¹ Niyo naona mbingu hya na si mpya, kwaviya mbingu ya nkongo na si ya nkongo zijinka kale, na bahali haitende iyaho. ² Siwona mzi ykukile, Yelusalemu mhya, useile kulawa kulanga kwa Chohile uhambigwe saviya mwali ahambigwe kwachausa cha mgosiwe. ³ Siva izwi kulu dikulaila kwe chigoda cha uzumbe dikagamba, kaula wikazi wa Chohile wihamwenga na wantu, naye naekale hamwenga na wowo, nawatende wantu wakwe, Chohile naye natende ananawo, naye natendwe Chohile ywawo. ⁴ Nahanguse chila sozi mwa ameso yawe, naho hakutende na kubanika naho, hegu kulombeza, hegu kwila, hegu, usungu, mbuli za kale zijinka kale. ⁵ Uyo ekale mwe ichigoda cho uzumbe niyo agamba, kaula natenda mbuli nzose kutenda hya agamba dolonya dino kwaviya ulosi uno ni wa ukanuni na wachindedi. ⁶ Agamba mhil zino zijinka kale miye ni Alufa na Omega nkongo na udumo, kwa yoyose akuwona nchilu nanimpatile cha kunywa bila maliho vikulawa mwe mfajo wa mazi ya ujima. ⁷ Yoyose akuhuda nayalisi yano, naye natende Chohile ywakwe yeye naye natende mwanangu. ⁸ Mna enga ivyo vikale kwa waoga, hewekuzumila wakujela maya, wakomi, wagonyi, wasai, wakuvikila matukulu, wadanti woseni, hantu hawo nahatende mwe ziwa dya moto wa chibiliti ukoka iyo niyo ifile ya kaidi ⁹ Yumwenga ywa wandima wa kwembingu wa wadya mfungate niyo eza kwangu yumwenga nendile na bakuli mfungate yamemile nkomano mfungate ya udumo niyo agamba, so hano, nahulagise msolwa ywa Mwana ngoto. ¹⁰ Niyo aniguha hale chidogo mwe muye, kwelugulu lukulu naho lutali niyo anilagisa mzi ukukile Yelusalemu, ukasela hasi kulawa ko ulanga kwa Chohile. ¹¹ Yelusalemu wendaga na ukuka wa Chohile na utana wakwe wendaga saviya yuwe dya yombe kulu, yuwe dya chilole chitana cha Yasipi. ¹² Wendaga na ugoma mkulu mtali una nyivi milongo na midi hamwenga na wandima wa kwembingu, mlongo na waidi mwe zinyivi, mlanga mwe zinyivi nahadolonywa mazina ya makabila mlongo na waidi ya waizulaeli. ¹³ Ntendle ya ulailo wa zuwa kwendaga na nchili ntatu, ntendele za kwe mwenye mzi nyivi ntatu, ntendele ya chibula nyivi ntatu, ntendele za uswelo wa zuwa nyivi ntatu. ¹⁴ Ugoma wo mzi wendaga na misingi mlongo na midi mlanga mwakwe namna mazina mlongo umwenga na maidi ya wasigilwa mlongo umwenga wa Mwana ngoto. ¹⁵ Yumwenga alongile na miye endaga na chihimo cha nkome chidamanywe kwa zahabu kwachausa cha kuhimila umzi, izinyivi zakwe na ugoma wakwe. ¹⁶ Umzi wikwa ugoma uligane utali na wangalamu wakwe, kauhima umzi kwa chihimo che nkome, utali wakwe ni chilo meta 12,000 utali wakwe, wangalamu kwita kulanga viligana. ¹⁷ Iviya niyo ahima ugoma wakwe, unene wakwe wendaga mita 144 kwa vihimo vya chimntu navyo ni vihimo vya wandima wa kwembingu. ¹⁸ Ugoma wakwe uzengwa kwa yuwe dya Yasipi na umzi una zahabu ntana, saviya chelole chitana. ¹⁹ Umsingi wo ugoma wendaga uhambwa na chilaaina ya yuwe dya yombe kulu dyankongo dyendaga yasipi, dya kaidi dyendaga dya yakuti samawi, dya katatu dyendaga kalikedoni, dya kane dyendaga zumalidi, ²⁰ dya shano dyendagasalidoniki dya mtandatu dyendaga akiki, dya mfungate dyendaga kilisoliso dya mnana dyendagazabalajadi, dya chenda dyendaga manjano na dya mlongo dyendagakilisopalaso, dya mlongo na imwe dyendagahiakinisiso, na dya mlongo na mbili dyendagaamesisito. ²¹ Nyivi milongo na midi yendaga lulu mlongo na mbili chila lwivi ludamanywa kulawa mwe lulu imwenga, imitata yo mzi wendaga zahabu ntana, ikawoneka saviya chelole chitana. ²² Siwona nyumba ya vikilo yoyose mndani mo mzi, kwaviya Zumbe Chohile uyo akulongoza vyose na Mwana ngoto nuyo nyumba ya vikilo dyakwe. ²³ Mzi uwo hauna haja ya zuwa hegu mwezi chani kulangaza umzi, kwaviya ulang'azi wa Chohile walangaza mwakwe, naho taa yakwe ni Mwana ngoto. ²⁴ Wantu wa si zose nawatalamke mwe ukuka wakwe, waseuta wa si zose nawalete ugoli kwakwe mndani mwakwe. ²⁵ Nyivi zakwe hazivugalwe chipindi cha nomsi mna hahendaga na chilo hadya. ²⁶ Nawawalete wagoli na watunywa we isi mndani mwakwe, ²⁷ Naho hakuna wavu ukunga wingile mndani mwakwe, hegu yoyose akutenda mbuli yoyose yasoni hegu lulimi, hengile, mna ni wadya du wadolonywe amazina yawe yadolonywa mwe chitabu cha ujima cha Mwana ngoto.