¹ Tugedjedjwey' amaholo, twamenye yukw' icho kizinga bhachita Malita. ² Abhantu bhaho ntibhatubheley' abhagwaneza gusa, ahubwo bhongeyeko kuduchanil' umulilo bhaduhamagala kwota twesi,kubw' imvula kumwe n' imbheho vyaliliho. ³ Aliko chagihe Pawulo yalikw' alegelany' inkw' azishila mu mulilo,inzoka ntiyi y' isumu yazivuyemwo kubw' iyo ntuguta, kand' yizungulizaku kubhoko kwiwe . ⁴ Abhantu bho ngaho bhabhony' ilikw' ilenena ku kubhoko kwiwe,bhalivuganya bhati, ''Uwu muntu wosang' al' umwichanyi yahunze mu kiyaga, alikw' ubhutungane ntibwomwelela kubhaho.'' ⁵ Aliko wewe yayikololeye mu mulilo kandi ntacho vyamutwaye. ⁶ Bhosi bhali bhalindiliye yuko yovyimbha chankw' akagwal' inyonko chankw' akagwa has' agapfa.Aliko bhamulavye mu mwanya munini bhakabhon' atacho yabhaye, bhahinduy' ivyiyumvilo vyabho bhatangula kuvuga yukw' aliwe mana. ⁷ Ngaho hafi halilih' itongo dy' umutwale w' icho kizinga, uwo muntu yitwa Pabuliyo. Yalatwakiliye mu mibhagw' itatu. ⁸ Se wa Pabuliyo yafashwe n' inyonko kumwe no guhalisha.Kandi Pawulo yalagiye, alamusengela,amushila kw' amabhoko yiwe, kandi alamukiza. ⁹ .Ivyo bhiheze,abhagabho bho mw' icho kizinga bhali bhagwaye bhalaza bhalakizwa. ¹⁰ Abhantu bhalatwubhaha chane.Mugihe twaliko tulitegula kugenda bhaladutekelela bhul' ikintu cho twali dukeneye. ¹¹ Munyuma y' amez' atatu,twafash' ulugendo mu bwato bwa Isikanda yaliyakubhiswe n' imbheho ngaho mu kizinga, abhasoza bhayo bhalavukana kuko bhalil' amahasa. ¹² Tumaze guhitamw' umudji wa Silakusa, twichayey' imibhagw' itatu. ¹³ Twavuyeyo tugela mu mudji wa Legiyo.Mu mibhagwa mikey' umuyaga wo mu madjepfo wadje gitulumbhuka,hahez' imibhagw' ibhili tugela mu mudji wa Putoli. ¹⁴ Hiyo twasanzey' abhavukanyi maze bhalatwakila tubhana nabho mu mibhagwa mushanju.Ukwo nikwo twinjiye muli Loma. ¹⁵ Tukili hiyo bhadya bhavukanyi, bhamaze kwumv' inkulu zachu, bhaladje kutwakila hiyo kw' isoko dya Apiyo no mu bhulilo bhutatu.Pawul' amaze kubhab hona yashimy' Imana kandi yishilamw' inkomezi. ¹⁶ Tumaze kwinjila muli Loma, Pawulo yemelewe kubha kwiwe kumwe n' udya musilikale yali mulaliliye. ¹⁷ Mu nyuma y' imibhagw' itatu Pawulo yahamagaye bhadya bhagabho bhali bhakulu muli bhagenzi bhabho mu Bhayuda. Bhahuliye hamwe, yalabhabwiy' ati''Bhagenzi naho njewe ntakoz' ikosa na limwe kuli bhano bhantu chankwe kubhidjanye n' imigenzo y' abhakula-mbhele bhatwitangiye, nazanywe nd' imbhohe kuva muli Yelusalemu bhanshila mu mabhoko y' Abhaloma. ¹⁸ Bhamaze kunsambhisha, bhashache kundekula, kuko nta kosa bhabhonye dyo kunyicha. ¹⁹ Mugabho bhadya Bhayuda bhamaze kuvuga bhidya bhitandukanye n' ukwo bhiyumvila, aliko sinako ndashaka kuleg' igihugu chanje. ²⁰ Aliko kuko nashaka gusabha kwigil' imbhele, niho nasavyo yuko nobhabhona tukaganila. Njewe mbhoshwe kubwa kidy' Abhayisilayeli bhosi bhategeledje. ²¹ Maze bhalamubwila bhati, "Ntituligela kwakil' ugwandiko lutuluka mu Bhuyuda kubhikwelekeye.Kandi nta muntu yatubwiy' ikintu chochosi chankwe ngw' akuvugekw' ikintu kibhi. ²² Aliko twashaka twumv'ivyiyumvilo vyawe kuvyelekey' uwu mugwi w' abha bhantu, kuko bhilabhonekana yuko bhul' umunt' abhivuga nabhi bhul' ahantu. ²³ Chagihe bhali bhamuteguliy' umubhagwa lunaka, abhantu bhenshi bhadje muhila kwiwe.Yalabhabwiy' ivyelekelanye n' ubwami bw' Imana.Agelagedje kubhabwil' ivya Yesu, bhivuye mu mategeko ya Mose kumwe no mubhavugishwa, yaheleye mu gitondo kugeza ku mugolobha. ²⁴ Bhamwe mulibho bhalemelanidje na bhidya yabhabwiye, alikw' abhandi ntibhavyizeye. ²⁶ Bhananiwe kwumvikana , bhachiye bhavaho kuko Pawulo yalimaze kubhabwila lino djambho ngo ''Mpwemu yela niwe yavuze neza kuli bhasokulu bhanyu mu kanwa k' umuvugishwa Yesaya. ²⁵ . Yalavuz' ati 'Muzovyumvish' amatwi yanyu mugabho ntimuzosobhanukigwa, kandimuzobhilebha n' amaso yanyu mugabho ntimuzobhimenya. ²⁷ Kukw' imitima ya bhano bhantu n' iminya-ntegenke, amatwi yabho ntiyumva neza,bhalahumilidje; kugila ntibhabhonesh' amaso yabho, kandi ntibhumvish' amatwi yabho kumwe n' imitima yabho kugila ntibhahave bhahindukila nkabhakiza.'' ²⁸ Nuko lelo ni mumenye yuko kuno kulokogwa kulavanywe muli mwebwe kandi kudjanywe mu bhanyamahanga, kuko bhazovyumviliza. (Menya:Uwu mulongo wa ²⁹ ngo '' Abhabwiye bhino bhintu, Abhayuda bhachiye bhavaho , bhagenda bhahalila hagati yabho '' ntiwowubhona mu nyandiko nyiza za kela.) ³⁰ Pawulo yabha munzu yiwe yo gupanga mu myaka yos' ibhili kandi yakiliye bhadya bhosi bhaza kuliwe ³¹ Yagum' abhabwil' ubhutumwa bw' Imana kandi yigish' amadjambho yelekey' Umwami Yesu Kiristo mu kwelula kwosi.Nta muntu yamubhudjidje.