¹ Yes' amaze kuvug' ayo majambho, yajanye n' abhigishwa bhiwe ku mwonga witwa Kidironi, aho hantu halih' itongo, yinjilamwo n' abhigishwa bhiwe. ² Kandi na Yuda wa mugulanyi yalimeny' aho hantu, kuko Yesu yakunda kujanay' abhigishwa bhiwe. ³ Maze Yud' amaze kwakil' abhasilikale n' abhatwale bhava kubhakulu bh' abhahelezi bhaza bhazany' amatala, n' amahili hamwe nibhindi bhigwanishwa. ⁴ Kandi Yesu kuko yali meny' ibhilimwo bhilakogwa kubwiwe, alabhiyelek' alabhabwil' ati '' Ninde mulondela? '' ⁵ Nabho bhalamwishula bhati ni Yes' Umunyenazaleti'' . Yes' alabhabwil' ati ''Ni njewe'' Kandi Yuda wa Mugulanyi yali hyagaze luhande y' abhasilikale. ⁶ Maz' amaze kubhabwil' ati ''Ni njewe'' bhagend' igihinamugongo bhikubhita hasi. ⁷ Yongela kubhabhaz' ati ''Ninde mulondela?'' Nabho bhalamwishula bhati ''Ni Yes' Umunyenazaleti.'' ⁸ Yes' alabhishul' ati '' Namaze kubhibhabwila yukw' ali njewe; kukw' ali njewe mulondela, nimulekule bhano bhandi bhigile. '' ⁹ Ivyo vyagenze bhityo kugila chachandichwe gishichwe ngo ''Muli bhadya bhosi wampaye nta muntu numwe nazimije.'' ¹⁰ Maze Simoni Petero kuko yalif' inkota alayifata alayikalisha ach' ugutwi kw' umukozi w' Umuhelezi mukulu. Izina dy' uwo mukozi yitwa Maluko. ¹¹ Yes' abwila Peter' ati ''Subhiz' inkota yawe mugwubhati gwayo. Wumva nokwilengagiza gut' igikombhe nahawe na Data?''' ¹² Nuko wa mugwi w' abhasilikale n' abhakulu bhabho, n' abhakozi bh' Abhayuda bhafata Yesu bhalamubhoha. ¹³ Maze bhalabhanza bhamujana kwa Anasi, kuko yal' umukwe wa Kayafa, kandi Kayafa niwe yal' umuihelezi mukulu mwuwo mwaka. ¹⁴ Uwo Kayafa niwe yahanuy' Abhayuda yuk' umunt' umw' akwiliye gupfa kubw' abhantu.'' ¹⁵ Simoni Petero hamwe n' uwumndi mwigishwa bhalakulikiye Yesu. Kand' uwo mwigishwa wundi yalamenyekana kwa ku mulugo gw' umuhelezi mukulu, maze yinjilana na Yesu hagati mukigo ch' Umuhelezi Mukulu; ¹⁶ Aliko Petero yali hagaze hanze y' u,mudyango. Maze wa mwigishwa yalimenyekana k' Umuhelezi mukulu, alasohoka hanz' abhanza kuganila n'udya mukozi yalinda kumudyango kugila yemelele Petero kwinjila. ¹⁷ Maze wa mukozi yalinda kumudyango abwila Petero ati '' Mbhesi nawe wobh' ulumwe mubho yigisha? maze yishul' ati ''Oya si ndiwe''. ¹⁸ Kand' abho bhakozi hamwe n' abhatwale bhosi bhali bhichayeho bhot' umulilo kuko halih' imbheho, bhagelageza guhig' ukwo bhosusuluka. Kandi Petero nawe yalikumwe nabho yot' umulil' ahagaze. ¹⁹ Umuhelezi mukul' abhaza Yesu kuvyelekey' abhigishwa bhiwe hamwe n' inyigisho ziwe. ²⁰ Yes' alamwishul' ati ''Isi nayibwiliy' ahabhona; kenshi nigishilije mu masinagogi hamwe no mulusengelo ah' abhayuda bhakolanila .Nta na kimwe navugiye mwibhanga. ²¹ Kubhel' iki mwombhaza? Ni mubhaze bhadya