¹ Maze Pilat' afata Yesu alamukubhita. ² Bhabhasilikale bhasogot' amahwa bhayakolamw' igichibho. Bhagishila kumutwe wiwe, kandi bhamwambik' inyambhala bhami. ³ Bhalamubwila bhati ''Ulaho Mwami w' Abhayuda! Bhamukubhitish' amabhoko yabho. ⁴ Maze Pilato alabhabwil' ati ''Ni mulabhe uwu muntu damubhazaniye kuko nta kibhi namubhonyeko'' ⁵ Maze Yes' asohoka hanze bhamwambhich' ichibho ch' amahwa mumutwe hamwe n' umwambhalo w' abhami. Maze Pilato alabhabwil' ati ''Labha nguwu hano'' ⁶ Maz' umuhelezi mukulu hamwe n' abhatwele bhamubhonye bhalasemelela bhati Mubhambhe! Mubhambhe! '' Pilato alabhabhaz' ati ''Ni mugende nawe mumwibhambhile mwebwe kuko njewe nta kibhi namubhonyeko''. ⁷ Abhayudfa bhalishula Pilato bhati ''Twebwe tulafis' amategeko yachu, kandi bhikwiliye yukw' apafa kuko yigelelanije n' Imana.'' ⁸ Pilat' amaze kuvyumva bhikomeza kumutel' ubwobha. ⁹ yinjila mw' Ipurayitoriyo, yongela kubhaza Yes' ati ''Wewe uvahe? Aliko Yesu ntiya mwishuye. ¹⁰ Maze Pilat' alamubhaz' ati ''Si ndiko ndavugana nawe? Wewe ntumenya yuko mfis' ubhushobhozi bwo kukulekula chankwe kukubhambha?'' ¹¹ Yes' alamwishul' ato ''Wewe nta bhubhasha wali kugila kuli njewe nuko gusa wabhuhawe n' ijulu.Nuko lelo uwanzany' iwaw' afis' igichumulo kinini''. ¹² Pilato yumvishij' izo nyishu yipfuza kumulekula. Abhayuda bhatel' ugwamo bhati ''Ni wamulekul' uzobh' utal' umugenzi wa Kayisari: Umuntu wesi yiyis' umwami abh' al' umwansi wa Kayisari.'' ¹³ Pilat' avyumvishije azana Yesu hanze maze yichala ku ntebhe y' imanza mu kibhanza chitwa Gabhata. ¹⁴ Kumusi wo kwitegula umaze gushika hali nk' isaha mukaga. Pilato alabwil' Abhayud' ati ''Nimwakil' Umwami wanyu'' ¹⁵ Bhalasemelela bhati ''Mwiche!, Mwiche! Ni mumubhambhe!'' Pilat' alabhabwil' ati ''None mushaka yuko nobhambh' Umwami wanyu? '' Maz' Umuhelezi mukulu alishul' ati ''Twebwe nta wundi mwami dufise; umwami wachu ni Kayisari'' ¹⁶ Maze Pilat' abhaheleza Yesu ngo bhamwibhambhile. ¹⁷ Maze bhajana Yesu naw' agenda yikoley' umusalabha wiwe kugez' ahitw' Igahanga, mu gihebhulayo bhahit' Igolugota. ¹⁸ Maze bhabhambha Yesu hamwe n' abhagabho bhabhili umwe mubhdyo uwundi mubhumoso Yes' aja hagati yabho. ¹⁹ Maze Pilato yamndik' ichandiko agishila k' umusalabha wiw' ati YES' UMUNYENAZARETI, UMWAMI W' ABHAYUDA. ²⁰ Bhenshi mu Bhayuda bhalabhisoma kuko hali luhande y' umuhalulo. Vyali vyandichwe mugihebhulayo, mukilatini hamwe no mukigiliki. ²¹ Maz' abhakulu bh' abhahelezi bhabwila Pilato ati ''Ntiwandike ngo n' umwami w' Abhayuda , andika ngo 'Umwe yiyis' Umwami w' Abhayuda''. ²² Pilato alabhishul' ati ''Ivyo namaze kwandika navyandiche'' ²³ Bhamaze