¹ Ivyo mntu yumwenga akwitangwa Anania, na Safila mkaziwe, nawataga hantu ho ugoli, ² naho niyo wafisa hante he hela watagile watagile, mkaziwe naye nakadimanya dino, niyo aleta hantu hasigale na kwika mwe viga vya wasigilwa. ³ Mna Petulo niyo amgamba, Anania, kwambwani mwavu, kaumemeza umuye wako kulonga lulimi kwa Muye Akukile na kufisa hantu ho ugoli we nkonde? ⁴ Mna hadya nendile hainati kutagwa, hayendile ni ugoli wako? na bada ya kutangwa hayendile hasi ho kunga kwako? itenda zeze ufanyanye imbuli ino mo muye wako? Huwatantile wantu mna kumdanta Chohile. ⁵ Mo kwiva izmbuli zino Anania niyo agwa hasi na kubanika. Naho woga mkulu niyo wawezila wose wevile dino. ⁶ Wambwanga niyo weza na kumjela mwe sanda, na kumwigala kuse na kumhamba. ⁷ Bada ya masaa matatu vino, mkaziwe niyo engila mndani hamanyize ni mbawani chiya chandile chimlaile. ⁸ Petulo niyo, ''amgamba, nigambila hegu mtaga inkonde kwa chiasi icho, niyo .''Amgamba nivyo, kwe chiasi icho.'' ⁹ Petulo niyo amgamba itenda vivihi kugamba mwivana kwa hamwenga kuujeza muye wa Zumbe? Kaula viga vya wadya wamzingile mgosiwo viholwivi, naho nawakwinule na kukwigala kuse. ¹⁰ Chimpupa niyo agwa mwe viga vya Petulo, niyo abanika, naho wadya wambwanga niyo weza kundani wambwila kabanika kale. Niyo wamwinula niyo wamwigala kuse na kumhamba hajihi na mgosiwe. ¹¹ Woga mkulu niyo weza mlanga mwe divikilo jima naho mlanga mwa wose wevile izimbuli zino. ¹² Vilagiso vilizize na mpintuko nendile vikalaila mgati mwa wantu kujinkila mikono ya wasigilwa, nawatenda hamwenga mwe ulwazo wa Sulemani. ¹³ Mna hamna mntu mtuhu chinyume endile na ukankalu wa kulungana nawo hata ivyo nawenkwa tunyo mwa wantu. ¹⁴ Naho wazumizi walozize nandile wakaongezekela kwa Zumbe fyo kulu dya wagosi na wavyele. ¹⁵ Ciasi kugamba wawenula mwe izisila na kuwagoneza mwe izisazi na mwa makochi chani kugamba Petulo uneva akajinka chizuli chakwe chidahe kusela mlanga mwawo. ¹⁶ Aho naho fyo kulu dya wantu naweza kulawa kwe mizi izunguluke Yelusalemu wawaleta wanyonje wose wahagalwe na muye mchafu na wose niyo wahonywa. ¹⁷ Mna mlavyantambiko mkulu niyo enuka, na wose wendile hamwenga naye awo weli wa zehebu dya Masadukayo wamemwa ni finju. ¹⁸ niyo wanyolosa imikono yawo, kuwagwila wasigilwa na kuwaika mndani mwe dijeleza dya hamwenga. ¹⁹ mgati mwe chilo mndima ywa Zumbe niyo afungula izinyivi ze dijeleza na kuwalongoza kweise na kulonga. ²⁰ Hitani mkachimale mwe inyumba inkulu na kuwagambila wantu mbuli zose za ujima uno. ²¹ Weze weve idyo, nawengila mwe nyumba inkulu mwe chipindi kuchele na kuhinya . Mna mlavyantambiko mkulu keza na wose endile nawo na kutanga chitala chose kwa hamwenga na wadalahala wose, na wantu wa Izulaeli na kuwasigila