¹ Niyo nawona mndima ywa kwembingu mtuhu mkulu akasela hasi kulawa kwe mbimgu nendile nkasigitwa mwe mwingu nadina utamwasi wa fula kulawa ko mtwi wakwe chinengo chakwe nachitenda saviya zuwa ne iviga vyakwena vikala saviya nguzo za moto. ² Nakaditozesa gombo dodo mo mkono wakwe ditendile digubulwa naye nakaika ichiga chakwe cha kulume kulanga kwe bahali ne ichiga chakwe chakumoso kulanga kwe isi inyaile. ³ Niyo akweza izwi kulanga saviya simba ikunguluma chipindi eze alavize izwi, mbaula mfungate zinguluma. ⁴ Chipindi mbaula mfungate zize zingulume, nendile hasogeila kudolonya mna niyo neva izwi kulawa kwembingu dikugamba, dima chitende chinyele chiya ambacho mbaula mfungate zilonga usekudolonya. ⁵ Niyo mndima wa kwembingu nimuone kulanga kwe bahali na si nkavu, nakenula mikono yakwe kulanga kwe mbingu, ⁶ nakwelisa kwa yudyaakwikala kale na kale aumbile mbingu na vyose viyumo, si na vyose viyumo, na bahali na vyose viyumo, hakutendeke na kuzigila naho. ⁷ Mna mwe dizuwa idyo chipindi wasigilwa wa Chohile wadya mfungate umo wakaisogeila kutowa gunda dyakwe niyo chinyele cha Chohile oge viya alongile kwa wasigilwa wakwe wawoni. ⁸ Izwi nivile kulawa kwe mbingu dinigamba, naho, hita guha gombo dodo digubulwe ambadyo diyumo mo mkono wa msigilwa wa Chohile uyo achimale kulanga kwe ibahali na kulanga kwe isi inyaile. ⁹ Niyo naita kwa msigilwa ywa Chohile na kumgamba aninke gombo na udye, naditende inda yako itende na usungu, mna mo molomo wako naditende dimwile saviya uchi. ¹⁰ Sidiguha gombo dodo kulawa mo mkono wa msigilwa wa Chohile na kudidya ditenda dimwile saviya uchi, mo mlomo wangu mna nize nidye inda yangu niyo yatenda na usungu. ¹¹ Niyo maizwi masiku yanigamba, wongigwa ukule naho kulanga wantu walozize, si, luga, na Maseuta.