¹ Ivyo nilonge zeze,Chohile nakawalemela wantu wakwe? Bule kwa viya miye nami nani Mwizlaeli ywa lukolo lwa Ibulahimu ywa kabila dya Benjamini. ² Chohile hawalemele wantu wakwe awamanyize kukongela nkongo. Togolani hammanyize wandiko dyagaze kulanga Eilia, ivyo amgambile Chohile mwa Izulaeli? ³ " Zumbe kawakoma awawoni wako nawo wabalanga mazabahu yako. miye ichedu sisigala naho walonda uwikazi wangu." ⁴ Mna landulo dya Chohile dyagaze kwako? "Sidima kwa chausa changu wantu elufu saba wadya hewekumfikila madi Baali." ⁵ Mna haluse chipindi chino cha haluse naho kuna wasigale kwachausa cho kuzuza kwa wedi. ⁶ Mna haluse hegu ni kwa wedi, suko kwa ntendwa naho. ⁷ Ni kwambwani? Mbuli idya Izulaeli nendile wakazuza hawachiwone mna wasagulwe wachiwona naho watuhu wajelwa uzami. ⁸ Ni saviya iwandikwe, "Chohile kawenka muye butu, na meso chani wasikuwona, na magutwi chani wasekwiva kubula dyelo dino." ⁹ Uyo Daudi agamba "Leka izimeza zawo zitende wavu mtego hantu wa wakwegwiza na kuliha chisasi mwawo. ¹⁰ Leka ameso yawo yajelwe chiza chani wasekudaha kuwona kukawafunamize imigongo yawo mazwa yose." ¹¹ Naho nalonga "Togola, wekobadisa kubula kugwa?" Isekutenda ivyo. Ukaleka kwa kusindwa kawo wambula ubula kwe izisi, chano wawo wenye wajelwe chinyulu. ¹² Ivyo uneva kusindwa kwawo ni ugoli we isi naho hegu ni hasala yawo ni ugoli we izisi, ni kwa chiasi chani kujinka naitende kuchinta kwawo? ¹³ Haluse nalonga na nyuwe wantu we izisi. Kwaviya sitenda msigilwa kwa wantu we izisi ntihu netunyiza undima wangu. ¹⁴ Vyadahika nadaha kuwajela chinyulu weli mo mwili umwenga na miye. Vyadahika nachiwambule wamwe wawwo. ¹⁵ Kwaviya kulemelwa kwawo ni malagano ye isi, kuhokelwa kwawo nakutende zeze mna kwikala kulaila kwa wabanike? ¹⁶ Saviya matunda ya nkongo ni mpamba nivyo vili kwa tonge dya unga. Saviya maizi ni mpamba, naho na matambi nayo. ¹⁷ Mna hegu matambi masiku yakantwa, saviya weye, tambi dya kumbago dya mizeituni, uhandwa mgati mwawo, naho saviya uhamwenga nawo mwe maizi ya ugoli we imizaituni, ¹⁸ Usekweduvya mwe tambi. Mna hegu weduvya mna suyo weye ukuyambiza amaizi, mna maizi yakwambiza weye. ¹⁹ Ivyo nolonge, "Matambi nayakantwa chani nidahe kuhandikizwa mwe sina." ²⁰ Ivyo ni chindedi. Kwa chausa cha kutokuzumila kwawo nawakantwa, mna weye nakuchimala utogile kwa chausa cho utondowazi wako. Usekwefanyanyiza mwenye kwa chiasi chikulu mna ogoha. ²¹ Kwa viya uneva Chohile hayalekile matambi ya kolwa hakufile mbazi weye nawe. ²² Kaula, ivyo ntendwa zedi na maya ya Chohile. Kwa ntendele imwenga, maya nayeza mwa Wayahudi wadya wagwele. Mna kwa ntendele ntuhu, wedi wa Chohile weza mwako, hegu nawikale mo wedi wakwe. Vinase kudahika weye nawe ukalemelwa hale. ²³ Naho hegu hawajendeleze mwe kuleka kuzumila kwawo nawahandikizwe naho, ²⁴ Kwaviya nyuwe namkantwa kuse uwo wili wa kolwa mzaituni wa kumbago naho chinyume cha kolwa mhandikizwe mwe imizaituni wili wedi suko kujinka wano Wayahudi, awo weli saviya matambi ya kolwa kudaha kuhandikizwa naho mndani mwe mzeituni yawo wenye? ²⁵ Kwaviya walukolo sikunga mkamanya kulanga chinyele chino, chani kugamba msekutenda na ntunyo mwe kuifanyanya kwenyu wenye. Chinyele chino ni kugamba utogi ulaila mwe Izulaeli, kubula kuchinta kwe izisi nakwizile. ²⁶ Ivyo Izulaeli wose nawahonywe saviya iwandikwe, "Kulaila Sayuni neze Mkombola. Nause ubanasi kulaila kwa Yakobo ²⁷ Dino naditende lagano dyangu hamwenga nawo, chipindi nanuse masa yawo." ²⁸ Mwe ntendele imwenga kulanga ulosi wedi wa Chohile, wawehiwa kwa chausa chenyu. Kwa ntendele ntuhu kulawana na usagulo wa Chohile, waungigwa kwa chausa wadalahala. ²⁹ Kwaviya jeleko ni witango wa Chohile haukuhitukila. ³⁰ Kwaviya aho nkongo nyuwe nendile mumleka Cohile, mna haluse mhokela wedi kwa chausa cho kumlemela kwawo. ³¹ Mwe isila iyo iyo haluse wano Wayahudi wamlemela . Ulailo wakwe ni kugamba kulawana na mbazi mnanayo nyuwe wadaha naho kuhokela wedi. ³² Ivyo Chohile kawtaliza wantu wose mwe ubanasi, chani adahe kuwafila mbazi wose. ³³ Ivyo vili vikulu ugoli na ntunyo na umanyi wa Chohile! Hazikupelembeka izikanto zakwe na sila zakwe hazikumanyika! ³⁴ "Ivyo ni yuhi amanyize ukunga kwa Zumbe? H egu ni yuhi atendile uliganyi ywakwe? ³⁵ Hegu ni yuhi nkongo amwinkile chintu Chohile, chani alihwe naho?" ³⁶ Kwa viya kulawa kwakwe naho na kwa sila yakwe naho kwakwe, vintu vyose viyaho. Kwkwe kutende ukuka kale na kale. Taile.