¹ Niyo naona chilagiso chituhu kwe mbingu, nkulu na ikwehela, nakuna wandima mfungate wata nkomano mfungate, ayo yendile nkomano za udumo mwa ayo maya ya Chohile nendile yachinta. ² Nasiwona chiya chilaile kutenda bahali ya bilauli ihanganywe na moto niyo yachimala mnkanda mwe ibahali viya wadya wendile washindile kujinka yudya umnyama ne iditukulu dyakwe na mlanga mwe namba ilagisa zina dyakwe nendile watozesa visinda mgunda wenkigwe ni achohile,=. ³ Nendile wakachema wila wa Musa, msigilwa ywa Chohile na wila wa Mwana ngoto ndima zako ni nkulu na zenye kumweheza Zumbe Chohile, akulongoza vyose, mchindedi na sila zako ni za chindedi Seuta ywe isi. ⁴ Ni yani akunga ashindwe kukogoha weye Zumbe na kuditunya zina dyako? Kwaviya weye ichedu wi mkuka na izisi zose nazize na kukuvikila kulongozi kwako kwaviya wi wedi ne izintendwa zako zimanyika. ⁵ Bada ye izimbuli izo niyo nakaula na hantu hakukile vidala hadya hendile na vulu dya ukuzi divugukile kwembingu. ⁶ Kaula hantu hakukile vidala niyo nawona wandima mfungate wta nkomano mfungate wavala suche zilenguke chilemba ching'aile na msipi wa zahabu kuzunguluka ivifuwa vyawo. ⁷ Yumwenga ywa wadya wemeso wane niyo alavya kwa wadya wandima mfungate mabakuli mfungate ya zahabu yamenile usungu wa Chohile mta kwikala kale na kale. ⁸ Hantu hakukile vidala hamema mosi kulawa ko ukuka wa Chohile na kulawa ko udahi wakwe, na hahana hata yumwenga adahile kwingila kubula nkomano mfungate za wandima mfungate yeze yachinte.