¹ E o home coñeceu a Eva, a súa muller, e ela concibiu e deu a luz a Caín e dixo: -Adquirín un varón coa axuda de Iahveh. ² Despois deu a luz ao seu irmán Abel. E Abel foi ovelleiro e Caín foi labrego. ³ E aconteceu que co transcorrer do tempo, Caín trouxo a Iahveh unha ofrenda do froito da terra. ⁴ Tamén Abel, pola súa banda, trouxo dos primoxénitos das súas ovellas e da graxa dos mesmos. E Iahveh mirou con agrado a Abel e á súa ofrenda, ⁵ pero a Caín coa súa ofrenda non mirou con agrado. E Caín alporizouse moito e mudoulle a cara. ⁶ Entón Iahveh díxolle a Caín: -Por que estás alporizado, e por que che cambiou a cara? ⁷ Se fas ben, non serás aceptado? E se non fas ben, o pecado axexa na porta e cobízate, pero ti debes dominalo. ⁸ E Caín díxolle ao seu irmán Abel: -Vaiamos ao monte. E aconteceu que cando estaban no monte, Caín ergueuse contra o seu irmán e matouno. ⁹ Entón Iahveh díxolle a Caín: -U-lo teu irmán Abel? E el respondeulle: -Non o sei, son eu por un acaso o gardián do meu irmán? ¹⁰ E El díxolle: -Que fixeches? A voz do sangue de teu irmán bérrame dende a terra. ¹¹ Agora pois, maldito es da terra, que abriu a súa boca para recibir da túa man o sangue de teu irmán. ¹² Cando labres o chan, non che dará máis o seu rixo; vagabundo e itinerante serás na terra. ¹³ E Caín díxolle a Iahveh: -O meu castigo é demasiado grande para o soportar. ¹⁴ Velaí, arroxáchesme hoxe da face da terra, e da túa presenza escondereime, e serei vagabundo e itinerante na terra; e sucederá que calquera que me atope hame matar. ¹⁵ Entón Iahveh díxolle: -Non será así; pois calquera que mate a Caín, sete veces sufrirá vinganza. E puxo Iahveh un sinal sobre Caín, para que calquera que o atopase non o matase. ¹⁶ E saíu Caín da presenza de Iahveh e estableceuse na terra de Nod, ao oriente do Edén. ¹⁷ E coñeceu Caín a súa muller, e ela concibiu e deu a luz a Enoc; e edificou unha cidade e chamouna Enoc, coma o nome do seu fillo. ¹⁸ A Enoc naceulle Irad, Irad xerou a Mehuxael, Mehuxael xerou a Metusael, e Metusael xerou a Lamec. ¹⁹ Lamec tomou para si dúas mulleres; o nome dunha era Ada, e o nome da outra era Zila. ²⁰ E Ada deu a luz a Iabal, o cal foi pai dos que habitan en tendas e teñen gando. ²¹ O seu irmán chamábase Iubal, o cal foi pai de todos os que tocan a lira e a frauta. ²² E Zila á súa vez deu a luz a Tubal-caín, forxador de todo utensilio de bronce e ferro; e a irmá de Tubal-caín era Naama. ²³ E Lamec díxolles a súas mulleres: -Ada e Zila, ouvide a miña voz; mulleres de LAmec, prestade ouvido ás miñas palabras, pois dei morte a un home por me ferir, e a un mozo por me pegar . ²⁴ Se sete veces vínganse a Caín, entón Lamec vingarase setenta veces sete. ²⁵ E coñeceu Adam outra vez a súa muller; e ela deu a luz un fillo e púxolle por nome Set, porque, dixo ela: Deus deume outro fillo no lugar de Abel, pois caín matouno. ²⁶ A Set naceulle tamén un fillo e púxolle por nome Enós. Por este tempo comezaron os homes invocaren o nome de Iahveh.