¹ Zidya ntumwa kumwe n' abhene Data bhali mu bhu Yuda bhabwiwe yukw' abhanyamahanga bhakiliy' idjambho dy' Imana. ² Petel' amaze kuza muli Yelusalemu, wa mugwi wa bhadya bhakebwe bhabhanza kumunegula, bhavuga bhati, ³ '' Wewe wifatanije nabhadya bhadakebwa kandi wemela kudya hamwe nabho.'' ⁴ Aliko Petelo yabhanjidje kubhibhabwila kuva mumizi yavyo, alabhabwil' ati ⁵ ''Naliko ndasenga haliya mu mudji wa Yafa, maze mbhon' inzozi z' ikintu kinini kimanuka kumpande zacho zine gituluka mw' idjulu. kiza kuli njewe. ⁶ Nalalavy' icho kintu ndachiyumvilako. mbhona kw' ibhikoko vy' amagul' ane bhibha kwa yinosi, kumwe n' ibhikoko vyo mw' ishambha bhe na bhidya vyikwega kubhutaka n' inyoni zo mukilele ⁷ Maze numv' idjwi li mpamagala limbwila liti '' Petelo vyuk' ubhage kand' udye!'' ⁸ Ndasubhiza nti '' Oya kweli mwami wanje mukanwa kanje ntihigeze hajamw' ikintu chochosi gihumanye chankwe chanduye'' ⁹ Aliko dyadjwi lilongela dyishula liva mw' idjulu liti '' kidya chogedjwe n' Imana ntuzovuge yuko gihumanye. ¹⁰ ivyo vyakozwe gatatu, maze cha kintu kidjanwa mw' idjulu. ¹¹ Ako kanya nyene nasanz' abhantu bhatatu bhahagaze hanz' imbhele yiyo nzu twabhamwo; bhalibhatumwe kuva muli Kayisaliya bhaza kwanje. ¹² Mpwemu yantegeche kudjana nabho kandi sinanilanwe nabho. Abho bhagabho mukaga bhadjana nanje kandi twesi tulagenda munzu y'umunt' umweya. ¹³ Yatubwiye kungene yabhony' umumalayika yalihagaze munzu yiw' amubwil' ati ''Tumako haliya ,muli Yafa bhakuzanil' umunt' umwe yitwa Simoni kand' ilindi zina dyiwe ni Petelo. ¹⁴ ''Alaza kukubwil' ubhutumwa kandi mulibwo wewe n'abho munzu yawe mwesi muzolokogwa'' ¹⁵ Kandi nkiliko ndaganila nabho, Mpwemu Yela yabhamanukiye nka kwakundi yatumanukila chagihe. ¹⁶ Nibhuch' amajambho y' umwami yavuze ngo '' Yohana yabhatilishij' amaz' aliko mweho muzobhatizwa muli Mpwemu Yela,'' ¹⁷ None kimbh' Imana yabhagabhiye nka kudya yatugabhiye chagihe twizela mu mwami Yesu Kilisito, njewe ndinde noshobhola kugwana n' Imana? ¹⁸ Bhavyumvishije ntacho bhashubhije aliko bhashemagidje Rulema bhavuga bhati '' Imana yashobhodj' abhanyamahanga nabho kwihana.'' ^{21 19} Maze bhadya bhosi bhizela bhahuye n' imibhabhalo kubw' ulupfu gwa sitefano bhalasanzagila bhava muli Yelusalemu bhaja kule muli Foyinike ,Kipulo, kumwe na Antiyokiya. Bhabwiy' abhayuda gusa kuvyelekeye Yesu ²⁰ Aliko bhamwe muli bhadya bhadje bhatuluka muli Antiyokiya bhaganila n' abhagiliki maze bhabhabwila Yesu. 1 Kand' ukubhiko kw' Imana kwali kumwe nabho maze, bhenshi bhalizela bhahindukilil' Umwami. ²² Inkulu zabho zishika kw' ikanisa dyo muli Yelusalemu; maze bhalungika Bhalinabha muli Antiyokiya. ²³ Amaze kugelayo no kubhon' ingabhile y' Imana bhilamunezeleza; maz' alabhahumuliza ngo bhagume mu mwami n' imitima yabho. ²⁴ Kuko yal' umuntu mwiza kandi yali yuzuye Mpwemu Yela bhe no kwizela , maze bhenshi bhalagwila ku mwami. ²⁵ Maze Bhalinabha yelekeza muli Taluso kulebhayo Sawuli. ²⁶ Amaze kumubhona yamuzanye muli Antiyokiya. mugihe ch' umwaka wosi bhahulila hamwe n' ikanisa bhakigisha bhenshi. kandi ngaho muli Antiyokiya nih' abhigishwa bhiswe yukw' al' abhakilisito ku bwambhele. ²⁷ Mw' iyo mibhagw' abhavugishwa bhalamanuka bhatuluche muli Yelusalemu bhashika muli Antiyokiya. ²⁸ Umwe mulibho yitwa Agabho, ahagalala muli Mpwemu yelekana yuko mwisi yosi hagiye kubhah' inzala .Iyo yabhayeho kubhutegechi bwa Kilawudiya. ²⁹ Nuko lel' abhigishwa , bhul' umuntu mulibho kungana nicho yalitunze yemeye kulungik' infanyanyo kubhavukanyi bho mu bhuyuda. ³⁰ Bhalungich' amahela mu mabhoko ya Bhalunabha kumwe na Sawuli.