¹ Ugwo gwamo luheze , Pawulo yahamagay'abhigishwa kand' amaze kubhahumuliza. Yalabhasezeyeho yelekeze muli Makedoniya. ² Naw' amaze gucha mw' ivyo bhicha kumwe no kubwil' abhizela vyinshi vyo kubhahumuliza, vyelekeza mubhugiliki. ³ Amaze kwichalayo mu mez' atatu bhamugiliy' umugambhi chagihe yashaka gufat' ulugendo yelekeza muli Shamu, nicho chatumy' ahitamwo guchila muli Makedoniya. ⁴ Abhadjanye nawe muli Asiya ni Sopatalo, umwana wa Piluho yatuluka muli Bheloya; Alusitaliko kumwe na Sekundo, bhamwe mubhatuluka mu bhizela bhomuli Thesalonike;Gayo wo muli Delube, Timotheyo, Tikiko na Tilofimu bho muli Asiya. ⁵ Abho bhali bhamaze kutwitangil' imbhele bhatulindiye muli Tolowa. ⁶ Twachiliye hagati mukiyaga dutuluka muli Filipi mu nyuma y' imikat' itambhiwe, munyuma y' imibhagw' itanu twabhasanze muli Tolowa. Twagumyeko mumibhagwa mushanju. ⁷ Kumubhagwa wa mbhele w' umwalamo, chagihe twali dukolaniye hamwe kubwo gusangila ku mukate, Pawulo yaganiliye n' abhizela. yagombha gufat' ulugendo bhukeye bwaho, hanyuma yakomedje kuvuga kugeza mugichugu ⁸ Hedjulu mulicho chumbha twalilimwo haliliy' amatala menshi. ⁹ Umusole yitwa Utiko yaliyichaye luhande y' idilisha, maz' alemelegwa n' itilo. Mugihe Pawulo yakomeza kuvugana nabho mugihe kilekile, uwo musole, yali yachumuye, yakolokeye has' atuluche kwigolofa dya gatatu bhaze kumutola yamaze gupfa. ¹⁰ Maze Pawul' alamanuka hasi, yigolola hadjulu yiwe, alamugumbhila. Maz' alabhabwil' ati,'' Ntimutinye kuko ni muzima''. ¹¹ Maze yongela kulila hedjulu mw' igolofa kand' amanyula kumukate,aladya. yakomedje kubhaganiliza kugela migitond' alabhasezela. ¹² Bhazana wa musol' alimuzima kandi bhosi bhalahumulizwa chane. ¹³ Twebwe twagiy' imbhele ya Pawulo mubwato duhagalala muli Aso, kuko twagombha guhitanayo Pawulo kandi niko nyene yali yabhigomvye kuko yashaka gucha kumusozi. ¹⁴ Ashicha muli Aso tulamwuliza maze tugenda muli Mitilene. ¹⁵ Maze tuvayo hiyo kandi kumubhagwa wa kabhili dushiche mukizinga chitwa Kiyo. kumubhagwa wakulikiyeho, twagiye mukizinga chitwa Samo, maze bhukeye dushika mumudji wa Mileto. ¹⁶ Kubhela yuko Pawulo yashaka gucha muli Efeso, ntiyashaka gutebhela muli Asiya, kuko yashaka gutbhuka kugela muli Yelusalemu kubw' umubhagwa wa Pentekositi, kimbha vyomushobhokela. ¹⁷ Ageze muli Mileto yatumyekw' abhakulu bh' ikanisa dya Efeso. ¹⁸ Bhashiche yalabhabwiy' ati'' mwebwe nyene mulamenya neza kungene guhela kuli wa mubhagwa wo nakandagila muli Asiya , uko nabhaye hagati yanyu mibhihe vyosi. ¹⁹ Wakoley' Imana mukwitonda n' amosozi, kumwe n' ibhigelagezo nabhonye bhituluka mu bhuyuda. ²⁰ Mulamenya kungen' atakintu chiza na naniwe kubhabwila, kungene nabhabwiye kumugalagalo kumwe no kugendela mu nzu kuyindi. ²¹ Mulamenya kungene nahanuy' Abhayuda kumwe n' Abhagilizi kuvyo kwihana ku Mana kumnwe no kwizel' umwami wachu Yesu. ²² None lelo, lebha, nubhashe Mpwemu Yela mukugenda muli Yelusalemu, simeny' ivyo nzohula navyo hiyo, ²³ aliko Mpwemu Yel' alanyeleka yuko mu midji yosi nzohula n' iminyololo kumwe ni mibhabhalo yukw' aliyo nzohula nayo . ²⁴ Aliko njewe sinigeze mbhona yukw' ubhuzima bwanj' al' ubwanje gusa, kugila mal' ulugendo kumwe n' igikogwa nahawe n' Umwami Yesu, kuvuganil' ubhutumwa bw' ubhuntu. ²⁵ Ubhulelo, lewbha, ndamenya yuko mwesi abho nabwiy' inkulu z'ubwami, ntimuzosubhila kumbhona. ²⁶ Nukwo lelo ndabhemeza kw' uno mubhagwa, yuko ntazobhazw'amalaso yumuntu n'umwe. ²⁷ Kuko sinaleche kubhamenyesh' ubhugombhe bw' Imana bwosi. ²⁸ Kubhel'ivyolelo mwebw'ubwanyu nimwilinde kumwe na wa mugwi mwahawe na Mpwemu yela ngo' muwulebhelele.Ni mwame maso mu kulagil' idyo kolanilo dy' Imana' alidyo yiguliye mumalaso yiwe nyene. ²⁹ Ndamenya neza yuko ninamala kuva hagati yany' imbwebwe zikaze zizokwinjila hagati mulimwebwe kandi ntibhazogilil' ikigongw'umugwi. ³⁰ Kandi no muli mwebwe bhamwe bhazoza bhavug' amadjambho mabhi, kugila bhakwega kweg'abhigishwa bhabhakulikile. ³¹ Nuko lelo ni mubhe maso. Mmenya yuko mumyak' tatu sinaleche kubhigisha bhul'untu kum mw'idjolo no kumuta. ³² Ubhulelo ndabhashize mu mabhoko y'Imana, no mw'idjambho dy'ubhuntu bw'Imana, kuko nidyo lishobhola kubhubhaka no kubhaha wa mulagwe kumwe n'abhizeye bhatolanidjwe kubw' Imana. ³³ Sinipfudjidj'amahela, Inzahabhu, chank'imyambhalo. ³⁴ Mwebwe mukimenya neza yukw'aya mabholo yanje yakoze kubw'ivyo nkeneye kumwe na bhadya kumwe nanje. ³⁵ Muli vyosi nabhahay' ulugelo gwo kungene mukwiliye gufasha bhadya bhatishobhoye mukol'ibhikogwa, kandi mukwiliye kwibhuka ya madjambho y'UmwamiYesu,yayandi yavuz'ati '' Gutanga kuzan'umugisha kuluta kwakela'' ³⁶ Amaze kuvug' ivyo, yalapfukamye maz' alasenga hamwe nabho. ³⁷ Bhosi bhalalila chane kandi bhamugwa mwizosi bhalamusomagula. ³⁸ Bhala bhabhala chane kubhela kidya yabhabwiye ngo, ntibhazo subhila kubhon' amaso yiwe kandi maze bhalamuhelekeza bhamugeza kubwato.