¹ Soni haluse nyuwe mwi wagoli ilani kwa nguto za kulanga mwe masulumizo yakwiza kwenyu. ² Ugoli wenyu ubalangwa suche zenyu zidigwa ni wadudu wabanasi. ³ Zahabu zenyu na hela zenyu ziswesa utana na ubanasi wakwe na ukule mwe nyu na kubalanga imili yenyu saviya moto mwetutikiza wenyu mwe zuwa dya uhelo. ⁴ Kaulani maliho ya wadamanya ndima wadya ambawo hemnati kuwaliha ya kuvuna mwe izinkonde zenyu waila na ndilo ya wadya wavunile izinkande zenyu kuyabwila mwamagutwi ya Zumbe wa udahi. ⁵ Mwikala kwa mbwedo we isi mwahomola nyuwe wenye mneneha mwe myuye yenyu mwe mazuwa ya kuchinja. ⁶ Mkata na kumkoma mta chindedi hekudaha kuahiga. ⁷ Mna jijimizani walukolo kubula aho nezile Zumbe saviya mlimi akugoja kuvuna nkande ikulawa mwe isi akugoja kwa ujijmizi wakwe kubula fula za nkongo na ziya za udumo zukanya. ⁸ Naho nyuwe mtende wajijimizi mtoge imyuye yenyu kwa viya kwiza kwakwe Zumbe kwihajihi. ⁹ Walukolo msekung'ung'uzikilana wenye kwa wenye chani mnase kukantilwa kaulani mkanti kachimala ho lwivi. ¹⁰ Mna walukolo kaulani masulumizo na ujijimizi wa waoni walongile mwe zina dya Chohile. ¹¹ Kaulani chawetanga wadya wajijimize mpeho mwiva ujijimizi wa Ayubu naho mdimanya idyo dya Zumbe kwa chausa cha Ayubu ni kwa namnani Zumbe kamema mbazi na wedi. ¹² Mwa yose walukolo weyangu msekwelisa kwembingu hegu kwe isi hegu kwelisa kwa namna ntuhu taile yenyu itende taile bule yenyu itende bule chani mnase kugwela hasi mwe ukanti. ¹³ Kuna yoyose mgat mwenyu anamasulumizo mna alombeze kwani mntu yoyose ni wakusangula acheme ntunyo. ¹⁴ Kwani hakuna yoyose mgati mwenyu mwenye unyonje nawetange wadlahala wa vikilo walombeze wakamhaka mavuta mwe zina dya Zumbe. ¹⁵ Nakulombeza kwa utondowazi kwa mhonya umnyonje na Zumbe amwinule hegu kadamanya masa Chohile na amlekeile. ¹⁶ Ivyo mweile wenye masa yenyu wenye kwa wenye na lombezo dya chila yumwenga na mnyawe chani mdahe kuhonywa lombezo dya mwenye chindedi dyeleka ulailo mkulu. ¹⁷ Eliya nandile mntu mta fanyanyi saviya za suwe kalombeza kwa kuhikiliza fula isekunya niyo hainyele mwe isi kwa mazuwa ya mihilimo mitatu miezi mtandatu. ¹⁸ Niyo Eliya alombeza naho izimbingu zileta fula mlanga mwe isi na isi ilavya nkande. ¹⁹ Walukolo weyangu hegu yoyose mgati mwenyu anazaganya kulawa mwe chindedi niyo mntu mtuhu amvuza. ²⁰ Hembu namanye kugamba yoyose akulongoza ana masa kumlawa mwe sila yakwe yo kubalanga na mhonye kulawa mwe file naho nagubike yalozize masa.