¹ Hano miaka ikumi neene nikakya kweeki Yerusaremu hamwe na Barnaba. Kweki nikamugega Tito hamwe na ninye. ² Nikagenda kwa amang'ana ge Eriobha ekanierekwa kunenye kubha nihenderwa kugenda. Nikatura kubhukangati bhwabhu ekiina kino nikararika kuubhatu bhekyaro. (Nawe nikakerenia kwe ekizina kubhano bhakakerenibha kubha niabhakangati hene). Nikakoreego ninagye kubha niari nitakuryara, hamwe nikaryara bhusa. ³ Nawe bhoono Tito, wuno yari namwe na neenye, yaari Muyunani akahatikwa kusarwa. ⁴ Eng'ana yino ekarorekakana kwa amang'ana gaabhahiri bho orurimi bhano bharaza kweekizina okwihuzirirya okutazurwa kuno twari tunakwe gati ya Kristo Yeesu. Bhakakong'era okutukora etwe okubha abhabhagati bheerihatike. ⁵ Tutirusurye okubhasuka naabhe kwe eribhaga rimwe kwookubha ekina kyeeheene kisage kitaza kuukyosibhwa kwemwe. ⁶ Nawe bharya bhano bhakabhuga bhano bhari abhakangati bhatasororerye kyokyosi kunenye. Kyokyosi kino bhari bhakukikora kitari na morimo kunenye. Eriobha ritakwikirirya obhusegi kuubhatu. ⁷ Kumenya gwye bhakandora kubha nisigirwe kukirarika ekina mubharya bhano bhatasarirwe. Yaari kyeego Petro ararike ekina kuubhano bhasarirwe. ⁸ Kwookubha Eriobha, kuuno akoriri emirimo mwoosi wa Petro kubhubhgati kubharya bhano bhasarirwe, hayo akakora emirimo mwoosi wane kuubhatu bhaamubhyaro. ⁹ Kwiibhaga Yakobo, Kefa, na Yohan, bhano bhakamenyekena kubha bhakombaka erisesngerero, bhakamenya orubhango runo bhaniheri enye, bhakatugwatira gati kuubhugwatani enye na Barnaba. Bhakakorego kwookubha tugende kuubhatu bhaaamubhyaro, nookubha bhaanagye okugenda kubharya bhasarirwe. ¹⁰ Nawe bhakatweenda etwee okubhahituka abhataka. Enye nawe nari ndigomba kukora eng'ana yino. ¹¹ Eribhaga Kefa hano akaaza Antiokia, nikamuhakania mwasi mwasi kwa amang'ana yari asarirye. ¹² Inyuma waabhatu abharebhe okuuza okurwa kuu Yakobo, Kefa yabhaga ararya hamwe naabhaatu bhaamubhyaro. Nawe abhatu bhano hano bhakaaza, akatiga nokurwahu kurekaku bhaatu bhamubhyaro. Yabhaga arobhiha abhatu bhano bhaakwenda okusarwa. ¹³ Bhurya bhurya abhayahudi abhandi bhakagwatana na nkebhera ibhiri huno hamwe na Kefa. Obhuhiti bhwaye gatabha kubha Barnaba akagegwa neezinkebhera ibhiri zyabhu. ¹⁴ Nawe hano ankarora kubha bhabhanga bhatakutunirira ekina kye eheene, nikamubhurira Kefa kubhukangati bhwahu bhoosigo, "aribha niabhayahudi nawe murikara kuutemwa zya abhaatu bhamubhiaro kumweya gweetemwa zyeekiyahudi, kwaki murabhasing'irirya abhatu bhebhyaro okwikara kyaa abhayahudi. ¹⁵ Etwe bhano ni abhayahudi kwookwibhurwa neetari "abhaatu bhweebhyaro bheene amabhi." ¹⁶ Omenye kubha ataroho wuno akubharirwa eheene kwa amateemio geerihatike. Omweya gwaye bharabharirwa eheene kuheene mwoosi wa aYeesu Kristo. Tukaaza kwookwikirirya mwooosi wa Kristo neetari kumatemio geerihatike. Kuumatemio geerihatike gutaraho omubhiri guno gubharirwe eheene. ¹⁷ Nawe kyego tukurimohya Eriobha kwookutubharira eheene mwoosi waa Kristo, turinyora abhenego kweki turibha turibheene mabh,i awe Kristo akakorwa mubhagati wa mabhi? etarigo? ¹⁸ Aribha ndiza kwoomboka eritengero raane iguru wookubhika erihatike, obhutengeri bhuno namariri kubhurushaho, ndiyerekeenia omwenego kubha omubhuni weerihatike. ¹⁹ Kuhitira erihatike nakuuri kweerihatike, kuubhuyo ndenderwa kwikara kwee Eriobha. ²⁰ Nikanyakibhwa hamwe na Kristo nitari hanye kweeki wuno kwikara, kwookubha Kristo arikara mwoosiwane. Obhwikari bhuno kwikara gati wo omubhiri nirikara kweeheene mwoosi wo omwana wee Eriobha, wuno yari anisegiri naakirusha kwaa nienye. ²¹ Nitakunyaaka enookwe yee Eriobha, kwookubha eheene yabhaga eriho kuhitira erihatike, kweego Kristo yaabha akuri bhusa.