¹ Mu mudji wa Kayisaliya haliy' umuntu lunaka, izina dyiwe yitwa Koloneliyo yal' umukulu w' abhasilikale bh' umugwi w' Abhataliyano . ² Yalasenga kand' akubhah' Imana kumwe n' inzu yiwe yosi., yahelez' abhayud' amahela menshi maz' agaseng' Imana mu mibhagwa yosi. ³ Kw' isaha mwenda z' umutaga yelechwe malayika w' Iman' aza kuliwe. malayik' alavuga ati '' Koloneliyo'' ⁴ Koloneliyo naw' alamwitegeleza kandi yali yamutinye maz' alasubhiz' ati '' Niki ga nyakubhahwa?'' Umumalayik' alamusubhiz' ati '' Ugusenga kwawe kumwe ni imfashanyo zawe kubhakene vyaladuze mwidjulu nk' ugwibhukilizo mukubhaho kw' Imana. ⁵ None lelo lungik' abhantu haliya muli Yafa bhaguhamagalil' umuntu yitwa Simon' aliwe yitwa Petelo. ⁶ Abhana nu muntu yitwa Simon' abhoh' insato kand' inzu yiw' ili luhande n' ikiyaga. ⁷ Uwo mumalayika yavuganye naw' amaze kugenda, Koloneliyo yahamagay' abhakozi bhiwe bhabhili kumwe numusilikale yubhah' Imana mu bhasilikale bhamukolela. ⁸ Koloneliyo yabhabwiye ivyabhaye vyosi maz' abhalungika muli Yafa. ⁹ Kumubhagwa wakulikiye bhalikunzila nk' isaha mukaga bhegeledje kul' uwo mudji, Petelo yaduze hedjulu mwidali gusenga. ¹⁰ Maz' agil' inzala kandi yipfuza kudya, aliko bhakiliko bhalateka yelekw' inzozi, ¹¹ abhon' idjulu dyuguluche, maz' ikintu kimeze nk' igihuzu kinini kimanukila kw' isi kili kumitwe yach' ine . ¹² Mulicho halimw' ubhudyo bwosi bw' ibhikoko vy' amagul' ane,n' ivyikwega kubhutaka, kumwe ninyoni zo mukilele. ¹³ Maz' idjwi lila mubwila '' vyuka Petel' abhag' udye'' ¹⁴ Aliko Petel' asubhiz' ati '' Oya mwami kuko njewe sinigeze kudy' ikintu chochosi gihumanye chankwe kitemewe. ¹⁵ Aliko dyadjwi lilagaluka lila mubwila liti '' Kidya chogejwe n' Imana ntuzochit' igihumane'' ¹⁶ Ivyo vyabhayeho gatatu, maze cha kintu kiladuzwa mwidjulu. ¹⁷ Icho gihe Petel ' agitangaye kubhel' izo nzozi zobha zivugiki, ubwo nyene, bhabhantu bhatumwe na Koloneliyo bhahagalala kw' ilembho bhabhaz' inzila yobhageza kuliyonzu. ¹⁸ Bhalahamagala bhabhaza yuko Simoni yitwa Petelo yobh' abha ngaho. ¹⁹ Ubwo nyene Petel' akivyiyumvila, Mpwemu yela naw' alamuganiliz' ati '' lebha halih' abhantu bhatatu bhakulondela. ²⁰ Haguluka mubhonane hiyo hasi. Ntutinye kudjana nabho kuko ni njewe nabhalungiche. ²¹ Petel' amanuka kubhonana nabho, alabhabwil' ati '' Ni njewe ndamulondela. Mumpigil' iki?'' ²² Bhalasubhiza bhati '' Umukulu w' abhasilikale yitwa Kolineliyo n' umugololochi kand' akund' Imana, kand' avugwa neza n' abhantu bhosi bho mw' ihanga dy' Abhayuda, kandi yabwiwe na malayika w' Imana yuko bhaguhamagala kugil' ugende muhila kwiwe, kugila yakil' ubhutumwa bwawe. ²³ Petel' abhaheleza kaze bhinjila munzu kwiwe bhalichala. mugitondo chah' ajana n' abhagenzi bhamwe kuva mu mudji wa Yafa bhadjana nawe. ²⁴ Umubhagwa wakulikiyeho bhashiche muli Kayisaliya. Koloneliyo yalibhalindiliye kandi yaliyahamagay' abhagenzi bhenewabho kumwe n' abhanywanyi bhiwe. ²⁵ Icho gihe Petelo yinjiye Koloneliy' alahaguluka yunam' ibhele yiwe