¹ Nkumbizi na ngavu ngavu mgati mwenyu vyalawa kuhi? hazikwimuka kulawa mo ukubesa kwenyu kwihiye zikuleta nkondo mndani mwa wenyu? ² Mwachibeseza chiya hemwine nacho, mwakoma naho kusogeila chiya hemwine nacho, mwatowana na kuyegeza naho bado hamkupata kwa viya hamkumlombeza Chohile. ³ Mwalombeza naho hamkuhokela kwa viya mwalombeza kwa vintu vihiye chani kugamba mdahe kujeseza mwe tama zenyu zihiye. ⁴ Nyuwe wachilanga hamkumanya kugamba, kutenda umbuya wa mwe isi ni kutenda mnkondo ywa Chohile? Kwaviya uyo akulamula kutenda mbuya we isi etenda mwenye mnkondo ywa Chohile. ⁵ Hegu mwafanyanya kugamba mawandiko hayana mana yakagamba vino, muye wi mndani mwetu una wivu vitendese kulanga suwe? ⁶ Mna Chohile atenda na mbazi nivyo vikuleka mawandiko yagamba, Chohile amhiga mta kwefenya mna amfila mbazi mta kunyanyahala. ⁷ Ivyo mwelavye kwa Chohile, mhigeni mwavu yeye naye nawasumkeni kulawa kwa nyuwe. ⁸ Sogelani kwa Chohile yeye naye nawasogeileni hajihi na nyuwe, suntani imikono yenyu nyuwe wata masa, naho mng'aze imyuye yenyu, nyuwe watakutoza kaisi na kanyaile. ⁹ Hololani, lombezani na kwila, hitulani iziseko zenyu zitende ndilo, chinyemi chenyu chitende malombezo. ¹⁰ Kwenyanyahaleni wenye kulongoz kwa Zumbe naye nawakwezeni kulanga. ¹¹ Msekulongana chinyuma nyuma, nyuwenye kwa nyuwenye, walukolo mntu akumlonga chinyume mlukolo ywakwe, atamwila chinyume cha lagizo adikantila lagizo dya Chohile, mkakantila lagizo hamkuzumila lagizo mnamwaikantila. ¹² Ni yumwenga uyodu akulavya lagizo na nkanto Chohile nuyo mta udahi wa kuwambula na kukoma, weye wi yuhi ukumkantila mlukolo ywako? ¹³ Tegelezani nyuwe mkugamba dyelo hegu luvi nachitalamke mo mzi udya niyo chekala mihilimo uko, niyo chadamanya uchuluzi, nakujenyeza mapesa. ¹⁴ Niani akumanya luvi kwalaila mbwani kwaviya mwikala saviya kungugu dikulaila kwa chipindi chijihi niyo dyaga. ¹⁵ Mwaungwa mgambe hegu akaunga Zumbe nachikale niyo chadamanya chino hegu chiya. ¹⁶ Mna vino haluse mwefenya mwe ivyo mkapanga wefenyi woseni uwo ni ubanasi na wavu. ¹⁷ Mwaivyo kwa yudya akusankanila yedi mna hakusankana kwakwe uyo ni masa.