¹ Walukolo weyangu siyo walozize mkungigwa kutenda wahinyi mkamanya kugamba achihokele ukanti mkulu uno. ² Kwa viya chose chabalanga mwe sila zilozize hegu yoyose uneva hakubalanga mwe mbuli yakwe uyo ni mntu achimale adaha kuchinta umwili wakwe wose. ³ Haluse hegu chadaha sigi za falasi mwe milomo yawo za chiva naho chadaha kuihitula imili yawo yose. ⁴ Kaula kugamba meli hata ni nkulu yasindikwa ni nkung'unto nkali zalongozwa ni wogailo mdodo utendese kwita akunga yudya akuyendesha. ⁵ Ivyo nivyo lulimi ni chilungo chidodo mo mwili mna chetunga makulu mno kaula mbago nkulu ivyo ikudaha kokwa kwa sese dodo dya moto. ⁶ Lulimi nawo ni moto wavu wikigwa mgati mwe mili yetu naho wabalanga umwili wose waikigwa mlanga mwe moto mwe sila ya wikazi uwo wenye nawokwe moto wa kwebome hedine uhelo. ⁷ Chila mnyama wa kumbago kadege vikutambala na vyumbe vya mwe bahali chikufugwa ni mntu. ⁸ Mna hakuna mntu hata yumwe uyo akudaha kufuga lulimi ni wavu hewikuchimala umema sumu ikukoma. ⁹ Kwa lulimi chamtunya Zumbe na tati yetu naho kwa uwo chawaligita wantu ambawo wakumbwa kwa mligano wa Chohile. ¹⁰ Mo mlomo uwo uwo lwalonga mbuli za kujimbika na maligito, walukolo wangu mbuli zino hazikungwa kutendeka. ¹¹ Sima dimwe dyadaha kulavya mazi matana na yesungu. ¹² Walukolo weyangu mti wa mtini wadaha kweleka matunda ya mizeituni hegu mzabibu weleka matunda ya mtini? Soko ya mazi yemuyu haikudaha kulavya mazi yempeho. ¹³ Ni yuhi mgati mwenyu ana ubala na umanyi basi mntu uyo nalagise wikazi wedi mwe ndima yakwe kwa kunyanyahala ukulawana na ubala. ¹⁴ Mna uneva mnavinyulu vimemile na ubafu mwe myuye yenyu msekwefenya naho msekulonga lulimi mkahigana na chindedi. ¹⁵ Uno suwo ubala udya ukusela kulawa kulanga mna yano ni ye isi siyo ya muye ni ya kimpepo. ¹⁶ Kwa ivyo hantu hana chinyulu na ubafu aho hana nkumbizi na chila ntendwa za wavu. ¹⁷ Mna ubala ukulawa kulanga ni mtana naho waunga utondowazi, mbazi, kuhola, kutenda yedi, hewina kuhingiza, wantu wamwe na chindedi. ¹⁸ Naho tunda dya chindedi dyahandwa mwe utondowazi kwa wadya wakutenda mbuli ya utondowazi.