¹ Maze Agilipa yishula Pawul' ati,'' Ulemelewe kwilegula,'' Maze Pawulo yagoloy' ukubhoko alilegul' avug'ati. ² Numva nezelewe mwami Agilipa , ku7ko ngila mvugili' imbhe yawe bhino bhilego vy' Abhayuda. ³ Chane kuko wew' ulumuhinga kuvyelekey' imigenzo y' Abhayuda n' ubhibhazo vyabho. Maze ndagusabha yuko wonyumviliza wihanganye. ⁴ Uko nikwo kuli, Abhayuda bhalamenya kungene nabhayeho mugihugu chanje guhela muli Yelusalemu nkil' umusole. ⁵ Bhalamenya neza kandi bhalemela yuko nal' umufalisayo, umugwi wihagalalako chanew mw' idini dyachu. ⁶ Ubhulelo mpagaze hano kugila nchiligwek' ulubhanza kubw' ukwo nategeledje nez' isezelan' Imana yahay' abhasogokulu. ⁷ Ili nidyo sezelano lilindiliwe n' imidyango yachu chumi n' ibhili kimbha bhazokomeza guseng' Imana ku mwete mw'idjolo no kumutaga. Ivyovyizigilo, mwami Agilipa nivyo bhano Bhayuda bhampola. ⁸ Kubhel'iki muli mwebwe mukenga yukw'il'igitangaza kw'Iman' izul' abhapfuye? ⁹ Halih' igihe lunaka nali nibhaza yuko nkola vyinshi kubw' idyo zina dya Yesu w' Inazaleti. ¹⁰ Ivyo nabhikolela muli Yelusalemu; nataye mwigeleza bhenshi mu bhizela ,abhakulu bh' abhahelezi nibho bhanshobhoza kubhikola; kandi na hadya bhaliko bhalichwa, ninjewe navyemeza. ¹¹ Kenshi nabhahanila mu masinagogi yabho nkabhategeka yuko bhihakana kwizela kwabho. Nalindabhafitiy' ishavu kandi nalabhilukanila mu bhihugu bhindi. ¹² Umus 'umwe mu kubhikola, nagiye hiyo muli Damasiko, nali nahaw' itegeko n' abhakulu bhabhahelezi. ¹³ nali mu muhalulo kumutaga, Mwami, nabhony' umucho watuluche mw'idjulu kandi walikaze chane kulut'izubha kandi walash'utuzunguluche njewe kumwe na bhadya bhagenzi twalihamwe ¹⁴ Twesi tumaze kugwa hasi numvishij'idjwi limvugisha mugihebhulayo ngo, Sawuli Sawuli ! Nikubheliki wew' ungilila nabhi ?Bhilagoye kuli wewe gutel'imigele kumahwa. ¹⁵ Maze ndasubhiz' ati, '' Ulinde mutwale,Umwami yanyishuy' ati,'' Njewe ndi Yes' uwulikw' ulagilila nabhi. ¹⁶ None haguluka kumagulu yawe; kubhel' iki nicho gituma ndakwiyeleche, nagutoye kugil' umbhel'umukozi n' ichabhona chabhidya bhintu vyosi umenyako kino gihe no kubhihe bhizoza; ¹⁷ kandi nzokulokola mu bhantu no mubhanyamahanga nzokulungikamwo, ¹⁸ uzohumul'amaso yabho no kubhavana mu mwidjima bhadja mu mucho kandi bhave mw' inkomezi za satani bhahindukilil' Imana; kugila bhashobhole kwakila ku Mana ku bhabhaligw' ivyaha kumwe n' umulagwqe nahaye bhadya nibhikiye mu kwizela kuli muli njewe.'' ¹⁹ None mwami Agilipa, sinashache kugabhatanya kuvyonelechwe kuva mw'idjulu, ²⁰ Aliko naheleye kuli bhadya bha Damasiko, hanyuma muli Yelusalemu no mubhihugu vy' Iyudaya no kubhantu bh' ayandi mahanga, nabhahamagalila kwihana no guhindukilil' Imana, kandi bhakola bhidya vyelekana ko bhihanye. ²¹ Ichonicho chatumy' Abhayuda bhamfatila mulusengelo, bhakagelageza kunyicha. ²² Kugez' uwu mubhagw' Imana yabhaye nanje nubhu mpagaze hano mbwilila bhadya bholoshe kumwe n' bhakomeye kulibhidya abhavugishwa kumwe na Mose bhavuze ko bhizobha nta kindi kintu; ²³ Kandi yuko Kilisit' azobhazwa nukw' azobha wa mbhele kuzuka mubha pfuye kumwe no kuvugl' umucho mu Bhayuda kumwe no mubha Nyamahanga. ²⁴ Pawulo amaze kwilegua Fesito yavuze n' idjwi linin' ati, '' Pawulo wewe ulasala ukwiga kwawe kwagutumy' usala.'' ²⁵ Alikwo Pawulo yishul' ati'', njewe sinsala nyakubhahwa Fesito, aliko ndabhabwil' amadjambho y'ukuli neluye. ²⁶ Kubhela wewe mwami bhino bhint' alabhimenya; kandi nichogituma nabhivuze niyumva neza, kuko menya yukw' atakintu nakimwe kinyegedjwe kuliwe kuyko bhino ntivyakolewe kuyle. ²⁷ None wobha wizey' abhavugishwa, mwami Agilipa? Ndamenya yuk' ubhizeye.'' ²⁸ Agilipa yasubhidje Pawul'ati, '' Ushaka gukolesh' umwanya mutoyi kumpindula ngo mbh'umukilisito?'' ²⁹ Pawul' avug'ati, ''Nosabh' Imana yuko habha mugihe gitoyi chankwe kilekele si wewe gusa, ahubwo na bhano bhavyumv' uno mubhagwa, bhamele nkanje, aliko bhatabhoshwe yino minyololo yo mwigeleza. ³⁰ Nih' umwami yahaguluche,n' umutwale na Bhalinike na bhadya bhali bhichaye ngaho, ³¹ bhavuye munyubhakwa bhalabhiganilako bhati ''uwu muntu s' uwo kwicha chankwe gufungwa.'' ³² Agilipa abwila Fesit' ati '' Iyo yabh' ata savye kugenda kwa Kayisali yalikwiliye kulekugwa.''