okuramibwa omu katare, ³⁹ omu sinagogi baikalira entebe ezirungi, n'aha magenyi baitanira emyanya y'ekitinwa. ⁴⁰ Chonka bezora nibashoma enshara ezira zira, okwo oku nibalyaga omu maka ga abajane . Balihabwa ekibonabonyio ekihango kushagaho.” ⁴¹ Yesu kayabaire ashuntamire bwatana buhanika ya Rwensinga, abona omu buhanika obwo okwo embaga elikutamu empiha. Abatungi bangi bakaba nibatekamu amahera gangi. ⁴² Agya aija entumbwa omunaku, atekamu esarafu ibili z'omulinga, nilyo ihera limo. ⁴³ Ayeta abegesibwabe abagambira ati, “Mbagambiire amazima, omjane omunaku yatamu amahera gangi kushaaga bona abalikuteeka amahera omuli buhanika. ⁴⁴ Bona baihya aha bingi byabo ebyo bainabyo; chonka omjane n'obunaku bwawenene yatekamu byona ebyo yaba enabyo, nilyo lyaba lili itungalye lyonka.”