¹ Petelo hamwe na Yohana bhaliko bhalagenda M'ulusengelo kugihe ch' isaha mwenda cho gusenga. ² Halih' umuntu yaliyalamugay' ibhilenge kuva munda yanyina kandi bhalamuzana bhul'umubhagwa bhakamwichalika kw' ilembho dy' ulusengelo dyitwa dyiza, kugil' asabhili~lize ku bhantu bhinjilamwo gusenga. ³ Abhonye yuko Petelo hamwe na Yohana bhashaka kwinjila maze naw' alabhasabha ngo bhamuhe. ⁴ Petelo naw' alamulabha chane, hamwe na Yohana, bhalamubwila bhati '' Utwitegeleze neza '' ⁵ Maze wa munt' amugay' abhalebha n'igishika yiteze yuko bhagila cho bhamumalila . ⁶ Aliko Petel' alavug' ati ''Njew' ata feza chankw' inzahabhu nfise, aliko ndagufasha kuvyo mfise,haguluka mw' izina dya Yesu w' Inazaleti kand' ugendagende''. ⁷ Petelo yamufash'ukubhoko kwiwe kw' ubhudyo maz' alamuhagulucha; ubwo nyen' amagulu hamwe n' ingingo ziwe bhilagololoka bhilonk' inkomezi. ⁸ Wawundi yalimugay' alasimbha maz' abhanza kugenda ~genda; yinjila mulusengelo hamwe na Petelo na Yohana, ataluka yigela hedjulu mugushim'Imana. ⁹ Abhantu bhosi bhamubhon' agenda~genda yongel' ashim' Imana ¹⁰ Bhamenya yukw' aliwawundi yasabhili~liza kw'ilembho dyiza dy' ulusengelo , bhalatangala bhalumigwa kubw' ivyo vyakoleche. ¹¹ Akilikumwe na Petelo hamwe na Yohana maz' abhantu bhosi bha~bhasanga mu chumba chitw' I cha Salomo bhibhatangaje chane. ¹² Petero abhibhony' alabhabwil' ati ''Yemwe bhantu bha Isilayeli kubhel' iki mutangaye chane? kubhel' iki mutulabha chane, umenga mwibhaza yukw' alitwebwe twamukidjidje kubhushobhozi bwachu chankwe kukugololoka kwachu''? ¹³ Imana ya Abhulahamu na Isaka hamwe na Yakobho, niyo Mana yabhasogokulu yashemagije umukozi wayo Yesu. Uwo niwe mwatanze kwa pilato mukamwanka wewe yashaka kubhalekulila ya ntagondwa. ¹⁴ Mwihakany' umugololoch' aliwe mwelanda, aliko mwahisemwo yuko yantagondw' aliyo bha~bhalekulila. ¹⁵ Mwebwe mwish' uwabhahay' ubhugingo, kandi Imanayamvanye mubhapfu kandi twebwe twalavyibhonye. ¹⁶ Bhichiliye mukumwizela, uwu muntu musanzwe mumenya , mulabhona yuko yabhaye muzima . Ukwizela kuli muli Yesu nikwo kwamushobhoye kubha muzim' ibhele y' amaso yanyu mwesi. ¹⁷ None bhene wachu, nizeye yuko mwabhikoze mugutamenya kandi n' abhatwale bhanyu niko bhakoze. ¹⁸ Kandi vyabhind' Imana yabhabwila kela mukanwa kabhavugishwa kuvyelekeye kumibhabhalo ya Kilisto kandi vyalashikidjwe. ¹⁹ Nuko lelo nimwihane kandi muhindukile kugil' ivyaha vyanyu bhikugweho, kandi haz' ibhihe vyiza vy' ukubhaho kw' Umwami wachu, ²⁰ Maze nay'izobhazanile Kilisto mwateguliwe kuva kale ngw' abhe Yesu. ²¹ Niw' akwiliye kwakigwa mw' idjulu kugez' igihe chokugaluzwa kw' ibhintu vyosi kubha bhisha~sha nkuko vyavuzwe n' abhavugishwa bhela, kuva kale chane. ²² Kuko Mose niwe yavuz' at '' Iman' izobhazanil' umuvugishw' ameze nkanje kand' azova muli mwebwe , muzokwumviliz' ibhintu vyos' azobhabwila. ²³ Hazogeligihe ch' umuntu wowesi atazokumviliza kuva kumuvugishwa uw' azohelehezwa n' ugukugwa hagati y' abhantu. ²⁴ Abhavugishwa bhosi kuva kuli Samweli nabhadya bhosi bhakulikiye hanyuma yiwe , nibho bhavuga nukulang' iyimibhagwa. ²⁵ Mwebwe mulabhana bhabhavugishwa nabhisezelano dyakozwe n' Imana hamwe nabhasokulu, nkuko yavuze kul' Abhulahamu, '' Kuva mulubhuto gw' imvyalo zawe zo kw'isi zilohezagigwa.' ²⁶ Iman' imaze guhaguluch' umukozi wayo, yamutumy' iwany' ubwambhele , kugila ng' abhahezagile mwebwe ngo muhindukile kuva mubhi~bhi vyanyu.