mwedijeleza chani wawlete wasigilwa. ²² Mna wandima waiteile, hawawabwile mwedijeleza, niyo wauya na kulavya ulosi. ²³ Chibwila jeleza divugalwa vyedi naho wamizi wachimala mo lwivi mna chize chivugule, hachiwone mntu mndani. ²⁴ Mna chipindi mkulu ywa wankondo wa nyumba nkulu na walavyantambiko wakulu weze weve izimbuli zino, wengilwa ni kwehelwa kwa chausa chawo wakafanyanya naitende zeze imbuli ino. ²⁵ Mntu yumwenga niyo eza na kuwagambila, wantu muwaikiye mwe dijeleza wachimala mwe nyumba nkulu yo kuvikila wawahinya wantu. ²⁶ Ivyo mkulu ywa wankondo kaita hamwenga na wandima, naho niyo wawleta mna ukaleka kudamanya fujo, kwa viya nawakawogoha wantu hegu wadaha kuwatowa kwa mayuwe. ²⁷ Weze waheze kuwaleta, niyo wawika kulongozi kwe chitala, mlavyantambiko mkulu niyo awauza. ²⁸ Niyo agamba, nachiwagamba msekuhinya kwa zina dino, naho mwichei mwimemeza Yelusalemu kwa mahinyo yenyu, naho kubesa kuileta sakame ya mntu uyno mlanga mwetu. ²⁹ Mna Petulo na wasigilwa watuhu niyo wahitula, Vyaungwa chimwive Chohile ukaleka wantu. ³⁰ Chohile ywa tati zetu nakamuyusa Yesu, mumkomile, kwa kumlungika kulanga ko mti. ³¹ Chohile kamtunya mo mkono wakwe wa kulume, nakumtenda kutenda mkulu na mwambula, kulavya malombezi kwa Izulaeli na kulekeilwa kwa masa. ³² Suwe chi waukuzi wa mbuli zino, na Muye Ukukile uwo Chohile kaulavya kwa wadya wakumtunya. ³³ Mzumbe we chitala weze weve vino, niyo watozwa ni maya niyo wonga kuwakoma wasigilwa. ³⁴ Mna Falisayo akwitangwa Gamalieli, mhinyi wa sigilizi, atunyigwe ni wantu wose, nakachimala na kuwalonga wasigilwa waguhigwe kweise kwa chipindi chijeche ³⁵ Niyo awagambila, wagosi wa Izulaeli, msinyise chiya mkungisa kuwadamanyiza watuntu wano. ³⁶ Kwaviya mazuwa yajinkile, Teuda nakenuka na kwigamba ni mntu mkulu, wawazwa wa wantu wendaga magana milongo nime wautongele. Niyo akomwa, na wose wendile wakamtunya niyo wasanyika na kwaga. ³⁷ Ukaleka mntu yno Yuda Mgalilaya kenuka mazuwa yadya ya kuwandikwa sesa niyo awavuta wantu walozize mnuyma mwakwe. Uyo naye niyo aga na wose endile wakamtunya niyo wasawanika ³⁸ Haluse nawagambila, kwenegeni na wantu wano naho muwaleke wenye, kwaviya saviya mwalo uno hegu ndima ino ni ya wantu naidulwe. ³⁹ Mna uneva ni ya Chohile hamwidahe kuichinda, mwadaha kubwila kugamba mwahigana na Chohile ivyo, nawahembelezwa na ulosi wakwe. ⁴⁰ Niyo wawetanga wasigilwa mndani na kuwatowa na kuwahuluta naho nakuwgamba, wasekulonga kwa zina dya Yesu. ⁴¹ Wahalawa kulongozi kwa chitala welelwa kwa viya wawazizwa kuwagila kukantilwa naho kuswesa ntunyo kwa chausa che idizina idyo. ⁴² Ivyo chila zuwa, mndani mwe inyumba inkulu kulwa kaya kubula kaya kjendeleza kuwahinya na kuzilonga mbuli zedi za Yesu kugamba ni mkombola.