¹ Chagihe twali tumaze gusezelana nabho tguliko tulagenda mukuyaga tugela mumujdji wa Kosi, bhukeye tugela mu mudji wa Lodo, maze tuvayo tugela mumudji wa Patila. ² Tumaze kubhon' ubwato tudjabhukila muli Foyinike, twaluliye tulagenda. ³ Tugeze mukizinga cha Kipulo, tuhasiga mu luhande gw' ibhumoso, tulagenda tugela muli Siliya , duhagalala mumudji wa Tilo, kuko nih' ubwato bwali bhukwiliye kwululuch' ivyo bwali bwikoleye. ⁴ Amaze kubhon'abhigisha,tugumayo mu mibhagwa mushanju.Abho bhigishwa bhabwila Pawulo muli Mpwemu yukw' adakwiliye kudja muli Yelusalemu. ⁵ Tumaz' iyo mibhagwa, tuvayo maze tulagenda.Abho bhaladuhelekeza kugeza tuvuye mumudji.Maze twesi dupfukama ku nkombhe, tulasenga dusezelana nabho bhiul' umwe. ⁶ Twulil' ubwato, nabho bhasubhila muhila kwabho. ⁷ Tumaz' ulugendo gwachu kuvatilo, gusohola muli Tolemayi. Twalahagazeho tulamuch' abhavukanyi, tugumana nabho kumubhagawa wosi. ⁸ Bhukeye twalavuyeyo tudja muli Kayisaliya. Maze twinjila munzu ya Filipo , umuvuga bhutumwa bwiza, uwo yal'umwe muli bhadya mushanju, maze tubhana nawe. ⁹ Uwo yalifise abhakobwa bhane bh'inkumi kandi bhalavugishwa. ¹⁰ Tubhaye twichayeyo mumibhagwa lunaka,umuvugishw' umwe yitwa Agabho yululuch' ava mu Bhuyuda. ¹¹ Ashiche yatoy' umukanda wa Pawulo. Alawihambhila maz'avug'ati, ''Mpwemu Yel' alavug'ati '' Abhayuda bho muli Yelusalemu bhazobhoha bhenuwu mukanda, kandi bhazomushila mu mabhoko y'abhanyamahanga. ¹² Tuamaze kwumv' ayo madjambho, twebwe kumwe nabhali ngaho twingize Pawulo kugila ntaduge muli Yelusalemu. ¹³ Niho Pawulo yishuy' ati '' mulimwo mulakol' iki, mulimwo mulalila kugila munch' ivutu mu~mutima? Njwe nditeguye, si kubwo kubhohwa gusa, ahubwo nogupfila muli Yelusalemu kubw' izina dy' Umwami Yesu. ¹⁴ Kubhela Pawulo yase kutwemelela, twalamwiholeye maze tulaviuga duti '' Ubhugombhe bw' Imana ni bhubhe''. ¹⁵ Munyuma yiyo mubhagwa, twalatoy' imigugu yachu maze tuduga muli Yelusalemu. ¹⁶ Bhamwe mubhigishwa bho muli Kayisaliya bhaladukulikiye kandi bhazana n' umuntu yitw' Umunasoni wo muli Kipulo, umwigishwa wa Kela , maze tugumana nawe. ¹⁷ Tugeze muli Yelusalemu, abhavukanyi bhatwakiliy' igishika chinshi. ¹⁸ Bhukeye bwaho Pawulo yadjanye natwe hiyo kwa Yakobho, kand' abhashinga ntahe bhalilingaho. ¹⁹ Bhamaze kubhalamucha , yabhabwiy' ib hintu vyosi Imana yamukoleshedje mu bhanyamahanga. ²⁰ Bhamaze kumva bhashemagiz' Imana bhalamubwila bhati '' Ulabhona mwene Data bhino bhihumbhi vy' abhantu bhizeye mu bhayuda. Abho bhosi bhalihatila gufat' amategeko. ²¹ Bhalabwiwe kubhi kulebha, yuko wigisha' Abhayuda bhali mu bhanyamahanga na Mose kandi yuk' ubhabwila ngo ntibhasilimul' abhana bhabho, kandi ngo