¹ Subiu, pois, Abram de Exipto ao Neguev, el e a súa muller con todo o que posuía; e con el, Lot. ² E Abram era moi rico en gando, en prata e en ouro. ³ E andou nas súas xornadas dende o Neguev deica Betel, ao lugar onde a súa tenda estivera ao principio, entre Betel e Hai. ⁴ Ao lugar do altar que antes fixera alí; e alí Abram invocou o nome de Iahveh. ⁵ E tamén Lot, que andaba con Abram, tiña ovellas, vacas e tendas. ⁶ E a terra non podía sostelos para que habitasen xuntos, porque as súas posesións eran tantas que xa non podían habitar xuntos. ⁷ Houbo, pois, contenda entre os pastores do gando de Abram e os pastores do gando de Lot. E o cananeo e o fereceo habitaban daquela naquela terra. ⁸ E Abram díxolle a Lot: "Rógoche que non haxa contenda entre nós, nin entre os meus pastores e os teus pastores, porque somos irmáns. ⁹ Non está toda a terra diante de ti? Rógoche que te separes de min: se vas á esquerda, eu ires á dereita; e se á dereita, eu irei á esquerda". ¹⁰ E alzou Lot os ollos e viu todo o val do Xordán, o cal estaba ben regado por todas partes (isto foi endenantes que Iahveh destruíra Sodoma e Gomorra) como o horto de Iahveh, como a terra de Exipto rumbo a Zoar. ¹¹ E escolleu Lot para si todo o val do Xordán; e viaxou Lot cara ao oriente. Así se separaron o un do outro. ¹² Abram estableceuse na terra de Canaán, en tanto que Lot se estableceu nas cidades do val, e foi poñendo as súas tendas deica Sodoma. ¹³ E os homes de Sodoma eran malos e pecadentos contra Iahveh en gran maneira. ¹⁴ E Iahveh díxolle a Abram despois que Lot se separara del: "Alza agora os ollos e mira dende o lugar onde estás cara ao norte, ao sur, ao oriente e ao occidente, ¹⁵ pois toda a terra que ves dareicha a ti e a túa descendencia para sempre. ¹⁶ E farei a túa descendencia coma o po da terra; de xeito que se alguén pode contar o po da terra, tamén a túa descendencia poderá contarse. ¹⁷ Érguete, percorre a terra ao longo e ao largo dela, porque a ti cha darei". ¹⁸ Entón Abram mudou a súa tenda, e veu e habitou no aciñeiral de Mamre, que está en Hebrón, e edificou alí un altar a Iahveh.