¹ Haluse Petulo na Yohana nawandile wakajendeleza mwe nyumba ye divikilo chipindi mo kulombeza saa kenda. ² Mntu yumwenga aholomale kukongela kwelekwa nandile akelekwa chila zuwa na kulambalikwa mweinchili ye idivikilo ukwitangwa mtana chani adahe kulombeza hela mwa wantu wakwingila mwe idivikilo. ³ Eze awawone Petulo na Yohana wehajihi kwingila hedivikilo niyo alombeza hela. ⁴ Petulo niyo amzingatiya hamwenga na Yohana niyo amgamba "Chisinye suwe." ⁵ Ahohomale niyo awasinya akamanya nenkwe chintu chochose kulaila kwawo. ⁶ Mna Petulo niyo amgamba, "Matundu na ugoli miye sina mna ciya ninanacho nahwinke, mwa zinz dya Yesu Kulisito wa Nazaleti, jenda." ⁷ Petulo niyo amguha no mokono wakwe wa kulume niyo amwinula kulanga nkanana imwenga iviga vyakwe na izinkungu zakwe niyo zapata nguvu. ⁸ Niyo apilika kulanga mntu aholomale niyo achimala niyo akonga kujenda niyo engila mwe divikilo hamwenga na Petulo na Yohana akajenda na kupilika na kumtogola Chohile. ⁹ Wantu wose wamuwona akajenda akamtogola Chohile. ¹⁰ Niyo wabunkula kugamba ni yudya mntu nandile akekala akalombeza hela henchili intana ye divikilo niyo wamema ni kwehelwa kuzimbala kwa yadya yalaile kwakwe. ¹¹ Ivyo nandile awang'ang'anila Petulo na Yohana wantu wose kwa hamwenga niyo wagulukila kwe nkamba ikwitangwa ya Sulemani, wakehelwa vidala. ¹² Petulo eze awone dino uyo niyo awahitula wantu, "Nyuwe wantu wa Izulaeli kwambwani mwehelwa? kwambwani mwachisinya suwe saviya kugamba chimtenda yuno ajende kwa nguvu zetu suwe wenye hegu kwa wedi wa Chohile?." ¹³ Chohile ywa Ibulahimu wa Isaka na Yakobo Chohile ywa watati zetu kamtunya msigilwa ywakwe Yesu. Yuno nuyo nyuwe mumwinkize na kumlemela kulongozi kwo uso wa Pilato, hata hegu uyo nandile kaunga kumlekeila. ¹⁴ Na mumlemeila Akukile na mtakwagilwa chinyume chakwe niyo monga mkomi alekelwe . ¹⁵ Nyuwe namumkoma Zumbe wa ujima mna Chohile niyo amuyusa kulaila kwa wabanike suwe chiwaukuzi wa dino. ¹⁶ Hluse kwa utondowazi mwe dizina dyakwe mntu yuno uyo mwamuwona naho mummanya na katakutenda nguvui utondowazi uwo wapatikana kwa Yesu imwinka yeye ujima uno wa ngingingi kulongozo kwenyu nyose. ¹⁷ Haluse walikolo simanya kugamba namdamanya mwe uhezi nivyo naho wadamanye vilongozi wenyu ¹⁸ Mna mbuli izo Chohile kawakambila mapema kwa milomo ya wawoni wose kugamba yuno Kulisito na asulumizwe vidala kayachintiza. ¹⁹ Ivyo kweileni naho mhituke chani kugamba masa yenyu yadahe kuswa kabisa chani ibule misimu ya kubweda kulawana na wiyaho wa Zumbe. ²⁰ Nagamba adahe kusigila Kulisito uyo asagulwe kwa chausa chenyu, Yesu. ²¹ Uyo nuyo akungwa ulanga umhokele kubula msimu wa kuvuzwa vintu vyose ivyo Chohile avilongelaga kale kwa milomo ya wawoni wakukile. ²² Chindedi Musa agamba Zumbe Chohile nenule muwoni saviya miye kulawa mwa walukolo wenyu na mmwive mwe chila chintu akunga awagambileni. ²³ Nailaile kugamba chila mntu uyo hamwive muwoni uyo na akomwe amlawe mgati mwa wantu ²⁴ Hwye na wawoni wose Samweli na wadya watongele bada ya uyo walongaga na kulonga amazuwa yano. ²⁵ Nyuwe mwi wana wa wawoni na walagano dya Chohile atende hamwenga na wababa saviya alongile kwa Abulahamu klulawa mwe imbeyu yako nkolo zose za mwe isi nazijimbikwe. ²⁶ Ukajika Chohile kamwinula mndima ywakwe nakamsigila kwenyu kwenyu nkongo chani awajimbike nyuwe kwa kuhituka kulaila mwa masa yenyu.