kubwo kumwubhaha maz' alamusanganila. ²⁶ Maze Petel' alamuhagulucha amubwil' ati '' Haguluka kuko nanje nd' umuntu nkawe'' ²⁷ Petel' akiganila nawe bhinjila munzu maz' asang' abhantu bhenshi bhakolaniyeho. ²⁸ Alabhabwil' ati '' Mwege mulabhimenya neza yuko bhitemewe mu bhayuda kwiyunga chankwe gutembhelel' umuntu wo mulindi hanga. Alikw' Imana yalabhudjidje ngo singil' uwo mbhona yukw' uhumanye chankw' alimubhi. ²⁹ Nicho gituma nanje ntalinze kubhaza chagihe watumako. '' None lelo ndabhasabha mumenyesh' ichatumye muza kuntola'' ³⁰ Koloneliy' alavug' ati '' Mu mibhagw' ine yashize, kumango nkayano, nalimwo ndasenga mugihe ch' isaha mwenda z' umutaga munzu yanje ; mbhon' imbhele yanj' umunt' ahagaze yambhay' impuzu zelelana. ³¹ Maz' alambwil' ati '' Kolineliyo gusenga kwawe kwumvikanye mw' idjulu, kand' imfashanyo wahay' abhakene zabhay' ugwibhucho mu kubhaho kw' Imana. ³² Nuko lelo lungik' umuntu muli Yafa bhaguhamagalil' umuntu yitwa Simon aliwe yitwa Petelo kugil' aze kwawe . Uw' abha kumunt' abhoh' insato, kand' inzu yiwe ili luhande y' ikiyaga. ³³ Menya neza; uwu mulongo ngo '' Nawe niyamala gushik' azobhaganilila ntiwowubhona mu nyandiko za kela. ³⁴ Maze Petel' alasamik' akanwa kiw' alavug' ati '' Nukuli ndabhona yukw' Iman' idatolanya kukagohe. ³⁵ Ahubwo muli bhuli hanga dyos' umunt' ayisenga kumwe no gukol' ibhigololoch' ilamwemela. ³⁶ Ulameny' ubhutumwa yaheledj' abhantu bha Isilayeli, igihe yavug' ubhutumwa bwiza bw' amaholo muli Yesu Kiristo kandi niwe mwami wa bhosi, ³⁷ Mwesi mulameny' ivyabhaye, dyaheleye muli Galilaya maze libhela mu Bhuyuda mu nyuma yu mubhatizo wa Yohana. ³⁸ Icho kintu chelekeye kuli Yesu Kiristo kungen' Imana yamusiz' amavuta muli Pwemu Yela no munkomezi. yagend' akol' ivyiza kumwe no gukiza bhosi bhadya bhagiliwe nabhi na satani bhosi, kubhel' Imana yalikumwe nawe. ³⁹ Nitwebwe vyabhona vya bhidya vyosi yakoleye mu bhihugu vy' ibhuyuda kumwe na Yerusalem' uwo ni Yesu wawundi bhicha bhaka mubhambha kugiti. ⁴⁰ Uwo lel' Imana yalamuzuye mubhapfuye kumubhagwa wa gatatu, imuha kumenyekana, ⁴¹ Sikuli bhos' aliko ni kuli bhidya vyabhona vyatolanidjwe kela n' Imana twebwe twalaliye nawe tunywa hamwe nawe chagihe yamala kuva mu bhapfuye. ⁴² Yadutegeche kubwil' abhantu yukw' uw' aliwe mulamuzi yashizweho n' Imana kubw' abhaliho kumwe n' abhapfuye. ⁴³ Abhavugishwa bhosi bhalamuvuzeko, kugila bhul' umuntu yizeye muliw' ahabw' imbhabhazi z' ivyaha mwizina dyiwe.'' ⁴⁴ Petel' akibhi bhabwila Mpwemu Yela alabhamanukilako, yuzuza bhadya bhosi, bhaliko bhalamwumviliza . ⁴⁵ Udya mugwi w' abhakebwe bhazananye na Petelo bhosi bhasanganwa niyo ngabhile ya Pwemu Yela yasheshwe kubhanyamahanga. ⁴⁶ Kuko bhumvishidj' abho bhanyamahanga bhavuga muzindi ndimi bhaseng' Imana Petel' alabhabwil' ati ⁴⁷ '' Niki chobhuza yukw' abhabhantu bhabhatizwa mmumazi kandi bhakiliye Pwemu Yela nkatwe?'' ⁴⁸ Maz' alategeka yukwo bhabhatizwa mwizina dya Yesu Kiristo. maze bhamusabha kugumana nabho mugihe lunaka.