bhanyumvilije bhobhabwil' ivyo bhumvishije. Abho bhalabhizi vyosi. ²² Yes' amaze kubhivuga umwe mu bhakulu bhali bhahagazeho akubhit' ulushi Yes' amubwil' ati ''Ukwo nikwo bhikwiliye yuko ewishul' umuhelezi mukulu?'' ²³ Yesu naw' alamwishul' ati ''Ni habha halih' ikintu kibhi wumvishije mvuga n' ukinyagilize , kandi ninabha ndamwishuye neza ni kubhel' ik' unkubhise? ²⁴ Maze Anasi atuma Yesu bhamujana kwa Kayafa, umuhelezi mukulu bhamubhoshe. ²⁵ Maze kuko Simoni Petero yali hagaze ngaho yot' umulilo; abho bhantu bhalamubwila bhati ''Ko tubhona nawe nyene ul' umwe mubhigishwa bhiwe?"' Alihakan' ati '' Sindi mulibho'' ²⁶ Umwe mubhakozi bh' umuhelezi mukulu kandi yavukana na wawundi Petero yach' ugutwi alavug' ati ''Si wewe nabhonye hamwe nawe haliya muli dyatongo?'' ²⁷ Petero yongela kwihakana maz' isake nay' ich' ilabhika. ²⁸ Maze bhavana Yesu kwa Kayafa bhamutwala munzu y' abhasilikale yitwa Pulayitoliyo. Hali mugitondo chane. Aliko bho ntibhinjiye mwi Pulayitoliyo kugila ntibhahumane bhagahava bhanagwa kudy' umusi mukulu wa Pasika. ²⁹ Maze Pilato alaza alabhabhaz' ati ''Uwu muntu mu muleg' iki? ³⁰ Bhalamwishula bhat' ''Uwo munt' iyabh' atagichumulo yakoze ntitwali kumukuzanila.'' ³¹ Pilat' alabhabwil' ati ''Ni mu mujane mumwihanile nkuko mutegekwa n' ivyagezwe vyanyu.'' Nabho bhalamwishula bhati ''Ichagezwe chachu ntikitwemelela kwich' umuntu''. ³² Ivyo bhabhivuze kugil' ijambho dya Yesu lishichwe , lidya yali yavuze kuvyelekelanye n' ulupfu gwiwe. ³³ Maze Pilato yongela kwinjila mw' Ipulayitoliyo ahamagala Yesu maz' alamubhaz' ati ''Wew' ul' Umwami w' Abhayuda? '' ³⁴ Yes' alamwishul' ati ''Wew' umbhaza kuk' ushaka kubhimenya chankwe kukw' alabhantu bhagutumye kubhimbhaza?'' ³⁵ Mze Pilat' alamwishul' ati ''Ntumenya neza yuko njewe ntal' Umuyuda, sikwo? Ihanga dyawe hamwe n' umuhelezi mukulu nibho bhakunzaniye; mbwila wewe wakoz' iki? ³⁶ Yes' alishul' ati ''Ubwami bwanje s' ubwayinosi, iyo bwabh' ubwayinosi mfis' abhakozi bhenshi bhali kungwsanilila kugila simfatwe n' Abhayuda. Nukuli ubwami bwanje s' ubwayinosi. Nukwo. ³⁷ Pilat' alamibhaz' ati ''None wew' ul' Umwami?'' Yes' alamwishul' ati ''Wewe nyen' ulavyivugiye yuko nd' umwami; iki nicho navukiye kandi nicho chanzanye mwayinosi, kugila ngo mbh' ichabhona ch' ukuli. Umuntu wes' akund' ukuli yumviliz' ijwi dyanje. ³⁸ Pilat' alamubwil' ati ''Ukuli n' iki? '' Amaze kubhivug' asubhila kubhayuda alabhabwil' ati ''Nta gichumulo mbhona kuliwe''. ³⁹ Mwebwe mufis' umugenzo wo kunsabha yuko nobhalekulil' imbhoh' imwe kumusi mukulu wa Pasika. None mwipfuza yuko nobhalekulil' Umwami w' Abhayuda?''. ⁴⁰ Bhalasemelela bhati ''Oya siwe dushaka, tulekulile Baraba''. Kandi Baraba yal' igisuma gikomeye.