¹ Wanetu wasiku wasela kulaila Uyahudi na kuwahinya walukolo, wakawagamba hanajeligwe ngasu saviya mazela ya Musa, hamkudaha kuvululwa. ² Niyo Paolo na Banaba aho wendile wakahigana na wakalosana hamwenga nawo, walukolo nawakaunga kugamba Paolo na Banaba na watuhu wasiku waite Yelusalemu kwa wasigilwa na wadalahala kwa chausa che idiswali dino. ³ Ivyo kwa kulagizwa kwawo naho kwe divikilo, wajinkila Feoinike na Samaliya wakalonga kuhitulwa muye kwe isi waleta kwelelwa vidala kwa walukolo wose. ⁴ Aho wezile Yelusalemu nawahokelwa ni vikilo na wasigilwa na wadalahala naho niyo walavya ulosi we izimbuli zose ziya Chohile adamanye hamwenga nawo. ⁵ Mna wantu wasiku wazumile, wendile we idibunga dya Mafalisayo, nawchimala na kugamba, vyongwa wajelwe ngasu na kuwagambila waitozen isigilizi ya Musa. ⁶ Ivyo wasigilwa na wadalahala nawachimala hamwenga kuwazagula dino idiswali. ⁷ Naumo walosane vitendese, Petulo nakachimala na kulonga kwawo, walukolo mwamanya kugamba chikale chedi chijinkile kadamanya sagulo mgati mwenyu kugamba kwa mlomo wangu izisi zive mbuli zedi na kuzizumila. ⁸ Chohile akamanya imyuye, aukula kwawo, awenka Muye Ukukile, saviya adamanye kwetu, ⁹ naho hadamanye hevikuligana mgati mwetu na wawo akaitenda imyuye yawo yedi kwa utondowazi. ¹⁰ Ivyo, kwambwani mwamjeza Chohile kugamba mwike ngole mlanga mwe izisingo za wanampina iyo hata tati zetu hegu suwe hachidahile kujijimiza. ¹¹ Mna chazumila kugamba nachilekeilwe kwa wedi wa Zumbe Yesu, saviya weli. ¹² Bunga dyose dinyamala aho wendile wakamtegeleza Banaba na Paolo aho wendile wakalonga ulosi wa chilagiso na maula ayo Chohile adamanye hamwenga nawo mgati mwa wantu we isi. ¹³ Weze waleke kulonga, Yakobo kalandula akagamba, Walukolo netegelezani. ¹⁴ Simoni nakamtambalisa, ivyo , nkongo Chohile kwa wedi nakawambiza we izisi chani epatile kulawa kwawo wantu kwa chausa cha zina dyakwe. ¹⁵ Ulosi wa waoni wevana, na dino saviya idolonywe. ¹⁶ Zikaheza mbuli zino nanuye na kuzenga naho vulu dya Daudi, diya digwele hasi, naninule na kuyusa ubanasi wakwe, ¹⁷ chani kugamba wantu wasigale wamlonde Zumbe hamwenga na wantu we izisi wetangwe kwa zina dyakwe. ¹⁸ Vino niyo akulonga Zumbe adamanye mbuli zino zimanyike kukongela chikale chijinkile. ¹⁹ Ivyo haluse, kuhembeleza kwangu, ni kugamba chisekuwenka nkunto wantu we izisi wamhitukile Chohile, ²⁰ Mna chidolonye kwawo kugamba wenege hale na ubanasi wa matukulu, tamaza za kugonya wavyele wa wenye vinyogotolwe na sakame. ²¹ Kulawa vyeleko vya wadalahala kuna wantu mwe chila mzi ukulonga mbuli zedi na kumsoma Musa mwe zinyumba za mavikilo chila zuwa ya sabato ²² Ivyo, niyo yawonekana kugamba iwaelela wasigilwa na wadalahala, hamwenga na mavikilo yose, kumsagula Yuda akwitangwa Balisaba, na Silasi, awo wendile vilongozi we divikilo na kuwasigila Antiokia hamwenga na Paolo na Banaba. ²³ Nawadolonya vino,Wasigilwa na wadalahala na walukolo, kwa walukolo wa mwe zisi weyuko Antiokia, Shamu na Kilikia chawalamsa. ²⁴ Nachiva kugamba wantu wasiku ambawo hachiwapatile lagizo idyo, nawalawa kwetu, na kuwavinya kwa mahinyo nkongo mndani mwetu. ²⁵ Ivyo, iwoneka vyedi kwetu chose kusagula wantu na kuwasigila kwenyu hamwenga na waungwa wetu Banaba na Paolo, ²⁶ wantu wendile wakauhosa ujima wawo kwa chausa cha zina dya Yesu Kulisito. ²⁷ Kwaviya chimtuma Yda na Sila, nawawagambile mbuli yawo iyo. ²⁸ Ivyo iwonekana kugamba ni vyedi kwa Muye Ukukile na kwetu, kusekwikwa mlanga mwetu mzigo mkulu kujinka mbuli zino zoujima. ²⁹ Kugamba mhituke kulaw mwe vintu vikulavigwa kwa matukulu, sakame, vintu vya kunyogotola, na kugonyana. Uneva nawikale hale na vino, navitende vyedi kwenye mpeho yedi. ³⁰ Mna ivyo, wasambale, nawaseila Antiokia, bada ya kuchisanya bunga dimwenga, nawegala ibaluwa. ³¹ Weze waisome, iwelelwa kwa viya wajeligwe moyo. ³² Yuda na Sila na waino, wawjela moyo walukolo kwa mbuli zilozize na kuwajela nguvu. ³³ Bada ya kwikala chipindi chisiku uko, niyo wawpanga na kwa utondowazi kulawa kwa walukolo kwa wadya wawasigile. ³⁴ [Mna naiwonekana vitana Sila kusigala uko.] ³⁵ Mna Paolo na watuhu nawekala Antiokia hamwenga na watuhu walozize aho nawakahinya na kulonga mbuli zedi za Zumbe. ³⁶ Bada ya nkanana chidogo Paolo nakalonga kwa Banaba, Nachuye haluse, naho nachikawatalamkila walukolo mwe chila mzi umo chilongile mbuli za Zumbe na kuwakaula ivyo weli, ³⁷ Banaba akaunga kumguha naho hamwenga na Yohana etangwe Mako. ³⁸ Mna Paolo nakafanyanya haitendile vyedi kumguha Mako, awalekile uko,Pamfilia naho hajendeleza nawo mwendima. ³⁹ Mna aho nahalaila mahigano makulu ivyo, niyo walekana na Banaba nakamguha Mako na kutamba kwa meli kubula Kiplo, ⁴⁰ mna Paolo nakamguha Sila na kuhalawa bada ya kwinkigwa walukolo mo wedi wa Zumbe. ⁴¹ Naho kaita kujinkila Shamu na Kilikia, akayatogeza mavikilo.