¹ Paolo niyo awasinya wantu we chitala awagamba walukolo weyangu sikala kulongozi kwa Chohile vyedi kubula vino dyelo. ² Mlavyantambiko mkulu Anania niyo awagamba wadya wachimale hajihi naye wamtowe umlomo wakwe. ³ Niyo Paolo amgamba Chohile nakutowe weye, chiwambaza chihakigwe chokaa weye kwikala kunikantila kwa kanto weye walagisa nitoigwe chinyume cha kanto? ⁴ Wadya wachimale hajihi naye wamgamba, vino ivyo ukumhuluta mlavyantambiko mkulu wa Chohile? ⁵ Paolo niyo agamba, walukolo miye simanyize kugamba, yuno ni mlavyantambiko mkulu kwa viya idolonywe kugamba, haulonge vihiye kuhusu mkulu ywa wantu wako. ⁶ Paolo eze awone kugamba ntendele imwenga ni Masadukayo na awtuhu ni Mafalisayo, niyo aguta agamba, walukol miye ni Falisayo, mwana ywa Mfalisayo, na kwa chausa chino nasinyiza kwa ukankalu, uyuso wa wabanike, uno hukantilwa nawo. ⁷ Eze alonge ayo niyo kwalaila mhigano mkulu mwa Mafalisayo na Masadukayo, mdugano niyo watulika. ⁸ Kwa viya Mfalisayo wagamba hakuna kuyuswa, wandima wa kwembingu hegu muye, mna Mafalisayo wagamba vyose viyuko. ⁹ Mhigano mkulu niyo walaila na wadolonya, wendile mwe intendele ya Mafalisayo, niyo wachimala wakalosana akagamba, hachwone chochose chihiye chikumlanga mntu yuno. Chamanya zeze hegu mpeho hegu mndima wa kwembingu kalonga naye? ¹⁰ Chipindi icho niyo kwalaila ulosi mkulu, mkulu ywa nkondo kogoha kugamba Paolo nakasawaniswa matili tili ni wowo, niyo awagamba wankondo wasele wakamlete kwa ukankalu kulawa kwa Mazumbe we ichigwena, wamlete kwe ingome. ¹¹ Chilo chitongele Zumbe niyo achimala hajihi na yeye amgamba, usekogoha kwaviya, kuwagambila Yelusalemu ivyo no lavye ukuzi mwe Loma . ¹² Eze kutandazuke, Wayahudi awamwenga niyo walagana na kweligita niyo wagamba hawadye, hegu hawanywe chochose kubula wamkome Paolo. ¹³ nandile nakuna wantu wakujinka milongo mine, wadamanye ichinyele icho ¹⁴ Niyo waita kwa wakulu wa walanyantambiko na wdalahala wawgamba, cheikiya wenye ligito kulu, chisekudya chochose kubula chimkoma Paolo. ¹⁵ Haluse, ichtala chimgambile umkulu amlete kwenyu kugamba mwalamula mbuli yakwe vyedi, suwe chemalanya kale kumkoma henati kubula hano. ¹⁶ Mna wana wa lumbu dyakwe Paolo, nakeva kugamba nakwendile na njma, niyo aita engila mndani mwe ingome na kumgambila Paolo. ¹⁷ Paolo niyo amwitanga yumwenga ywa wakulu, amgamba mguhe yuno mbwabga kwa mkulu ywa wankondo kwaviya anambuli akunga awagambile. ¹⁸ Niyo mkulu ywa wankondo niyo amguha yudya mbwanga niyo amwigala ko mkulu ywawo niyo amgamba, Paolo yudya umsigitwa nakanitanga huletele yuno mbwanga ana mbuli ya kukugambila, ¹⁹ mkulu ywa wankondo niyo amtoza mkono niyo esangula naye hankanda niyo amuza wonga unigambile mbwani? ²⁰ Yudya mbwanga amgamba, Wayahudi wevana kukulombeza, umwigale Paolo luvi kwe chitala saviya kugamba wonga wapate imbuli yakwe vyedi vitendese. ²¹ Ivyo weye usekuzumila kwa viya wantu wakujinka milongo mine wamnyatila. Wetaliza kwa ligito, wasekudya na kunywa kubula wamkome. Vino haluse wemalanya kale, wakagoja ivyo ukunga ulonge. ²² Niyo yudya umkulu wa wankondo amlekela yudya umbwanga aite zakwe, eze amgambile, usekumgambila mntu yoyose kugamba kunigambila yano. ²³ Niyo awetanga wakulu waidi wamalanyeni wankondo magana maidi waite Kaisalia na wankondo wakwela falasi milongo chinda, na wata maguha magana maidi, mamhalawe zamu ya katatu ya chilo. ²⁴ Niyo amgamba tendani wanyama kabisa awo Paolo namsigile na na kumguha vyedi kwa Feliki Gavana. ²⁵ Niyo adolonya baluwa ya vino. ²⁶ Klaudio Lisia kwa Liwali mkuka Feliki, ndamsa. ²⁷ Mntu yuno nakagwilwa ni Wayahudi hajihi na kumkoma, niyo aita hamwenga na fyo dya wankond, niyo amhonya, ezenipate kugamba yeye ni mwikazi wa Lumi. ²⁸ Nasunga nimanye kwambwani wamlaha, niyo wamwigala kwechitala. ²⁹ Niyo nabunkula kugamba, alahwa, kwa chausa cha maswali ya lagizo, mna hakantilwe kwa mbuli yoyose ikumfaha hegu naho kusigitwa. ³⁰ Niyo amanyika kugamba kuna chigwena chikumhusu yeye, niyo kwa kinguvu nguvu simtuma kwako, niyo nawalagisa wakunilaha nawo walete imbuli yakwe kwako niyo walagana. ³¹ Wadya wankondo niyo watongela, niyo wamwigala Paolo kubula Antipatri nechilo. ³² Zuwa ditongele wankondo walozize niyo wawasa wakupanda izifalasi waite naye, wowo niyo wauya zawo kweingome.. ³³ Wakupanda izifalasi, eze wabule Kaisalia na kumwinka, Liwali idya ibaluwa, niyo wamwinka Paolo kulongozi kwakwe. ³⁴ Uyo Liwali eze aisome ibaluwa, niyo amuza Paolo kalaila kuhi, eze amanye kugamba ni mntu ywa Kilikia, ³⁵ amgamba, nahwive weye aho nawizile, wadya wakulu wawo wakukulaha niyo agamba aikwe mwe ikaya ya Helode.