ntibhakulikiz' imigenzo yakela. ²² None tulakola gute? ko munyuma bhaza kumenya yuko wadje. ²³ Nuko lelo kola kidya tugutegeka;Hano tulafis' abhantu bhane bhafis' amasezelano. ²⁴ Djana nabho kandi wizeye nabho, kandi wewe ubhalihile bhidya bhibhalebha, kugila bhadshobhole kwimwesh' imitwe yabho.Kugila bhul'umuntu amenye yuko bhidya bhabwiwe kobhikulebha al' ubhubheshi. Bhazomenya ytuko nawe nyene witondel' amategeko. ²⁵ Aliko kuvyelekey' abhanyamahanga bhazeye , twalabhisobhanuye mu gwandiko tubhategeka yuko bhakwiliye kwilinda na bhidya vyatangiw' isadaka dy' ibhishushanyo kumwe n' amalaso, n' imivyimbha, kandi ko bho kwilind' ubhushakanyi. ²⁶ Maze Pawulo yadjanyebhabhagabho, kumubhagwa wa kabhili, aliyeza kumwe nabho tyinjila mulusengelo, abhabwil' igihe kwiyeza bhizomala kugeza bhatanze bhul'umunt' isadaka yiwe. ²⁷ Iyo mibhagwa mushanju ili muguhela, bhamwe mubha yuda bho muli Asya, bha bhonye Pawulo mulusengelo, bhagumul' abhantu bhalamufata. ²⁸ Bhavuz' ugwamo ngo '' Yemwe Bhayisilayeli ni mudufashe uwu niwa muntu yigisha hosi bhidya bhitadjanye nivyachu, amategeko kumwe na hano hantu. Kandi yazany' abhigiliki hano mulusengelo kugila bhahahumanye. ²⁹ Kubhela bhali bhabhonye Tulofimu wo muli Efeso bhalikumwe mu mudji maze bhibwila yuko Pawulo yamuzanye mulusengelo. ³⁰ Umudji wosi wuzuy' ugwamo, ulusengelo, kandi bhugal' imudyango. ³¹ Bhakigelageza kumwich' amakulu yashiche kumukulu w' abhalinzi yuko Yelusalemu wosi huzuy' ugwamo. ³² Maz' afat' abhasilikale n' umukulu wabho bhiluka hagati y' abhantu. Abhantu bhamubhonye kumwe n'abhasilikale bhacha bhaleka gukubhita Pawulo. ³³ Uwo mukuluw' abhasilikale yalegeleye maz' afata Pawulo, kandi yategeche yuko bhamubhohesh' iminyolol' ibhili,amubhaz' uwaliwe nicho yakoze. ³⁴ Ikolanilo dyali dyasaze bhul'umuntu yavug' ivyiwe, kubhela wa mukulu wa bhasilikale yananiwe kumeny' ichabhaye kubw' ugwo gwamo yategeche yuko bha bhona Pawulo bhakamudjana mu nyubhakwa y' ubhulamuzi. ³⁵ Ageze kungazi yateluwe n' abhasilikale kubhel' ugwamo gwalili ngaho . ³⁶ Kubhel' abhantu bhenshi bhalamukulikiye kandi bhagasemelela ngo '' Nimumwiche'' ³⁷ Pawulo yegeledje kw' iyo nyu bhako yabwiy' umukulu w' abhasilikal' ati '' Nokubwil'ikintu?'' wa mukulu alamubhaz' ati '' Woshobhola kuvug'ikigiliki? ³⁸ Wewe bhudya ntuli wa mumisili w' intagondwa yazan' ugwamo hagati yi bhihumbhi vya bhantu mubhugalagwa? ³⁹ Pawulo yishul' ati '' Njewe ndumuyuda wo muli Taluso yomuli Kilikiya ntuluka mumudji wemewe chane. Nimunyemelele mvugane n' abhantu.'' ⁴⁰ Uwo musilikal' abhimwemeleye, Pawulo yahagaze hedjulu kungazi maz' abhamanikil' ukubhoko kwiwe. bhamaze kunuma, abhabwila mugihebhulay' ati,