kumubhambha bh' abhasilikale bhagabhul' imyambhalo yiwe mu bhiche bhine, kandi ni kanjo yiwe nyene, kandi yal' igunye guhela hejulu. ²⁴ Bhalavugana bhati ''Nti tuyisatule, ahubwo tuyikolel' ubhufindo kugila tumenye ninde yoyitwala''. Ivyo vyabhaye kugila chachandichwe gishike ngo ''Bhagabhuy' imyambhalo yanje, kand' ikanjo yanje bhayikoleyek' ubhufindo.'' ²⁵ Igihg' abhasilikale bhamugili' ivyo; Mariya nyina wa Yesu, Mwene wabho na Mariya, Mariya muka Keleopa na Mariya Magadalena bhali bhahagaze luhande gw' umusalabha wa Yesu. ²⁶ Yes' abhonye nyin' ali kumwe na wa mwigishwa wiwe yakunda bhahagazeho alavug' ati ''Mama labha uwo n' umwana wawe!'' ²⁷ Maz' abwila wa mwigishwa naw' ati ''Labha nyoko wawe nguwo'' . Guhel' iyo saha wa mwigish' amujana muhila kwiwe. ²⁸ Hanyuma yivyo kuko Yesu yamenya yukw' ivyandichwe bhishikijwe maz' alavug' ati ''Mfis' inyota'' ²⁹ Ngaho hafi halih' igikolesho chuzuy' umululazi bhagishila kw' isifongo bhalamushilila kumunwa ngw' anywe. ³⁰ Maze Yes' ayumvilije, alavug' ati ''Bhilaheze''. Maze yunamik' umutwe wiw' alachikana. ³¹ Kuko wal' umusi wo kwitegula kand' imibhil' italikwiliye kuguma kumusalabha kumusi w' isabhato(Kuk' uwo musi wali wubhashwe) abhayuda bhasabha Pilato yukw' amagulu yabho bhabhabwe yovunagugwa kandi n' imibhili yabh' ivanwe kumusalabha. ³² Abhasilikale bhalaza bhavun' amagulu y' umuntu wa mbhele hamwe n' uwakabhili muli bhadya bhali bhabhambhanywe na Yesu. ³³ Bhageze kuli Yesu bhasanga yamaze guchikana ntibhany' amagulu yiwe. ³⁴ Umwe mubhasilikale yachumise Yes' ichumu mulubhavu maze hasesekamw' amazi n' amalaso. ³⁵ Kand' uwabhibhonye niw' abhivuganila kand' avug' ukuli. Alazi neza yukw' abhabwiy' ukuli kugila namwe mwizele. ³⁶ Ibhi vyabhaye kugila vya vyandichwe bhisohozwe ngo ''Nta gufa dyiwe na limwe dyavunaguwe.'' ³⁷ Kandi haliho n' ivyandichwe bhindi bhivuga ngo ''Bhazokwilebhel' uwo bhachumise'' ³⁸ Hanyuma yivyo Yozefu wi Arimataya kandi yal' umwigishwa wa Yesu mwibhanga, kuko yatiny' Abhayuda yalaje asabha Pilato yuko yomuhelez' umubhili wa Yesu. Maze Pilato alabhimwemelela; Yozef' alaza gutwal' uwo mubhili wa Yesu. ³⁹ Maze Nikodemu wa wundi yaza kuli Yesu mwijolo naw' azan' ibhimota vyinshi hamwe n' Udi, kand' ubhulemele bwavyo vyali nk' ilatil' ijana. ⁴⁰ Nuko bhazingila wa mubhili wa Yesu mumyambhalo yela hamwe n' ibhimota chane nkuko wal' umugenzo w' abhayuda mu kuzika. ⁴¹ Luhande ya hadya Yesu yabhambhiwe halih' itongo kandi mulidyo halimw' izikilo lishasha nta,muntu yali bwalizikemwo na limwe. ⁴² Kuko wal' umunsi w' abhayuda kwitegula, kandi kukw' idyo zikilo dyali hafi , maze bhadyamikamwo Yesu.