¹ Niyo mndima wa wa kwembingu ywa shano niyo atowa gunda dyakwe, nasiwona ntondo kulawa kwa mbingu itendile igwa mwe isi ntondo inkigwa funguwo ya bome ikwita mwe bome hedina uhelo. ² Niyo avugula bome hedina uhelo na mosi ukweile kulanga utandilikwe kulawa kundani kwe bome saviya mosi kulawa mwe tanuli kulu zuwa na ulanga vihituka vitenda chiza kwa udya umosi ulaile mwe dibome. ³ Mndima mo mosi sije zilaila kwiza kulanga kwe isi nawo niyo wenkigwa udahi saviya idya inge ikulanga kwe isi. ⁴ Wagambigwa wasekuyadamanya vihiye mani mwe isi hegu mmeya wowose wa chijani hegu mti mna du wantu awo hewena mhuli wa Chohile mwe vinengo vyo uso wawo. ⁵ Hawenkigwe kudamanya ya kuwakoma awo mna kuwasulumiza du milongo gana na mishano usungu wawo utende saviya udya wa kulumwa ninge akumluma mntu. ⁶ Umo mwa mazuwa ayowantu wanawalonde kubanika mna hawakwinkigwe nawaunge kubanika mna kubani kwawasumka. ⁷ Sije zikala saviya Falasi waikigwe vyedi kwa nkondo mwe mitwi yawo na kutenda na chintu saviya taji ya zahabu naho nyuso zawo nazikala saviya za wantu. ⁸ Nendile wana fili saviya za wavyele meno yawo yekala saviya ya Simba. ⁹ Nawtenda na vifuwa saviya vifuwa vya chuma na izwi dya mawawa yawo naditenda saviya izwi dya mutuka ilozize ya nkondo na Falasi wakuguluka kwita kwe nkondo. ¹⁰ Nawatenda na michila ikuluma saviyannge umo mwe michila yawo nendile na udahi wa kulumiza wantu kwa kwamiezi mishano. ¹¹ Nawaatenda naye oge mkulu kulanga kwawo wndima wa Chohile wemwe bome hedina uhelo, zina dyakwe dya chiebulaniya ni Abadoni na dya Chiyunani ana zina Abolioni. ¹² Namluwone ya nkogo ijinka, kaula ikajika ino kuna nkomano mbili zeza. ¹³ Mndima ya kwembingu ywa mtandatu katowa gunda dyakwe niyo neva izwi kulaila hankanda he nchanja ye zahabu iyo ili kulongozi kwa Chohile. ¹⁴ Izwi dimgambila mndima ya kwembingu ywa mtandatu nendile na gunda, walekeile wandima wa kwembingu wane awo wafungigwe mo mto mkulu Eflati. ¹⁵ Wandima wa kwembingu wadya wane ambawo nawamalanywa mwe isa iyo, me zuwa idyo, mo mwezi uwo, na mhilimo uwo, walekeilwa wawakome selusi ys wantu. ¹⁶ Uwazwa wa wagomba nkondo nawekulanga kwe zifalasi nendile, 200,000,000 niyo neva uwazwa wawo. ¹⁷ Vino nivyo niwone falasi mwa maono yangu wadya wakweile kulanga kwawo vifuwa vyawo navitenda vinkundu saviya moto, buluu iviye na njano heiviye, mitwi ye zifalasi nailigana ne mitwi ya simba, na mwe milomo yawo mlawa moto, mosi na salifa. ¹⁸ Selusi ya wantu wakomigwe na zino nomano ntatu, moto, mosi, salifa ilaile mwe milomo yawo. ¹⁹ Kwaviya udahi we falasi utenda umo umo mwe milomo yawo na mwe michila yawo kwaviya michila yawo nayendile saviya nyoka naho nendile wana mitwi ambayo nawaijeseza kwenje wantu. ²⁰ Wantu wasigale ni wadya ambawo nendile wakomigwe na maliho yano haweile izimbuli zawo nendile wadamanye naho hawalekile kuvikila mpepo na macholhile ya zahabu hela, shaba, mayuwe, na miti vintu viya hevikudaha kuwona, kwiva hegu kujanda. ²¹ Naho hawalekile ukukoma kwawo usai wawo, ichilanga chawo hegu sila zawo za ubavi.