¹ Maze Pawulo yadje muli Delubhe na Lisitila; kandi haliy' umwigishwa yitwa Timoteyo , yal' umusole yavyawe n' umuyuda kazi yizeye mugabho se wiwe yal' umugiliki. ² Abhantu bho muli Lisitila na Ikoniyo bhamuvuga neza. ³ Pawulo yamusavye kudjana nawe mu luganda , maz' alamudjana alamukebha kubhela bhadya bhayuda bhali ngaho, kuko bhali bhamenya yuko se wiwe yal' umugiliki. ⁴ Bhaliko bhalagenda hagati mu mudji bhalegech' amakanisa gukulikiza ya mategeko yandikwa n' intumwa kumwe n' abhakulu bh' iyelusalemu. ⁵ Maz' amakanisa bhalayakomeza mul' ukwo kwizela kand' abhizela bhalagwila ku gihalulo bhul' umubhagwa. ⁶ Pawulo na bhagenzi bhiwe bhelekeza muli Filigiya no muli Galatiya kuko Mpwemu w' Imana ntiyabhemeleye kuvug' ubhutumwa muli Asiya. ⁷ Bhageze muli Misiya bhagelageza kudja muli Bhitimu, aliko Mpwemu wa Yesu yala bhabhudjidje. ⁸ Maze bhacha hagati ya misiya bhalaza bhagela mu mujdi wa Tulowa . ⁹ Pawulo yelekwa mwidjolo, halih' umuntu wo muli Makedoniya yalihagaz' umuhamagal' ati '' Nimuze hano Makedoniya mudufashe'' ¹⁰ Pawul' amaze kwelekwa ducha tulitegula twelekeza muli Makedoniya, yamenye neza yukw' Imana yalikw' ilamuhamagala kubhabwil' ubhutumwa bwiza. ¹¹ Tuva muli Tolowa twelekeza muli Samoti lake, kandi kumubhagwa wakulikiyeho dushika muli Niyapoli. ¹² Tuvuye ngaho twinjila muli Filipi wal' umwe mu miji ya Makedoniya, wali mugiche chu bhashwe chane kubw' ubhutegechi bw' Abhaloma, tugumayo mugihe lunaka. ¹³ ku mubhagwa w ' Isabhato twagiye ku nkombhe y' uluzi kuko twibwiye yuko twolonkay' ahantu ho gusengela . Ngaho twavugana n' abhagole bhali bhalaho. ¹⁴ Umugole yitwa Lidiya, yaguz' izambhalawu wo mu muji wa Tiyatila, yaseng' Imana , yalatwumvilidje Imana yali yuguluy' umutima wiwe maze yumviliza nez' amadjambho ya Pawulo. ¹⁵ Amaze kubhatizwa kumwe nabho munzu yiwe yadusavy' avug' ati kimbha mwobha mubhona yuko nizigiwe ni mwinjile kwanje mubheho '' Alatugobhela chane. ¹⁶ Tulimwo tulagend' ahantu hogusengela umukobw' umwe yalifis' idaimoni dy' ubhumenyi, maze tulahula nawe. Yali yalatungishidje bhashebhuja kubwo kuvug' ibhizobha. ¹⁷ Uwo mugole yaladukulikiye kumwe na Pawulo, yalatel' ugwam' akavug' ati '' Abha bhagabho n' abhakozi bh' Imana nkulu, kandi bha~bhabw' ilivyo kulokoka'' ¹⁸ Yakoze gutyo mu mibhagwa myishi maze Pawulo bhilamushavuza, naw' alahindukil' abwila dya dayimon' ati '' Ndagutegeche n' umuvemwo mw' izina dya Yesu''. Nadyo dyachiye limuvamw' ubwo nyene. ¹⁹ Bhashebhuja bhiwe bhabhonye yukw' ivyizigilo vyabho vyo kwunguka bhivanyweho, bhachiye bhafata Pawulo na Sila bhalabha bhulula mwi soko bhabhadjana kubhatwale. ²⁰ Bhabhagedjedje kubhacha manza bhalavuga bhati '' Bhano bhagabho n' abhayuda kandi