¹ Hanyuma yivyo bhintu Pawulo yavuye muli Atene maz' agenda Muli Kolinto. ² Hiyo yahuliyeyo n' umuyuda yitwa Akwila umuvukila wo muli Ponto, yalikumwe n' umugole wiwe yitwa Pulisila bhali bhaje bhatuluka muli Italiya kubhela Kilaudiya yali yasizeh' itegeko ngw' Abhayuda bhosi bhave muli Roma. Pawulo naw' ach' aja kwabho; ³ Pawulo yabhanye nabho kubhela bhakol' umulimo wo gushon' amahema nk' udya naw' akola. ⁴ Bhulu mubhagwa w' isabhato Pawulo yalahalila nabho, yagelageza kwemez' abhayuda kumwe n' abhagiliki. ⁵ Aliko Sila na Timoteyo mbhamaze kuza Pawulo yasunichwe na Mpwemu kubwil' abhayuda yuko Yes' aliwe Kirisito. ⁶ Abhayuda bhamaze kumugwanya Pawulo yakuy' umwambhalo wiw' im bhele yabh' alabhabwil' ati ''Amalaso yanyu n' ahalugwe ku mitwe yanyu mwebwe;njewe nta chaha mfise.Guhel' ubhu no mubhindi bhihe, nzogenda mu bhanyamahanga''. ⁷ Ubwo yachiy' avaho maz' agenda mulugo gwa Tito mwene Yusito umuntu yaseng' Imana. Inzu yiwe yali hafi yi sinagogi. ⁸ Kilispo wa mutegechi w' isinagogi hamwe n' abhantu bho muhila kwiwe bhemel' Imana hamwe n' abhantu bheshi bho muli Kolinto bhamaze kumviliza Pawul' alikw' alavuga bhachiye bhizela kandi bhacha bhalabhatizwa. ⁹ Iman' ibwila Pawulo mu ndoto ilamubwil' iti ''Ntutinye Pawulo, aliko vuga kandi ntutinye. ¹⁰ Kuko njewe ndihamwe nawe kandi ntibhashobhola kugelageza kugukolako kubhela njewe mfis' abhantu bheshi m' uluyu mudji ¹¹ Pawul' ach' agumayo mugihe ch' umwak' umwe n' amezi mukaga yigish' idjambho dy' Imana hagati yabho. ¹² Aliko Galiy' amaze gushigwa kubhutegechi bwo muli Akaya , Abhayuda bhalumvikanye maze bhagwanya Pawulo , bhalamufata bhamutwal' imbhele y' igitebhe ch' ubhulamuzi, ¹³ bhalavuga bhat' ''Uyu muntu yohedj' abhantu guseng' Imana mu bhudyo bhutadjanye n' imigenzo yachu'' ¹⁴ Mugihe Pawulo yashaka kuvuga ,Galiyo yabwiy' abhayud' ati ''Mwebw' Abhayuda, iyo bhabha bhachumuye chankwe bhononye, mwali kubha mwemelewe kubhahana. ¹⁵ Aliko kubhel' al 'ibhintu bhidjanye n' amazina kumwe n' amadjambho kumwe n' imigenzo yanyu nuko lelo ni mubh' alimwe mubhilamula.Njewe si nshaka kubh' umulamuzi mu bhintu vyanyu.'' ¹⁶ Galiyo yachiy' abhategeka bhav' imbhele y' igitebhe ch' ubhulamuzi. ¹⁷ Maze bhafata Sositenesi, umukulu wo mw' isinagogi, bhamukubhitil' imbhele 'intebhe y' ubhulamuzi. Aliko Galiyo ntiyitaye kuvyo bhaliko bhalakola. ¹⁸ Pawulo, amaze kwichalayo mu gihe kinini,yasizey' abhavukanyi maze yulila mu meli bhadja muli Siliya kumwe na Pulisila bhe na Akwila.Atalava ngaho ku nkombhe yabhanjidje kwimwesh' umushachi kuko yali yasezelanye kubh' umunazili. ¹⁹ Bhageze muli Efeso, Pawulo yasizeyo Pulisila na Akwila , aliko wewe yinjila mw' isinagogi maz' aganila kumwe n' Abhayuda. ²⁰ Bhamusavye yuko yokwichala nabho mugihe kinini, aliko wewe ntiyemeye. ²¹ Aliko wewe yavuye kwabho ,kand' alabhabwil' ati ''Nzokwongela ngaluke kwanyu, Imana ni yabhigombha '' hanyuma yaho yachiye yulila mu meli maz' ach' ava muli Efeso. ²² Pawulo yasohoye muli Kayisaliya yachiy' alengela kulamuch' ikanisa dya Yelusalemu hanyum' achamanuk' adja Antiyokiya. ²³ Amaz' igihe gitoyi , Pawulo yachiy' agenda guchila magana Galatiya hamwe n' Ifiligiya kulemesh' imitima y' abhigishwa bhosi. ²⁴ Umuyahud' umwe yitwa Apolo yal' umuvukila wo muli Alekizandeliya yaladje muli Efeso yal' umunt' azi kuvuga neza kandi yalifis' ubhumenyi muvyandichwe. ²⁵ Apolo yali yaligishidjw' amadjambho y' Imana kuko yalifis' umwete mu mutima wiwe , yalavuze kand' aligish' inkulu z' ivya Yesu , aliko yalimeny' ubhubhatizo wa Yohana gusa. ²⁶ Apolo yahagaze mw' ikanisa abhanza kuvuga mukwiyemela chane . aliko Pulisila na Akwila bhamaze kumwumva bhachiye bhagil' ubhugenzi nawe kandi bhacha bhamwigish' inkulu z' ukwizela . ²⁷ Mugihe yipfuza kugenda mul' Akaya maz' abhagenzi bhalamulemesh' agatima bhacha bhamwandikil' ibhaluwa ngw' abhitwalil' abhigishwa bhalihiyo muli Akaya kugila ngo bhamwakil' .Amaze gushikayo kubhuntu bw' Imana yalafashidje chane bhady' abhantu bhali bhizeye . ²⁸ kubhushobhozi bwiwe n' ubhumeny' Apolo yalabhachinze kumugalagalo maz' abheleka kubhintu vyandichwe yuko Yes' aliwe Kilisto