¹ E beiceu Deus a Noé e a seus fillos, e díxolles: "Sede fecundos e multiplicádevos, e enchede a terra. ² E o temor e o terror voso estarán sobre todos os animais da terra, e sobre aves do ceo, e en todo o que se arrastra sobre o chan, e en todos os peixes do mar; entrégansevos na vosa man. ³ Todo o que se move e ten vida seravos para alimento: todo volo dou coma dei a herba verde. ⁴ Pero carne coa súa vida, é dicir, co seu sangue, non comades. ⁵ E certamente pedirei conta do sangue das vosas vidas; de todo animal demandareina. E de todo home demandarei a vida do home. ⁶ O que derrame sangue de home, polo home o seu sangue será derramado, porque a imaxe de Deus fixo El o home. ⁷ En canto a vós, sede fecundos e multiplicádevos; poboade a terra dabondo e multiplicádevos nela". ⁸ Entón falou Deus a Noé e a seus fillos que estaban con el, dicindo: ⁹ "Velaí, Eu establezo o meu pacto convosco, e coa vosa descendencia, despois de vós. ¹⁰ E con todo ser vivente que está convosco: aves, gandos e todos os animais da terra que están convosco; todos os que saíron da arca, todos os animais da terra. ¹¹ Eu establezo o meu pacto convosco, e nunca máis volverase exterminar toda carne polas augas do diluvio, nin haberá máis diluvio para destruír a terra". ¹² E dixo Deus: "Este é o sinal do pacto que fago entre min e vós e todo ser vivente que está convosco, por todas as xeracións: ¹³ Poño o meu arco nas nubes e será por sinal do pacto entre min e a terra. ¹⁴ E acontecerá que cando faga vir nubes sobre a terra, verase o arco nas nubes, ¹⁵ e lembrareime do meu pacto que hai entre min e vós e en todo ser vivente de toda carne; e nunca máis se converterán as augas en diluvio para destruír toda carne. ¹⁶ Cando o arco estea nas nubes, ollareino para me lembrar do pacto eterno entre Deus e todo ser vivente de toda carne que está sobre a terra". ¹⁷ E dixo Deus a Noé: "Este é o sinal do pacto que establecín entre min e toda carne que está sobre a terra". ¹⁸ E os fillos de Noé que saíron da arca foron Sem, Cam e Xafet; e Cam foi o pai de Canaán. ¹⁹ Estes tres foron os fillos de Noé, e deles poboouse toda a terra. ²⁰ Entón Noé comezou a labrar a terra, e plantou unha viña. ²¹ E bebeu o viño e emborrachouse, e espiuse no medio da súa tenda. ²² E Cam, pai de Canaán, viu a nudez de seu pai, e contóullelo a seus irmáns que estaban fóra. ²³ Entón Sem e Xafet, colleron un manto, puxérono sobre as súas ombreiras, e camiñando cara atrás cubriron a nudez do seu pai; e os seus rostros estaban voltos, e non viron a nudez do seu pai. ²⁴ Cando Noé acordou da súa borracheira, e soubo o que fixera o seu fillo menor, ²⁵ dixo: "Maldito sexa Canaán; servo de servos será para seus irmáns". ²⁶ Dixo tamén: "Bendito sexa Iahveh, o Deus de Sem; e sexa Canaán o seu servo. ²⁷ Engrandeza Deus a Xafet, e viva nas tendas de Sem; e sexa Canaán o seu servo". ^{28 29} E viviu Noé trescentos cincuenta anos despois do diluvio. O total dos días de Noé foi de novecentos cincuenta anos, e morreu.