Niho ubhwami bhamwijulu bhuloka susa na makaumi chumi bhatwaye itala zabho bhagenda kumwakila nyene umubhala. ² Bhatanu mulibhene bhali ibhijuju abhandi bhatanu bhalinubhwenge. Gamakumi bhibhilandage bhatwaye itala zabho, zitalimo amavuta gogose. Nabhaliya bhubhwenge bhatoye itala zabho bhatola namavuta hamwe. ⁵ Habhaye umwanya nyenumubhala yatinze kusohola, bhose bhalafatwa nitilo bhalahunila. ⁶ Aliko halageze mwijolo hagati halihaliho akahundu, 'Labha, nyenumubhala! Tuluke hanze mumwakile.' ⁷ Niho gamakumi bhabhyuka bhose bhajakwasa za tala zabho. ⁸ Bhaliya bhalandage bhabhabhwiye bhaliya bhubhwenge, 'Ati nimutuheze amavuta matonyi itala zachu zigiye zizima.' ⁹ Aliko bhaliya bhubhwenge bhabhishuye nukubhabhwila ati, 'kukubha gatatukwila twebhwe na mwemwe, mwemwe nimugende yobhaguza mwigulile agabhakwiliye.' ¹⁰ Bhafuye kugenda kugula, gamavuta nyenu mubhala alasohola, bhose bhalibhaiteguye bhagiye na kumubhala, numulyango gulugalwa. ¹¹ Nagamakumi agandi bhahweje bhaza bhagamba ati, 'Data bhuja, data bhuja, tugululile.' ¹² Aliko yalabhishuye agamba, 'Ukuli ndimo ndabhabhwila, jewe hindabhamenya.' ¹³ Kulintyo nimwilabhe, kukubha mutamenya umusi kandi insa. ¹⁴ Kukubha alinkaulya muntu agomba kugenda ulugendo lukuja muzindi. Nsi yalabha hamagaye abhatumwa bhage nikubhabhikiza ubhutunzi bhwage. ¹⁵ Umwe mulibhene yamuhaye italanta zitanu, uundi yamuhaye zibhili, naulya undi umuheze italanta yimwe. kila umwe yayakiye ikigelo kingana nubhushobhozi bhwage uyo muntu akole nukugenda. ¹⁶ Ulya yakiye italanta zitanu yalagiye alazivyaza, alalonka izindi talanta zitanu. ¹⁷ Naulya kandi yalonse talanta zibhili, yalavyajije alalonka izindi zibhili. ¹⁸ Aliko ulya yayakiye italanta yimwe, yalagiye, kuyimbila alayizika mulusi, alanyegeza ihela lyasebhuja wage. ¹⁹ Halaheze imisi minshi, sebhuja wabho bhakozi alagaluka kandi aza bhabhalula kumwe na bhene. ²⁰ Ulya mukozi yayakiye italanta zitanu yalaje alazanana izindi talanta zitanu, agamba itya, 'Data, wampaye italanta zitanu. Labha, inyungu yizindi talanta zitanu.' ²¹ Sebhuja wage yamubhwiye, 'Nineza, umukozi mwiza kandi wemeleka! wayemeleze kumagambo mato mato. Ndokuheleza kuhagalikila halugulu yibhintu bhinshi. Niwinjile mwishimo lya sobhuja wawe.' ²² Alaza naulya yayakiye italanta zibhili agamba, ati 'Data bhuja, wampaye italanta zibhili. labha, ndalonse izindi talanta zibhili,' ²³ Sebhuja yamubhwiye, 'Nineza, umukozi mwiza nuwemeleka wayemelese! kubhintu bhitonyi. Ndokuhagalikila halugulu yibhintu bhinshi. Niwinjile mwishimo lya sobhuja wawe.' ²⁴ Hahweza haza umukozi ulya yayakiye italanta yimwe yaje asohola agamba, 'Data bhuja, ndamenya ko wewe ulumuntu wumutasi. Uja kwaha ahantu hutateye, kandi wimbula