¹ Hageze mukitondo, abhakulu bhose bhamakuhani nabhazehe bhabhantu bhalamwichaliye Yesu bhagomba kumwicha. ² Bhalamubhoshe, bhalamulongoje, nukumusohoza iwa liwali Pilato. ³ Ukuvaho wa Yuda, yali amusaliti, yalabhonye intyo Yesu yamaze kuchilwa ulubhanza, yalifujije chane akola nukubhagalukiliza bhya-bhihande (ibhisate) amachumi atatu bhya-mahela kubhakulu bhama-kuhani nabhazehe, ⁴ Avuga ati, "Ndalakoze ibhichumulo kundamusalitiyije kumalaso gatali nubhubhonyi."Aliko bhalamwishula, "Leka hingomba kwikwi twebhwe? Nubhilabhe ibhyo wewe nyene." ⁵ Yavuyaha alabhinuga hasi bhyabhihela munzu yulusengelo lwi hekalu hagati, akola nukugenda aja kwiyahula wene nyene. ⁶ Umukulu wa bhakuhani yalabhitoye bhyabhihela avuga-ntya, "Ntali neza kubhika gano mahela mwibhiko lisadaka kukubha ali guluhande lwa-malaso." ⁷ Bhalalilimbuye bhose bhakolesha ago mahela kukugula umulima gulubhumba lubhwe lukuzikilamo abhalazi. ⁸ Nicho chateye ugo mulima gubhe, "Umulima gwa-malaso" kugela nugumusi. ⁹ Lya-jambo lyoyavuze umubhonyi Yeremia lyalakwijijwe, ligamba ati. "Bhalatwaye impande amachumi atatu bhya-mahela, Igalama yapanzwe na bhantu bhi Isiraeli kunanda yage, ¹⁰ Nbho bhazikolesheje kukugula umulima gulumba, nkingene Data bhuja yaliyambwilije (yandangiye)." ¹¹ Nawe Yesu yalahagaze imbele ya Liwali, Liwali alabhaza agila ati, "Wewe niwo umwami wabhayahudi?" Yesu yamwishuye avugango," ¹² Aliko aho hoyasikwa nabhakulu bha-makuhani na-bhazehe, ntiyushuye lyolyose. ¹³ Pilato yahweje amubhwila, "Ntulayumva aga gobhagiye bhakusitaka bhose muli wewe?" ¹⁴ Aliko ntiyamwishuye nijambo na-limwe, kulintyo Liwali yalamwobhewe. ¹⁵ None lelo kwisinkunkulu haliho inenge ya Liwali kumufungulila umufungwa umwe yalobhanuwe nikikundi cha-bhantu. ¹⁶ Aho nyene bhaliho numufungwa yalalengelenye izina lyage yitwa Baraba. ¹⁷ Intyo hobhali bhakonganye hamwe Pilato yalabhabhajije, "Niwahe wo-mugomba tumulekule kulibhwanyu?" Baraba kandi Yesu Yitwa Kristo?" ¹⁸ Kukubha yali amenya kobhamufashe kubhubhi bhwinsika. ¹⁹ Hoyali agye yichala kuntebhe yage yulubhanza, mugole yalamutumiye ijambo lukuvuga, "Ntukole ijambo lyolyose kuluyomuntu atali nubhubhonyi. Ndabhabhajwe chane mundoto nukugela gumusi kunanda yage." ²⁰ Niho abhakulu bhabhakuhani nabhazehe bhabhakobheye abhantu bhenshi bhamusabhe Baraba, Yesu nawe afe. ²¹ Liwali alabhabhaza, "Niwahe hagati yabha bhabhili wo mugomba jewe ndamulekule iwanyu ?" bhagamvye, "Baraba." ²² Pilato yabhabhwiye, "Ndamukolele linde Yesu yitwa Kristo?" Bhose bhishuye, "Mumubigaguze" ²³ Alabhabhaza, "Nikuki, nilyahe