¹ Munyuma yimibhagwa nk' itanu, umuhelezi mukulu Ananiya, bhamwe mubhashingantahe kumwe ni mvuzi yitwa Telutulo, bhadjayo. Bhazan' ibhilago vya Pawulo kumutwale. ² Pawul' amaze guhagalal' imbhele yuwo mutwale, Telutulo yabhanjidje kumwagiliz' avug'ati ''Amholo yodufise tuyakesha wewe,kand' iyelekwa dyawe lizan' itela mbhele mugihugu chachu; ³ nuko lelo tulashima muvy'udukolela vyosi, nyakubhahwa nyen'ichubhahilo Feliki. ⁴ Aliko sindakulushe chane, ndasavye kowotunga nkavugaho bhikeya. ⁵ Kuko twabhony' uyu muntu w' intumwa, kand' atum' Abhayuda bhosi kwa yinosi bhatagondwa. kandi niwe mukulu w' imigwi y' abhanazolayo. ⁶ Kandi yegelagedje guhumany' ulusengelo maze tulamufata. ⁷ Lisiyasi,umukulu, niwe yadje kubw' ubhubhasha bwiwe maz' alamushikula mu mabhoko yachu. ⁸ Niwabhaza Pawulo kuvyelekeye bhino bhintu, ulaza kwiga kuchadutumye tumulega. ⁹ Abhayuda nabho bhalega Pawulo, bhavuga bhati bhino bhivuzwe nikwo kuli. ¹⁰ Wamutwal' agolol' ukubhoko yeleka Pawulo ko yokwilegula, Pawulo yilegul' avug' ati '', Ndasobhanukiwe yuko wewe wabhay' umulamuzi walino hanga, kandi bhilanezeledje kubha ndiko ndisobhanul' imbhele yawe. ¹¹ Higililiza kand' uzobhona yukw' atamibhagwa chum' idachaho kuva nduz' Iyelusalemu gusenga. ¹² Kandi bhansanze mulusengelo, sinagwanye n' umwe mulibho kandi sinazany' ugwamo mubhantu, chankwe mw' isinagogi chankwe mu mudji, ¹³ Kandi bhabhanjidje ntibhoshobhola kwemel' ivyo bhalimwo bhalandega. ¹⁴ Alikwo muli vyose ndakwemelela, yuko muli ya nzila yo bhita ngo n' umugwi,ukwo nikwo nkolel' Imana y' abhakula-mbhele muliyo nzila . Njewe nd' umwizigigwa kumategeko kumwe nivyandichwe mu bhavugishwa. ¹⁵ Mfise kwa kwihagalalako ku mana nkuko nabho bhalindiliye kuza kwa kuzuka kw' abhapfuye bh' abhelanda n' abhagabhitanya; ¹⁶ Kandi lel' icho, nicho ngwanila kugila name muchiyumvilo chiza ch' umutima kugila simbhek' umgayo mu maso y' Imana no mumaso y' abhantu muli vyosi. ¹⁷ Hanyuma y' imyaka myishi nadje nzany' ivyo gufash' ihanga dyanje kumwe n' ingemu y' amahela. ¹⁸ Nkiliko ndabhikola, bhamwe mubhayuda bho muli Asya bhasanze mulusengelo ndiko ndakol' umusi mukulu wo kwiyeza, ntamugwi nalimfise chankw' ugwamo. ¹⁹ Bhano bhantu bhalingah' imbhele yawe nibhakubwil' ichodupfa kimbha bhagifise. ²⁰ Chankw' abhabhantu nyene nibhakubwil' ikosa dyanje bhambhonyeko haliy' imbhele y' umugwi w' Abhalamuzi bh' Abhayuda; ²¹ ahubwo kubw' ikintu kimwe navuze mw' idjwi linini chagihe nahagalala hagati yabho,'' Bhampola kuzuka kw' abhapfuye.'' ²² Maze Feliki kuko yali yaligishidjw' ivyiyo nzila yasezeley' ikolanilo. Maz' alabhabwil' ati '' Umusilikale mukulu Lisiya niyamanuk' ava muli Yelusalemu nzolamula bhino bhintu vyanyu.'' ²³ Maz' ataegek' umusilikale kulinda Pwulo, kandi bhamuh' umwidegemvyo kand' abahagenzi bhiwe ntibhabhuzwa kuza kumfasha kumwe nikumulebha . ²⁴ Mumibhagwa mikeya Feliki kumwe n' umugole wiwe Dulusila w' Umuyudakazi bhalaza, atumako Pawulo kugila yumve kuvy' ukwizela muli Kiristo Yesu. ²⁵ Aliko Pawulo mugihe bhalimwo bhalayaga kuvyo kugololka kwifata kumwe n' ulubhanza luzoza, Feliki yalatinye maz' alasubhiz' ati ''ubhunugende, aliko ninalonk' akadyo nzokwongela ndagutumeko.'' ²⁶ Icho gihe, yibwila yuko Pawulo yomuhong' amahela bhitum' amuhamagala kenshi bhalaganila. ²⁷ Aliko imyak'ibhil' imaze guchaho, Polukiyo Fesito nawe yabhay' umtwale mumwanya wa Feliki, aliko Feliki yaliyashache kwikundiliza ku Bhayuda, maz' asiga Pawulo mwibhohelo.