¹ Tulabhagomba mwemwe mumenye, kasaza mwene wachu na mwishiki kukwelekela inzeru yima na aliyo yatanzwe kumakanisa na makedonia. ² Mkanya kibhigalagezo` bhinshi bhya mahangayiko, nubhwinshi bhukushima kwabho nukugwila kubhukene bhwabho bhwavyaye ubhutunzi bhukuze nubhukelebhusiu. ³ Kwilyo ndibhonela yukubha bhalatanze kukwingana nikigene bhashobhoye, kana nukusumba bhalashobhoye. ⁴ Kukugomba kwabho bhene nyene kukutwi ninga kwinshi bhalatusavye kuluhande lukushila hamwe mubhikolwa i bhi bhyabhemeje. ⁵ Ili ntila tuluse nkingene twali tumenya inchungulo yage kandi bhalisizeho bhene nyene kumwami bhahweje bhisigaho bhene nyene iwachu kulukundo lwi Mana. ⁶ Ninkantya twalamwinginze Tito, aliwo yaliyatanguye niwo yatenguye ibhikolwa ibhi kuzana ukukwila kwilikolwa lino lyubhukelebhusi halugulu yanyu. ⁷ Aliko mwemwe muli nubhumwe mubhinti-bhyose nimumaholo, namungambo namalyo nukwihangana nulukundo lwanyu kuluhande lwachu kwilyo nimwilabhe lyukubha mwemwe mulabhanye nubhwinshi kandi mubhikolwa ibhi bhyubhukelebhusi. ⁸ Ndimo ndagamba hili ntali liteka. Inchungulo yage. ngiyengamba ili nilyulwilabha komuli nulukundo iwanyu kwingana ni nyota ya bhantu bhandi. ⁹ Kukubha mulamenya inzelu yu Mwami wachu Yesu Kristo niho yalumutunzi kuli mwemwe yalu mukene aliko kugomba kuhitila ubhukene bhwage mushobhole kubha abhatunzi. ¹⁰ Mwili jambo lino ndobhaheza ubhuhanuzi alibho mulobhafasha kumwaka gumwe gwahise ntimwatanguye kusa kukola ilyo jambo aliko mwalalifujije kulikola. ¹¹ None lelo mula mulikwize nkikigene lyali ninyota nukuligomba kulikola muhweje intya moshobhola kandi kulizana likwiliye nkingene mushobhola. ¹² Kukubha muli ninyola yukukola ilikolwa lino nijambo lisole kandi lilemeleka na ili lihagalale halugulu yakilya chalinacho umuntu atali akugulu yakilya chatalinacho umuntu. ¹³ Kukubha ibhikolwa bhino bhitali nuluhande lwakubhandi bhoshobhola kukonka umucho na bhishobhole kulemelwa inchungulo yage habhe nubhumwe. ¹⁴ Ubhwinshi bhwanyu bhumwanya gwa ntya bhulatufasha kulikilya chobhagiye bhagomba ili nintyo kandi lyukubha numwinshi bhwabho mushobhole kubhafasha ibhigombezwa bhyanyu nukubha habhe nukumwe. ¹⁵ Ili niko lyandiswe; "Wene ali nabhinshi ntiyali nibhintu bhyobhyose yasigaye nawene yali nabhitoli ntiyali nibhigombezwa bhyobhyose. ¹⁶ Aliko yishimwe Imana, yasizeho munda yumutima gwa Tito umutima gulya nyene gukwihangana nukwibhako aliyo linayo kuluhande lwanyu. ¹⁷ Kukubha kusa yalakiye amasabhe gachu njanye kandi hoyali nikwihanga kukwelekela nibhisabhisho ibhyo yalaje iwanyu kukugomba kwage wene nyene. ¹⁸ Twalamutumye kumwe na wene mudugu aliwo twigina mulibhaliya bhamakanisa kubhikolwa bhyage mukuteguza iinjili. ¹⁹ Tulibhibhi kusa aliko kandi yatowe namakanisa kukutambula na twebhwe mukulyegula kuluhande loselose ilikolwa lino lyulukelebhuka ili nilikuva kubhela bhumwami wene nyene nukunyotelwa kwachu nukufashiliza. ²⁰ Tulikulamo mubhushobhozi bhukubha wowose alagombezwa kusamba kukwelekela na twebhwe kukwelekela mubhukelebhusi bhuno alibho tweguye. ²¹ Tulatola kukwitonda kukola ikili nubhwitonzi kumbele yumwami aliko kandi imbele zabhantu. ²² Kandi tulamutuma umudugu uundi kumwe nabho. Twalamulavye mumisi minshi kandi ubhonye alininyota kuluhande lwibhikolwa bhinshi, ninkantya alituma chane kwisabhabhu yubhutwelusi bhunini bhwalinabho mumi tima zanyu. ²³ Kukutegulwa kwa Tito wene alikumwe numugenzi wage numukozi wibhikolwa mugenzi wanje kuli mwemwe nkabha dugu bhachu, bhagiye bhatumwa namakanisa nabhitonze kuli kilisto. ²⁴ None nimumubheke ulukundo lwanyu mwelekane nikumakanisa kwisabhabhu yukwibhona kwachu kuluhande lwanyu.