bhatez' ugwamo mu mudji wachu. ²¹ Kandi bhagenda bhigish' ibhintu bhida huye n' imigenzo yachu twakiliye tugakulikiza nk' abhaloma'' ²² Ikolanilo lihinduka Pawulo na Sila , kand' abhachamanza bhatabhagul' impuzu zabho, bhabhambhik' ubhusa kumwe no gutegeka yuko bhakubhitw' inkoni. ²³ Bhamaze kubhatonagula chane bhacha bhabhatelela mwibhohelo, bhategek' umulinzi w' ibhohelo kubhalebha neza. ²⁴ Amaze kwakil' idyo tegeko wa mulinzi yabhateleye muchumbha ch' imbhele mw' ibhohelo kandi yongelakw' alabhabhoh' amagulu yabho. ²⁵ Mugichugu Pawulo na Sila bhaliko bhalasenga kandi bhalilimbh' indilimbho zo guhimbhaz'Imana, kand' abhandi bhapfumgwa bhalabhumviliza. ²⁶ Ubwo nyene habhaho guhinda kw'isi, maz' imisingi yidyo bhohelo nay' ilanyiganyiga,imidyango yidyo gelez' iluguluka kand' iminyololo y' imbhohe nay' ila deguka. ²⁷ Uwo mulinzi w' ibhohelo yavuye mw' itilo maz' abhona yukw' imidyango yosi yuguluye , maz' afat' inkota ngo yichumite kuko yibhajije yukw' imbhohe zosi zatoloche. ²⁸ Maze Pawul' alasemelela chan' amubwil' ati '' Leka kwigilila nabhi kuko twesi tuli hano''. ²⁹ Uwo mulinzi maze yategeche yuko bhazan' itala maz' atalukila mw' ibhohelo ni ngoga, alagugumwa kumwe no gutinya maz' agwa kubhilenge vya Pawulo na Sila, ³⁰ Maz' abhajana hanz' alabhabhaz' ati ''Bhanyakubhahwa nkwiliye gukol' iki kugila ndokogwe?'' ³¹ Nabho bhalamusubhiza bhati '' niwizel' Umwami Yesu naw' ulalokogwa kumwe nabho munzu yawe'' ³² Maze bhalamubwil' ubhutumwa kumwe nabho munzu yiwe, ³³ Maz' uwo mulinzi w' idyo bhohelo yabhajanye mw' idyo djolo maz' alabhoz' ibhikomele vyabho, kandi hamwe nabho munzu yiwe bhosi bhalabhatizwa. ³⁴ Ajana Pawulo na Sila muhila 'kwiwe maz' alabhagabhulila. Maz' anezelanwa nabho munzu yiwe kuko bhamaze kwizel' Imana. ³⁵ Hageze kumutaga , abhachamanza bhatumako wa mulinzi bhati '' Lekula bhabhantu bhagende ''. ³⁶ Wa mulinzi abwila Pawu' ayo madjambho yukw' abhachamanza bhatumyeko yuko ndabhalekula mukagenda, nuko lelo ni musohoke mwitahil' amaholo''. ³⁷ Aliko Pawul' alabhabwil' ati '' bhadukubhitiy' ahagala~gala kandi twebwe tul' Abhaloma , kandi bhaduteleye mwibhohelo bhadatuchiliy' ulubhanza, none ngo bhashaka kutuvanamwo mwibhanga ? Oya ntivyoshobhpoka , nibhaze bhonyene bhatuvanemwo'' ³⁸ Abhalinzi bhabwil' abhachamanza kulivyo bhavuze , abhachamanza bhalatinya chane bhamaze kumenya yuko Pawulo na Sila al' abhaloma . ³⁹ Abhachamanza bhalaza bhalabhinginga ngo bhagende, kandi bhamaze gusohoka bhasabha , Pawulo na Sila yuko bhoja hanze y' umuji wabho. ⁴⁰ Maze Pawulo na Sila bhavayo hanze y' ibhohelo bhagenda muhila kwa Lidiya . Pawulo na Sila bhabhony' abhene data bhalabhumuliza mu mutima maze bhalava mw' uno muji.