¹ Ezezijinke izimbuli izo Paulo niyo ahalawa Athene aita Kolitho. ² Uko ampata Myahudi akwitangwa mntu wa niyka dya Ponto yeye na mvyele ywakwe akwitangwa Plisika naweza kulawa uko Italia kwa viya Klaudia nakalonga Wayahudi wose wahalawa Roma Paulo eza kwawo. ³ Paulo kekala na kudamanya ndima nawo kwa viya yeye adamanya ndima ikuligana neiyo, wowo wendile ni wadamanya mavulu. ⁴ Paolo alafya nawo mwe vikilo chila zuwa nakawakwesa Wayahudi hamwenga na Wagiliki. ⁵ Mna Sila na Timoseo weze weze kulaila Makedoniya Paolo niyo asindikizwa ni Muye Ukukile kuwaukuila kugamba Yesu nuyo Kulisito. ⁶ Niyo Wayahudi weze wamtowe na kumbela ivyo Paolo niyo akung'unta suche zakwe kulongozi kwawo nakuwagamba isakame yenyu naitende kulanga mwe mitwi yenyu wenye miye sina masa kukongela haluse na kujendeleza naho nawaitila we izisi. ⁷ Ivyo akahalawa kulaila hadya aita mwe nyumba ya Tito Yusto mntu akumvikila Chohile inyumba yakwe ihaguhe ne divikilo. ⁸ Krispo chilongozi ywa vikilo hamwenga na wantu we nyumba yakwe wamzumila Chohile wantu walozize wa Kolitho wamwivile Paolo akalonga nawo wazumilwe na kwambulwa. ⁹ Zumbe niyo amgambila Paolo nechilo kwa sila ya sizi usekogoha mna ulonge naho usekunyamala. ¹⁰ kwaviya miya ni hamwenga na weye naho hahali akudaha kukusulumiza kwa viya nina wantu walozize mo mzi uno. ¹¹ Paolo niyo ekala uko kwa mhilimo umwenga na nusu akahinya ulosi wa Chohile mwa mgati mwawo. ¹² Mna Galio eze adamanywe mkulu ywa kaya Wayahudi nawachimala hamwenga kumhiga uyo Paolo na kumwigala kulongozi kwe chiti cha ichitala. ¹³ Niyo wakalonga mntu yuno eza kuwakwesa wantu wamvikle Chohile chinyume chikuhigana ne isigilizi. ¹⁴ Ambaho Paolo aho nendile akaunga kulongaGaloi niyo awagamba Wayahudi nyuwe Wayahudi nendile ni mbuli hegu naho abalanga nendile ni vyedi kuwadamanyiza. ¹⁵ Mna kwa viya ni mahigano yakunga ulosi na mazina na sigilizi zenyu elo makunto tendani wenye miye nasunga kutenda mliganyi we izisigilizi zino. ¹⁶ Galio awagamba wahalawe kulongozi kwe chiti cha makunto. ¹⁷ Ivyo niyo wamgwila Sostene mlongozi ywa nyumba ya vikilo niyo wamtowa kulongozi kwe chiti cha makuntomna Galio hawone ivyo wadamanye ¹⁸ Paolo eze ekale hadya mwe mazuwa yalozize awasa walukolo niyo aita kwe meli Siliya hamwenga na Plisika na Akwila. henati kuhalawa bandalini nakamoga izifili zakwe kwa viya nendile kelisa kwa cheliso. ¹⁹ Weze wabule Paolo niyo awasa Plisika na Kwila hadya mna yeye mwenye niyo engila mwe nyumba ye divikilo kulafya na Wayahudi. ²⁰ Eze wamgambile Paolo niyo ekala nawo mwe mazuwa yolozize yeye nakalemela. ²¹ Mna niyo ahalawa kwawo niyo awagambila nanuye naho kwenyu uneva ni ungi wa Chohile niyo aho ahalawa kwa meli kualwa Efeso ²² Paolo eze achime Kaisalia akwela kwita kulamsa mwe nyumba yo kuvikila ya Yelusalemu niyo asela hasi mwe nyumba ya kuvikila ya Antiokiya. ²³ Eze ekale mwe mazuwa hadya Paolo niyo ahalawa kunyilikila hantu ha Galilaya na Frigiya na kuwajela muye wahinyi wose. ²⁴ Myahudi yumwenga akwitangwa Apolo elekwe uko Elikizandiya niyo eza Efeso nendile na umanyi mo kulonga na umanyi mwe mawandiko. ²⁵ Apolo nendile kagambilwa mwe mahinyo ya Zumbe kwa viya nakaungisa kwakwe mwe muye nakalonga na kuhinya kwa uchindedi mbuli zikumlanga Yesu mna nakamanya ubatizo wa Yohana. ²⁶ Apolo niyo akonga kulonga kw2a ukankalu mwe nyumba yo kuvikila mna Plisika na Kilwa weze weve wadamanya umbuya naye niyo wamgambila ne yesila ya Chohile kwe ichindedi. ²⁷ Eze aunge kuhalawa kwita Akaya walukolo wamjela muye na kuwawandila baluwa wanampina weyuko Akaya chani wapate kumhokela. Eze abule mwe ujimbiko nakawambiza vidala wadya wazumile. ²⁸ Mwa mahigano yakwe no ubala Apolo kawahuma Wayahudi mwe bunga akalagisa kujinkila mawandiko yakugamba Yesu nuyo Kulisito.