¹ Abhantu lunaka bhadje bhava mu Bhuyuda bhigish' abhizeye bhati nimutakebwa nkuko bhabhigenza muvyategechwe vya Musa ntimwoshobhola kulokoka . ² Ibhi vyalazanye intambhala nivyichalo bhinini muluhande gwa Pawulo bhe na Bhalinabha hamwe nabho bhene Data bhachiye bhemelela yuko Pawulo , Bhalinabha nabhandi bhache bhagend' Iyelusalemu kubhonana n' Intumwa hamwe nabhashingantahe kubhel'idyo djambho. ³ Bhamaze kulungikwa n' ikanisa bhachiliye muli Foyinike na Samaliya bhabhabwila' ivyoguhinduka abhanyamahanga maze bhazan' umunezelo munini kubhantu bhosi . ⁴ Bhamaze kuz' Iyelusalemu bhakiligwa n' Ikanisa , Intumwa hamwe nabhashingantahe , maze bhabhabwil' ibhintu vyosi Imana yakolanye hamwe nabho. ⁵ Abhantu lunaka mubhizey' abho bhali mumugwi w' Abhafalisayo bhalahagaze bhavuga bhati ningombwa tubhakebhe nokubhabwila yuko bhakulikiz' isezelano dya Mose. ⁶ Hanyum' intumwa n' abhashingantahe bhichala hamwe kubwo kwiyumvil' ivyo bhintu. ⁷ Bhamaze kuvugana kwili djambho kumwanya munini Petelo yalahaguluche maz' alabhabwil' ati ,''Bhene Data mulazi yukw' Imana yantolanidje hagati yanyu kugila kumunwa wanj' amahanga yakil' ubhutumwa hamwe no kwizela . ⁸ Iman' imeny' imitima niy' ivugila mulibho kandi yabhahaye Mpwemu yela nkuko natwe yatugiliye. ⁹ Kandi ntiyelechwe gutandukanya hagati yachu nabho.Yabhedjedj' imitima yabho kubwo kwizela nkuko natwe yatugiliye. ¹⁰ Kubhel' iki mugelagez' Imana kandi mugashil' ibhinaniza kumazosi ya bhigishwa kandi yabha twebwe na bhasokulu tutawushobhoye kuwikolela. ¹¹ Aliko twizigiye yuko tuzolokogwa kubhuntu bw' Imana bw' Umwami Yesu nkuko bhimeze kulibho.'' ¹² Ikolanililo dyosi dyalanumye bhalimwo bhalamwumviliza Bhalnabha na Pawul' ahobhalimwo bhalatang' inkulu hedjulu yibhimenyecho nibhitangaza vy' Imana yakonye nabho mu bhanyamahanga. ¹³ Bhamaze kuvuga Yakobho yalavuz' ati ,Bhene Data nimwuyumvilize. ¹⁴ Simoni yavuze a kungene mu bhunt' Imana kwuvyiza yafashidj' ibhihugu kugilango yilonkele mulibh' abhantu kubw' izina dyayo. ¹⁵ Amadjambho yabhavugishwa yemelana nadyo nkuko vyandichwe. ¹⁶ Ngo: ''Hanyuma yibhi vyosi nzogaluka kwubhak' ihema dya Dawudi dyasenyukiye hasi nzolivyula kandi nsubhilemw' ubwononekale bwadyo. ¹⁷ kugil' abhasigaye bhahig' Imana kumwe n' abhantu bh' abhanyama-hanga bhahamagawe mw' izina dyanje ¹⁸ Ukunikw' Iman' ivuga yo yatumye vyosi bhimenyekana kuva kela . ¹⁹ Ngaho lelo,uku nikwo ndabhahanuye,ntidushil' amananiza kubhantu bh' abhanyamahanga bhahindukili' Imana, ²⁰ Aliko tubhandikile yuko bhokwilind' ibhigigwa mana, ukwipfuz' ubhushakanyi, imivyimbha kumwe n' ubhuseli. ²¹ Guhela mu gihe ch' abhakula-mbhele Mose yalifis' abhavug' ivyiwe mu masinagogi bhul' isabhato. ²² Maze lelo bhidyohela za ntumwa kumwe na bhashingantahe, kumwe n' ikanisa dyosi, bhatolanya Yuda yataziligwa Bhalisabha, kumwe na Sila bhomubhakulu bh' ikanisa, bhabhalungika kugila bhadjane na Pawulo na Bhalinabha muli Antiyokiya. ²³ Bhabhandikiye guti'' Twebw'intumwa kumwe nabhashingantahe kubhavukanyi bhachu bhabhanyamahanga bhali muli Antiyokiya, Shamu kumwe na Kilikiya, tulabhatasha. ²⁴ Twabwiwe kungen' abhantu tutalungiche, bhavuga kwachu kandi bhakabhagola kubw' inyigisho zibhabhaza mumitima yanyu. ²⁵ Nichogituma duhizemwo gutolanya bhamwe nokubhabhalungikila kumwe n' abhakunzi bhachu Bhalinabha kumwe na Pawulo, ²⁶ Abho bhamenye guhebh' amagala yabho kubhel' izina dy' Umwami Yesu Kiristo. ²⁷ Nichogituma tulungiche Yuda kumwe na Sila bhazobhabwila vyosi. ²⁸ Kuko vyanezeleye Mpwemu Yela kandi natwe, yuko tulobhikolez' umugugu munini kileche bhino vya nkenegwa. ²⁹ Yuko muhindula mukava mubhintu bhitangwa kubwibhishushanyo , ubhuseli, intumbhi kumwe n'ubhushakanyi ivyonimwavyitondela bhizobha vyiza. msigale neza'' ³⁰ Bhamaze gutandukana, bhamanukila muli Antiyokiya; bhamaze guhamagaz' ikolanilo hamwe, bhabhahaye gwagwandiko. ³¹ Bhamaze kulisoma vyalabhanezeledje chane kuko bhahumulidjwe. ³² Yuda Sila kumwe n' abhavugishwa bhalahumulidj' abhobhavukanyi mu madjambho menshi azan' inkomezi. ³³ Bhabhayeyo mugihe lunaka maze bhalabhalekula bhasezelana n' abhavukanyi bhasubhila kubhabhatumye. ³⁴ [Alikovyabhonekanye yukw' alivyiza kuli Sila gusigalayo] ³⁵ Aliko Pawulo kumwe nabhandi bhagumye muli Antiyokiya, naho bhaligisha no kuvug' idjambho dy' Imana. ³⁶ Mumibhagwa lunaka Pawulo yabwiye Bhalinabha guti'' Dusubhile gutembhelel' abhizela muli bhul' umudji twavuze mw' idjambho dy' Umwami, tumenye kungene bhamelewe.'' ³⁷ Bhalinabha yakeney' uko bhodjana na Yohana wo bhita Maliko. ³⁸ Aliko Pawulo yiyumviliye yuko bhitabheleye kudjana na Maliko, kuko yabahataye muli Pamufiliya maz' abhatan'igikogwa. ³⁹ Hamaze kubhaho guhalila chane mulibho bhalatandukanye, Bhalunabha yadjanye na Maliko bhafat'ubwato bhudja muli Kipulo. ⁴⁰ Aliko Pawulo yatolanidje Sila bhalagenda, bhalibhamaze gusengegwa n'abhizela mubhuntu bw' Imana. ⁴¹ Bhalagenda bhachila muli Shamu, na Kilikiya bhakomez'amakanisa.