¹ Niho Fesito yinjila mwichogihe kandi munyuma y' imibhagw' itatu yavuye muli Kayisaliya maz' agela muli Yelusalemu. ² Umuhelezi mukulu kumwe n' Abhayuda bhakomeyew bhalamulega Pawulo kuli Fesito, kandi bhabhivugish' inkomezi mumaso ya Fesito. ³ Kandi bhasavye Fesito kubhagilila neza ku nkulu za Pawulo yuko yomuhamagala muli Yelusalemu kugila bhamwichile munzila. ⁴ Aliko Fesito yashubhidje yuko Pawulo yalibhohowe muli kayisaliya, kandi nawe nyene kw' ali hafi yogusubhilayo. ⁵ Alavug' ati, '' Kubw' ivyo lelo, bhadya bhabhishobhoye, bhaze tudjaneyo. kimbha halih' ikibhi kuliwe, bhikeneye yuko mumulege.'' ⁶ Yichayey' imibhagwa nka munani chankwe kuyilenga chumi, yasubhiye muli Kayisaliya.kumubhagwa wakulikiye yichaye kuntebhe yabhalamuzi maz' ategeka ko bhazana Pawulo ngaho. ⁷ Ashicheho,Abhayuda bho muli Yelusalemu bhahagalala ngaho, bhamulegako vyinshi bhadashobhoye gusobhanula. ⁸ Pawulo yitegul' avug'ati '' Sikw' izina dy' Abhayuda, si no kulusengelo, kandi sihedjulu ya Kayisali ntacho nachumuye.'' ⁹ Aliko Fesito yasahaka kwigila mwiza ku Bhayuda, maze yishula Pawul' ati ''mbhes' ushaka yuko wodj' iyelusalemu mbh' aliyo ndamulila bhino bhilego vyawe?'' ¹⁰ Pawulo yishul' ati, '' Mpagaze hano kuntebhe ya Kayisali kandi niho nkwiliye kulamuligwa. Sinachumuye kuBhayuda, kandi nawewe nyene ulabhimenya. ¹¹ Kimbha halicho nakoze chotuma pfa, sinanse gupfa. Aliko kimbha bhambheshela, ntawukwiliye kunshila mumabhoko yabho. Ndasabha ngende kwa Kayisali. ¹² Fesito yaganiliye na bhalamuzi maze yishul' ati, '' Usavye kwigizwa kwa Kayisaliu; uzodjanwa kwa Kayisali . ¹³ Mumibhagwa mikey' Umwami Agilipa kumwe na Bhalinike bhadja kugenzula vyemewe muli Kayisaliya kwa Fesito. ¹⁴ Bhabhayeho mugihe kinini, Fesito yabhabwiye kuvyelekey' ulubhanza gwa Pawulo abwil' umwami ati, '' Feliki yadusigiy' umuntu w' umupfungwa. ¹⁵ Igihe nalili muli Yelusalemu Abhahelezi bhakulu kumwe n' abhashinga ntahe bhazany' ibhilego vyiwe, bhasabha ko ndabhilamula. ¹⁶ Nabhasubhidje yuko bhitali mumigenzo y' Abhaloma kubhilamul' umuntu tumudendeledje, ahubwo yuk' uwalegwa naw' ahabwa kwitegula mumaso ya bhadya bhamulega kw' ivyo bhamulega. ¹⁷ Nuko lelo, bhamaze kuza hanoyi, sinashobhoye kulindila, aliko bhukeye nichaye ku ntebhe y' ubhulamuzi ntegeka yuko bhinjiz' uwo muntu. ¹⁸ Igihe bhahagalala bhamulega, nabhonye yukw' atabhilego bhinini bhamuvuzeko. ¹⁹ Ahubwo hali habhayeho guhalila kubhidjanye n' idini dyabho no kuvyelekeye Yesu yali yalapfuye, aliko Pawulo yameza yukw' akiliho. ²⁰ Nayobhewe n' ivyo bhintu ,maze ndamubhaza yuko no mudjana muli Yelusalemu kugila' alamuligweyo kubw' ivyo bhintu. ²¹ Aliko chagihe Pawulo yahamagagwa kugila abhohwe tulindiliy' ubhulamuzi bw' umwami, nategeche ko bhamugumya kugeza ndamudjanye kwa Kayisali. ²² Agilipa yavuganye na Fesito , ati '' Nanje nipfuza yuko nomwumviliza .'' Fesito yishul' ati ''Edj' uzomwumviliza.'' ²³ Nuko lelo bhukeye bwaho, Agilipa na Bhelinike bhalaza habhah' ulubhala lunini; bhagela munyubhakwa y' abhakulu bh' abhasilikale n' abhantu bhakomeye bho mu mudji. Fesito yatanz' itegeko yuko bhazana Pawulo. ²⁴ Fesito yavuz' ati, ''Mwami Agilipa n' abhantu bhosi bhali hano kumwe natwe; mulabhona yuno muntu; ulunani gw' Abhayuda bha Yelusalemu n' abhahano bhasavye yuko nobhahanula, maze bhatel' ugwamo ngo napfe. ²⁵ Nabhonye yuko atacho yakoze gikwiliy' ulupfu; aliko kubhela yasavy' umwami nanje nabhonye ndamuzane kwiwe. ²⁶ Aliko nta kintu mbhona gisobhanuche nokwandikil' umwami. Nicho gituma ndamukuzaniye wewe mwami Agilipa, kugila ndonk'icho nandika ku lubhanaza gwiwe. ²⁷ Kuko ntibhibheleye kudjan'imbhohe kand' atakilego kiyilebha.