lyoya yononye?" Aliko bhalalengeje kukiliza ubhwaku halugulu chane, "Musulubishe." ²⁴ Pilato nawe hoyabhona kwatayobhola kukola lyolyose, akisubhiyeho nivulugu zalizitanguye, yalatoye amazi alakalabha amabhoko gage imbele yabhantu, akola nukuvugati, "Jewe ntalyo ndononye halugulu yamalaso guyu muntu atali nilyo yononye. nimugalabhe gano mwemwe nyene." ²⁵ Abhantu bhose bhavuga ati, "Amalaso gage nigabhe halugulu yachu na-bhana bhachu." ²⁶ Ahweza amubhohololela Baraba iwabho, Aliko yalamukubhise amakozi Yesu nukumushila mumabhoko gabho bhaje kumubhigaguza. ²⁷ Abhisilabha Liwali bhahweje bhamutwale mpaka munzu yaLiwalinikikundi kinini cha bhasilikale bhose bhalamukonganila. ²⁸ Bhalamwambula imyenda zage, bhamwambika inkanzu yitukula. ²⁹ Bhahweza bhalinganiza ulugali lyi-bhimwe nukuyibhika halugulu yu-mutwe gwage, bhalamubhikila umusunu mukubhoko kwage kubhulyo. Bhalafukama imbele yage nukumuchecha, bhagamba ati, "Tulakulamukiye, Umwami wa-bhayahudi?" ³⁰ Bhalamuchuga-ko amate, bhalatwala umusunu bhalamukubhita mumutwe. ³¹ Hobhali bhagiye bhamuchecha, bhalamwambuye ya-nkanzu bhwamwambika imyenda zage, nukumulongoza kugenda kumubhigaguza. ³² Hobhatuluka hanze, bhabhonye umuntu umwe ava Ikrene izina lyage ni Simeoni, bhalamumiliza kugenda nabhene Yegule umusalabha gwage. ³³ Hobhasohola ahantu hitwa Igoligotha, hamenyekana, "Muluhande lumwinyongelo." ³⁴ BHlamuhaye Isiku yitelanyijemo ninyongo (ubhulozi) anywe. Aliko yalayibhonjeje, ntiyayiyobhoye kuyinywa. ³⁵ Aho hobhali bhakimubhigaguza, bhagiye kubhabhula imyenda zage kukuzipigilila ukula, ³⁶ Bhahweje bhichala bhahola bhamulavye. ³⁷ Halugulu yu-mutwe gwage, bhabhise-ho amagambo gamustaka gandiswe ati, "Uyu ni Yesu, Umwami wabhayahudi." ³⁸ Abhivi bhabhili bhalabhigagujwe kumwe na wene, umwe uluhande lwage libhulyo nuwundi uluhande lwanyu lwi-bhamvu. ³⁹ Bhalya bhali bhagiye bhahita bhali bhamubhelabheza, bhazuza imitwezabho ⁴⁰ Bhagamba ati, "Wewe walugomba kulyonona Ihekalu nukulyubhaka kumisi zitatu, niwikize wewe nyene! Hakabha ulumwana wi Imana, shoka hasi uve kumusalabha!" ⁴¹ Bhali haliya nyene, abhakulu bhamakuhani bahali bhagiye bhamukengela (bhagamba kukakeza) kumwe na bhandishi nabhazehe, bhavuga ngo, ⁴² Yakijije abhandi, aliko ntayobhola kukwiza wene nyene. Wene nu-Mwami wabhayahudi. Nashoke hasi ave kumusalabha, niho tulokwemela. ⁴³ Yaliyizigila Imana. Leka Imana yimukize intya akabha agomba, kukubha yagamvye ati, "Jewe ndu Mwana wi-Mana."' ⁴⁴ Na-bhalya bhivi (abhalavya) bhali bhagiye bhahigagizwa kumwe na wene kandi bhagamvye amagambo