¹ Chilagiso chikuile niyo chawoneka koulanga, mvyele agubikwe ni zuwa, kuno ana mnenge heviga vyakwe, na vilemba vya ntondo mlongo na mbili nendile zihalanga ho mtwi wakwe. ² Nani msoka naho nakaila kwachausa cha usungu wa kwefungula. ³ Chilagiso chituhu niyo chiwoneka ko ulanga kaula, kwendaga na zoka dinkundu dyandaga na mitwi mfungate na mahemba mlongo nakuna vilemba mfungate kwe mitwi yakwe. ⁴ Umchila wakwe no ukabuluza fungu dimwenga mwe mafungu matatu yaligane ya ntondo za kwembingu na kuzidula hasi mwe isi, zoka niyo dyachimala kulongozi kwa yudya mvyele andaga ehajihi na kwefungula chani kugamba chipindi akefungula apate kummela yudya mawnawe. ⁵ Niyo efungula, mwana chilume, uyo akunga ailongoze izisi zoseni kwa nkome ya chuma, mwanawe niyo apempulwa kulanga kwa Chohile kwechigoda chakwe cho ukulu. ⁶ uyo mvyele niyo asumkila kwe nyika, hantu Chohile amwinkile, chani adahe kulelwa kwa mazuwa1,260. ⁷ Niyo kwatenda na nkondo kwembingu Mikaeli na wandima wakwe wa kwembingu niyo watowana na diya idizoka na wandima wakwe naye. ⁸ Mna idizoka hadyendaga na udahi wa kuchinta kuhuda, ivyo hahatendile na wikalo wawo kwembingu kwachausa chakwe na awandima weyawe. ⁹ Zoka kulu , yudya nyoka we chikale akwitangwa mwavu hegu shetani uyo akudanta isi yose niyo adulwa hasi heisi, wandima wakwe nawo niyo wadulwa hasi heisi hamwenga na yeye. ¹⁰ Niyo neva izwi kulu kulawa kwembingu, dyagamba, haluse wambulwa wiza, udahi na useuta wa Chohile ywetu, na udahi wa Kulisito wakwe, kwaviya akuwalongeleza walukolo wetu kadulwa hasi uyo akuwalongeleza kwa Chohile ywetu chilo na msi. ¹¹ Wamhuda kwa sakame ya Mwana ngoto, kwaulosi wa ukuzi wawo, kwaviya hawaungise ujima wawo hata wakabanika. ¹² Ivyo, mweleleswe nyuwe mbingu, na nyuwe mkwikala mndani mwakwe, mna namluone nyuwe isi ne bahali kwaviya mwavu kadulwa kwenyu, kamema maya kwaviya kamanya kugamba chipindi chakwe ni chijihi ¹³ Chipindi zoka eze amanye kugamba kadula hasi mwe isi, niyo ambasa yudya mvyele eleke yudya umwana ywa chilume. ¹⁴ Mna yudya mvyele niyo enkwa mawawa maidi ya ngwilizi nkulu, chani kugamba adahe kupuluka kubula aho hantu haikigwe kwachausa chakwe uko kwedijangwa, hantu aho akungwa alelwe kwa chipindi, chipindi na nusu chipindi hantu hekudaha kubula uyo zoka. ¹⁵ Zoka niyo dyetila mazi, kulawa ko mlomo wakwe saviya kolongo, chani atende galika chani ibalangise. ¹⁶ Mna umsanga niyo wamwambiza uyo mvyele, ugubula umlomo wakwe niyo wamela idikolongo atwele, atwele zoka, kulawa ko mlomo wakwe. ¹⁷ Niyo zoka dyamwihiwa yudya mvyele niyo dyahalawa niyo agwisa nkondo na welekwa wakwe woseni wadya wa lagizo dya Chohile na kutenda hamwenga mo ukuzi kumlanga Yesu. ¹⁸ Niyo zoka dyachimala mlanga mo msanga, mnkanda mwe bahali.