haliya hutafuliye. ²⁵ Jewe ndalafinyije, ndagenda kuinyegeza italanta yawe mubhyondo. Labha, labha ulinayo yilya nyene yiwawe.' ²⁶ Aliko sebhuja wage yamwishuye agamba, 'wewe ulumukozi umwononyi numudegesi, walamenyese kondaha ahantu honta teye kandi ndimbula ahontafuliye. ²⁷ Kulintyo walugeze kubhaheleza ihela lyanje bhaliya bhantu bhatola iliba, nahondogalukiye iwanje ndoyakiye lilya liwanje haliko ninyungu. ²⁸ Kulintyo nimumwake niyo talanta mumuheleze ulya mukozi alinazo italanta chumi. ²⁹ Kila muntu alinabhyo, alongelezwa bhinshi-nukulengelezwa chane. Aliko kuliwowose atali nikintu, nakilya chalinachene alakwa. ³⁰ Naulya mukozi atakwiliye, mumunuge hanze mumwilima iyo nihohali ikililo nukusya amenyo.' ³¹ Aho halokaza umwana wumuntu kubhwiza bhwage, nabhamalaika bhose hamwe na wene, niho aloyichala halugulu yintebhe yage yubhwiza . ³² Amahanga gose bhalokonganila imbele zage, nawe alobhatanya tanya abhantu, nkakulya kumulagizi atanya intama ni mpene. ³³ Alobhabhika intama mukubhoko kwage kubhulyo, impene nazo mukubhoko kwage kwibhamvu. ³⁴ Umwami alokola nukubhabhwila bhaliyo bhomukubhoko kubhulyo, 'Nimuze, mwemwe mwahezagiwe na Data wanje, muchule ubhwami bhwateguwe kunanda yanyu ukuva hakili kwabho umusingi gwi dunia. ³⁵ Kukubha ndalininzala mulampeleza ikilibhwa; ndali ndumulazi mula nyakila; ³⁶ Ndali ndubhusa, mulanyambika imyenda; ndalindalwaye mulaza kundabha; ndalinda bhoshwe mulanzila.' ³⁷ Niho abhali mukuli bhalomwishula, bhamubhwila 'Data bhuja, nilyali hotwakubhonye ulininzala, tulakulisha? kandi ulininyota tukakuheleza amazi? ³⁸ Nilyali kandi hotwakubhona ulumulazi, tukakwakila? kandi nilyali hotwakubhonye ulubhusa tukakwambika imyenda? ³⁹ Nilyali hotwakubhonye ulwaye, kandi wabhoshwe, tukakuzila? ⁴⁰ Umwami nawe alobhishula abhabhwila, 'Ukuli ngiye ndabhabhwila,nkingene mwakoleyemo umwe mulabho bhadugu bhanje bhatonyi, mwankoleye jewe.' ⁴¹ Niho alobhabhwila abha bhalimukubhoko kwage kwibhamvu, 'Ati nimuveho iwanje, mwasivwe, nimugende mumulilo gwimisi zitahela gwateguliwe shetani nabhamalaika bhage, ⁴² Kukubha jewe hondali ndi ninzala ntimwampaye ibhilibhwa; ndali ninyota ntimwampeleza amazi; ⁴³ Ndalumulazi ntimwanyakiye; ndalubhusa ntimwampa imyenda; ndali ndwaye ndalindabhoshwe, aliko ntimwanfashije.' ⁴⁴ Niho abho nabho kandi bhaloyishula bhagamba, 'Data bhuja, nilyali hotwakubhonye ulininzala, kandi ulininyota, kandi ulumulazi, kandi ulubhusa, kandi ulwaye, kandi wabhoshwe, ntitwakufasha? ⁴⁵ Alohweza abhishula nukugamba, 'Nimwemele ngiye ndabhabhwila, kilya chomutamukoleye na umwe wabha watonyi, bhanje ntimwankoleye jewe.' ⁴⁶ Abha bhalogenda mwi azabu zimisi zitahela nsinzi abhali mukuli bhene bhalogenda mubhukomezi bhuta hela."