gukumu-bhelabheza. ⁴⁵ Ukuva mumasa mukaga mpaka mumasa chenda kokuzubha hali haliho umwilima munsi yose. ⁴⁶ Halageze mumasa chenda, Yesu alabhologa kubhwaku bhunini, "Eloi, Eloi, lama thakitan?" yalamanishishije, Imana yanje, Imana yanje, nikuki kuwandekelelanye?" ⁴⁷ Mulogo mwanya bhamwe bhamwe bhali bhahagaze halya bhalategeje, bhagamba ati, "Alahamagala Eliya." ⁴⁸ Umwe mulibhene yahweje yiluka kutola isingo ayuzuza ibhintu bhikaliha, ayibhuka halugulu yiliti alamuheleza amunyweshe. ⁴⁹ Abhasigaye nabho bhavugati, "Nimumuleke wene nyene, Eliya aza kumukiza." ⁵⁰ Yesu yalalize kubhwaku bhunini akola nukufa. ⁵¹ Labha, Umukingo kwi hekalu gulasatuse impande zibhili kuva halugulu kuza hasi. Nu-lusi lugiye luzunguluka na mabhuye gasatuse ibhisate sate. ⁵² Imva nyishi zalafunduluwe, imibhili mishi za bhela bhali bhahuniye ililo bhalazuwe. ⁵³ Bhalavuye mumva kululo luzulo lwage, nhalinjila mumiji gwela, bhalabhonekana nabhantu bhenshi. ⁵⁴ Uliya mukulu wi Jeshi na bhaliaya bhali bhagiye bhamulabha Yesu bhabhonye itetemeko na magambo gali gagiye gabhonekaho, bhaluzuwemo nubhubha chane bhagamba, "Uyu yali alumwana wi Imana." ⁵⁵ Abhagole-gole bhenshi bhali bhagiye bhamukilikila Yesu ukuva igalilaya bhamukolele bhali haliaya bhalavye nkakule. ⁵⁶ Mulibhene bhalibhalimo Mariamu Magdalena, Mariamu nyina wa Yakobho na Yeseph, na nyina wa abhana bha Zebedayo. ⁵⁷ Hageze kumugolobha, alaza umuntu wumutunzi ukuva iwa Arimathayo, yaliyitwa Yusufu, yaali umwigishwa wa Yesu. ⁵⁸ Yalamugiliye Pilato kumusabha umubhili gwa Yesu. Niho Pilato yabhagiliye bhamuheze. ⁵⁹ Yusufu yalagutoye umubhili alagutekela mumyenda zisufi yibheleye, ⁶⁰ Yalagulakije mwikabhuli lyage lishasha (Mumva yishasha) yage yoyali yayimvye kwibhuye. Asubhila apilimiza Ibhuye linini lyukutwikila umulyango gwimva akole nukugenda. ⁶¹ Mariamu, Magdalena, na Mariamu ulya undi bhali bhali haliya bhayichiye hofi nimva. ⁶² Umusi gwakulikiye halumusi gukwitegula, abhakulu bhabhasanishi na-bhafalisayo bhalakonganiye hamwe iwa Pilato. ⁶³ Bhalamubhwila, "Data bhuja, tulibhuka ulya ulya mubhensi yagamvye hoyali akihema (akiliho), yagamvye, ati, 'Haheze imisi zitatu alozuka kandi,' ⁶⁴ Kulintyo, lagila iyomva yilindwe mpaka kumisi zitatu. Handiho, abhigishwa bhage bhoza kumwibha bhakagamba kubhantu, bhagilati, 'Yazuse kuva mubhafuye.' Nubhu bhenshi bhwa myuma bhulobha bhubhi kusumba bhwa mbele." ⁶⁵ Pilato alabhabhwila ati nimutole abhalinzi, "Nimugende mulilinde nkingene muyobhola." ⁶⁶ Bhakoze nukugenda kukola intyo kuliyomva bhalabhika ikimenyeso, kwibhuye nukulinda.