¹ Bhitegechwe yuko dukwiliye gufat' ulugendo kudja muli Italiya duchiliye mumazi , bhashize Pawulo n' abhandi bhapfugwa mu ma bhoko y' umusilikale w' abhaloma yitwa Juliyo wo mu mugwi wa Agusitani . ² Twulila mu meli dutuluka muli Adulamitamu, iyo yakolel' ingendo zo ku nkombhe ya Asiya. Maze tudja mu kiyaga. Alisitaka wo muli Tesalonike ya makedoniya yadjanye natwe. ³ Kumubhagwa wakulikiyeho twashimikiye muli Sidoni, ngaho Juliyo yelechwe ubhugwaneza kuli Pawulo kand' amwemelela kudja mubhagenzi bhiwe no kugiligwa neza nabho. ⁴ Tuvayo tuli mukiyaga tuzunguluk' ikizinga cha Kipulo chali cha bhudjidj' umuyaga wali watumeleyew nabhi. ⁵ Tugeze mu mazi ya muli Kilikiya na Pamufiliya, tugela muli Mila, wa mudji wa Lisitila. ⁶ Wamusilikale wu muloma, yasanze ngah' imeli yatuluka muli Alekisandeliya y6ashaka kwelekeza muli Italiya. Atwuliza muliyo. ⁷ Tumaze kugenda mumibhagwa myishi bhukebhuke munyuma tugela muli Kinidas bhitugoy' igitutu cha Kelete twilinz' umuyaga, luhande gwa Salumone. ⁸ Duchila luhande gw' inkombhe bhitugoye, maze tiugel' ahantu hitwa ku chambhu chiza halili luhande y'umudji wa Lasi. ⁹ Vyali vyadutway' igihe kinini chane, kandi n' igihe ch' Abhayuda cho kwisonzesha chali chaheze, icho gihe ntivyali vyoloshe gukomeza n' ulugendo. Maze Pawul' alatwihaniza, ¹⁰ alavug' ati'' Bhagabho ndabhona yuko luno lugendo dushaka gufata luzotuzanil' ingolane nini, si kubw'ivyo tuleche gusa kumwe n' imeli, ahubwo no kubhuzima bwachu. ¹¹ Aliko wamusilikale w'umuloma yumvila wa muntu mwen' imeli, kuluta yamadjambho Pawulo yavuze. ¹² Kuko kuchambhu ntihali heza kubhaho mugihe ch' imbheho, abhasoza bhenshi bhahanula yuko twofat' ulugendo kuva ngaho, kugila mubhudyo bwobwosi bhishobhoche yuko tugela mu mudji wa Foyinike tugumeho mugihe ch' imbheho.Foyinike n'ichambhu cho muli Kelete, kandi chelekeza mu madja lugulu yo mubhuseluko no mu madj'epfo yomubhuseluko. ¹³ Umuyaga w' amadj'epfo wabhanjidje guhuha bhukebhuk' abhasoza bhachabhibhaza yuko bhalose kidya chobhali bhipfuza.Bhalashungula bhabhanza gusoza kunkengela z' inkombhe ya Kelete. ¹⁴ Aliko mugihe gitoyi hadj' umuyaga munini wisw' uwo mu madj'alugulu yo mubhuseluko, ubhanza kutubhendulila hakudya y' inkombhe y' ikizinga. ¹⁵ Chaguh' imeli yananigwa kubhel' umuyaga, twemelana navyo , umuyag' ulatudjana. ¹⁶ Tugenda dutumula duchiliye hahandi hadukingil' umuyaga w' ikizinga chitwa Kauda; twalokoy' ubwato bhitugoye chane. ¹⁷ Bhamaze kuyikwega, bhabhohesh' iyo meli n' umugozi. Bhatinya kwoduhava dutwagw' ahantu halil' umusenyi mwishi muli Sayiti, maze bhalashimika bhasoza bhaganisha ku nkombhe. ¹⁸ Ikivumbhuzi kinini kila tuvumbhulanya, bhukeye bhabhasoza bhabhanza gutelel' imigugu muluzi bhayivana mwi meli. ¹⁹ Kumubhagwa awa gatatu bhabhasoza bhatangula kudahish' intoke ya mazi yinjiye. ²⁰ Nachagihe tulabhon' umucho w'ukwezi ninyenyeliu mu mibhagwa myinshi, naho nyen' ikivumbhuzi chalatuvumbhula maze dutakaz' ivyizigilo vy kulokogwa. ²¹ Bhamaz' igihe bhagend' atavyokudya, Pawulo yahagaze hagati y' abhasoza