¹ Maze Pawulo abhihweza nez' abhalili ngaho bhosi mu bhulamuzi maz' alabhabwil' ati,'' Bhagenzi bhanje, nabhayeh' imbhele y' Imana mu mutima mwelanda kugez' uwumubhagwa.'' ² Maz' umuhelezi mukulu Ananiya yategeche bhadya bhamwegeleye yuko bhamukubhita kumunwa wiwe. ³ Maze Pawulo yishul' ati,'' Imana nay'izogukubhitisha w' uluhome lusizw' ichokaa. wichaye ngah' utegeka ko nkubhitwa mu bhudyo bhunyulanye n' amategeko?'' ⁴ Bhadya bhali bhamwegeleye bhalamubwila bhati, '' ukwo nikwo wishul' umuhelezi mukulu W ' Imana? '' ⁵ Pawul' alasubhiz' ati, '' Bhagenziwe sinalimenya yukw' aliwe muhelezio mukulu. kuko vyandichwe ngo ,'' ntuzovuge nabhi kumutwale wa bhantu bhawe.'' ⁶ Pawul' amaze kubhona yuko hagati mulibho halimw' Abhasadukayo kumwe n' Abhafalisay' alavugila hedjul' ati, '' Bhagenzi bhanje, njewe nd' Umufalisayo, mwene Falisayo. Nichogituma ndindiliye kuzuka kw' abhapfuye nicho bhanziza.'' ⁷ Amaze kubhivuga, habhaho kutumvikana hagati y'Abhafalisayo n' Abhasadukayo, maz' idyo kolanilo lichikamwo kabhili. ⁸ Kubhel' Abhasadukayo bhavuga yuko hataliho kuzuka, chankwe' abhamalayika kand' ata mpwemu zibhaho, alikw' Abhafalisayo bhemel' ivyo vyosi. ⁹ Habhah' ugwamo lunini maz' abhandichi bh' Abhafalisayo bhalahaguluka bhabhiganila, bhalavuga bhati '' Ntakibhi tubhona kw' uyu muntu. Ubwo ntiwosanga yabhonekewe ni Mpwemu chankwe Malayika. ¹⁰ Habhayeho kutumvikana chane wamukulu w' Abhasilikale yatangiye gutinya yuko bhohava bhasatagula Pawulo bhakamugabhana, maz' ategeka yukw' abhasilikale bhamanuka bhakamuvana hagati yabho, bhakamuzana mu nyubhakwa. ¹¹ Mw'idjolo dyakulikiyeh' Umwami yahagaze luhande gwiwe maz' alamubwil' ati '' Mutinye kukw' uzomvuganila muki Loma nkuko wamvugiye hano muli Yelusalemu. ¹² Bhukeye bhamwe mubhayuda bhakoz' indahilo y' umuvumo hedjulu yabho; bhemelanye yuko bhadashobhola kudya chankwe kunywa kugeza bhiche Pawulo. ¹³ Halih' abhagabho milongw'ine bhali bhagiy' iyo nama. ¹⁴ Bhalagenda kubhatwale n' abhahelezi bhakulu bhalabhabwila bhati, '' Twamaze kwishila mundahilo y' umuvumo yuko dutakola kumunwa tutishe Pawulo. ¹⁵ Nuko lelo nimusabh' umusilikale mukul' umubhazanile , mumele nka bhashaka kulamul' ulubhanza gwiwe. Twebwe twamaze kwitegula kumwich' atalashika hano.'' ¹⁶ Aliko mwishwa wa Pawulo yameny'ivyuwo mugambhi wabho, yinjila munyubhako maz' abhibwila Pawulo. ¹⁷ Pawulo yahamagay' umwe mubhakulu bh' umugwi w' abhasilikale maz' alamubwil' ati'' Djan'uwu musole kumusilikale mukulu; halih' ichoyipfuza kumubwila. ¹⁸ Maze wa mukulu w'umugwi w' abhasilikale yadjanye wa musole kumukulu w'abhasilikale maz'alamubwil'ati, ''wampfungwa Pawulo yandukany'uyumusole kwawe. Alafis'idjambho nawe. ¹⁹ Maze wamusilikale mukul' amufat'ukubhoko maz'amudjana kuluhande, alamubhaz'at'ushaka kuvug'iki?'' ²⁰ Wamusole yishul' ati,''Abhayuda bhemelanidje kugusabha yuko wozana Pawulo nkukw'edjo bhobhabhashaka kwongela kumwumviliza mu bhudyo bwiza. ²¹ Wewe ntuvyemele kubhel' abhantu milongw'ine bhaza kubha bhamwibhunze. Bhalahiye kumuvumo, kobhadakola kumunwa bhatamwishe. Nubhu bhaliteguye bhalinz'ichemezo chawe. ²² Maze wamukulu yamusavye ko yogend' amubwil'ati '' Ntihagil' uwumenya yuko twavuganye.'' ²³ Ategek' abhakulu bhabhili bh'imigwi y'abhasilikale maz'alabhabwila yuko bhategul' abhasilikal'amadjan'abhili bhagende muli Kayisaliya kumwe n'abhasilikale milongw'umushanju bhulil' ifalasi, n'abhand'amadjan'abhili bhafis'amachumu, muza kugenda mugichugu. ²⁴ Abhategeka gutegul'igikoko Pawul'azakwulila kugila bhamudjane kumutwale Feliki. ²⁵ Yandik'ugwandik'avug'ati, ²⁶ Njewe Kalawudiyo Lisiya kuli nyakubhahwa Felik' intasho. ²⁷ Uwu muntu yafashwe n'Abhayuda bhashaka kumwicha, maze njan' abhasilikale tulamukiza, nalimaze kumenya yukw'al' umuloma. ²⁸ Nashache kumeny' ichatumye bhamulega, maze ndamulungika mulamuzi bwabho. ²⁹ Nabhonye ko bhamuleze kubhidjanye n' amategeko yabho, kandi ntakosa dyotuma yichwa chankwe ngw' apfungwe. ³⁰ Maze kumenya yuk' halih' umugambhi bhamugiliye , nchiye ndamulungika kwawe ningoga kandi bhadya nabho bhamulega nategeche yuko bhazana kwaw' ibhilego vyabho. Gila maholo.'' ³¹ Maze bhabhasilikale bhubhaha dya tegeko bhadjana Pawulo muli Antipatili mw'idjolo. ³² Bhukey' abhasilikale bheshi bhachabhamulekela bhadya bhuluy'ifalasi kugila bhamudjane , nabho bhasubhila munyubhakwa ³³ Bhamwe muliyamafalasi bhageze muli Kayisaliya , gwagwandiko kumutwale bhamuheleza na Pawulo. ³⁴ Wamutwal' amaze gusoma gwa gwandiko yabhadjidje Pawul' igiche yatuluchemwo, amaze kumenya yukw' ava muli Kilikiya, ³⁵ Alavug' ati nzokumviliza bhadya bhakulega nibhamala gushika ategeka yuko bhamushila mungolo ya Helode.