maz' alavug' ati, '' Yemwe bhantu, vyali bhikwiliye yuko munyumviliza, ntivyali vyiza yuko tubhanz' ulugendo gwo kuva muli Kelete , kuza kumelegwa nabhi na kino gihombho. ²² Aliko ndabhahumuliza ntimutinye, kuko nta bhuzima bw' umuntu n' umwe bhuza kuzimila, aliko bhuno bwato bhulaza kubh' igihombho. ²³ Kubhela mw' idjolo dyaheze hadje malayika yahagaze luhande yanje, ²⁴ Yavuze ngo, '' Ntutinye Pawulo. uzohagalal' imbhele ya Kayisali, kandi lebha , Imana kukigongwe chayo yakugabhiye bhano bhantu bhosi mulikumwe mulugendo.'' ²⁵ Nuko lelo, yemwe mwabhantu, nimuhumule, kuko ndizey' Imana, yuko bhiza kumela nka kudya yabhimbwiye. ²⁶ Alikw' imeli yachiy' iza kwononekala mu kizinga lunaka. ²⁷ Mw' idjolo dya chumu na kane, tuliko tula djumbhishwa mukiyaga cha Adiliya, nko mugichugu, abhasoza bhibwiye yuko twegeledje ku nkombhe. ²⁸ Bhapimy' ubhulebhule bw' amazi maze bhabhona kali ntambhuko mulongw' itatu na mukaga, mukanya bhongela gupima bhasanga nintambhuko milongwibhili na mushanju. ²⁹ Bhatinya yuko bhohava bhagong' ulutale, maze bhasabha yuko bwocha ningoga. ³⁰ Abho bhasoza bhalondela kungene bhosiga ngah' iyo meli kandi bhali bhameny' amato yokulokol' ubhuzima, maze bhamela nk' abhashimik'ichuma kuluhande gw' imbhele y' imeli. ³¹ Aliko Pawulo abwila wa musilikale w' umuloma kumwe nabhasilikal' ati, '' Abha bhantu nimwabhemelela kuvamwo ntimuza kulokoka bhatagumye mu meli.'' ³² Maz'bhabhasilikale bhatem' umugozi w'ubwato maze bhadjanwa n' amazi. ³³ Imilasile yigitond' imaze kubhoneka, Pawulo yabhasavye bhosi yuko bhofungula gatoyi. Alabhabwil' ati, '' uwu numubhagwa wachumi na kane mutadya, ntacho mulatamila. ³⁴ Nuko ndabhingize mudye dukeyi, kuko nikubwo kulind'ubhuzima, bwanyu; na kandi ntagashichi ku muntu n'umwe kaza gutakala. ³⁵ Amaze kubhivug' atol' umukate maz' ashimil' Imana mu maso yabho maz' abhanza kudya. ³⁶ Maze bhosi bhalahumulizwa nabho bhabhnza kudya. ³⁷ Twalil' abhantu 276 mu meli. ³⁸ Bhamaze kudya bhateley' ingano mu mazi kugil' imeli bhayilemululile. ³⁹ Kumutaga ntibhameny' ichogihugu aliko bhabhon' ahantu halih' umusenyi mwishi hinjila mukiyaga.Bhabhazanya yuko bhosoza bhelekezayo. ⁴⁰ Maze vya vyuma bhalabhidegulila bhabhisiga mukiyaga.Ubwonyene bhadegulil' imigozi y'ivyuma bhayelekeza mu muyaga, maze bhadj' ahohantu h' umusenyi mwishi. ⁴¹ Aliko bhagenzi mwihulilo dy' imikubh' ibhili yamazi, kand' imeli yalikw' iladja mu musenyi , kandi dya zulu dy' imbhele dyanka guchaho, nuko gwaluhande gw'iombhe gw' imeliu lubhanza gusatugwa n' imikubha. ⁴² Umugambhi wa bhasilikale wal' uwo kwich' abhafugwa bhosi, kugila ntihabheho n'umwe wo kwoga no gutoloka. ⁴³ Aliko wa musilikale w' Umuloma yapanga kulokola Pawulo, gutyo nikwo yashobhoye guhagalika wa mugambhi wabho; ategeka yuko bhadya bhosi bhashobhoye kwoga bhataluka kuva mubwato bhadja hakudya kubhutaka. ⁴⁴ Kandi nabhandi bhalakulikila, abhandi bhadyama kubhipande vy' imbhaho kand' abhandi kubhindi bhintu vyo muliyo meli.Gutyo bhilashobhoka yuko twesi twoshikay' amaholo haliya kubhutaka.