¹ Omunyosi omukuru akabhuga; amang'ana gano nigaheene? ² Stefano akabhuga, "Abhahiri na bhatata, munitegererye enye: Taatabhugya wo bhweeru akiyerekenia kutaata wetu Abrahamu kwiibhaga rino ahabha Mesapotania, hanoahabha akyari kwikara Harani, ³ akamubhurira, nooreke mukyaro kyazo muno awe na abhahiri bhazo ogye mukyaro kino nirakwerekye'. ⁴ Kyaamwe akagya muukyaro kya abhakaridayo akikara Harani, akareka hayo hano wise wabhu akakwa, Taatabhugya akamureta muukyaro kino murimu bhono. ⁵ Atamuheri kigiro kya eng'abhio yaye, hatabhonekiri hagiro hakutuura naabhe maguru. Nawe Abrahamu akabha aragirwe kwemera akyaari kubhona omwana kubha arahanwa ekyaro kibhengabho yaye na orwibhuro rwaye. ⁶ Taatabhugya akagamba nawe akabhuga, abhibhurwa bhaye bharaza kubha bhagini mukyaaro kya abhatu abhandi, nabho bharaza kubhakora bhabhagati bhabhu, no okubhakorera amabhihu kweribhaga ryeemyaka magana anne. ⁷ Taatabhugya akabhuga, ndaaza kuyitinira ekiina esi yino erabhakorea bhabhagati abhatu abhane, hanoa gayo garahite bharaza kureka mukyaro kiyo niho bharaza no okunisengera hano; ⁸ Akamuhana Abrahamu obhuragye bho obhusarwa, kweego Aburahamu akamwibhura Isaka, akamusaaara kurusiku rwa akanane, Isaka kamwibhura Yakobo, Yakobo akiibhura bhane ikumi na bhabhiri abhakaruka bheetu. ⁹ Bhasukuru bhetu bhakamurorera erihari Yusufu bhakamugurya muukyaro kya Misri, nawe Taatabhugya yaari hamwe nawe, ¹⁰ akamutuurya muunyako yaye, akamuhana ammabhira noobhusukwa embere wo Farao omutemi wa Misri. Farao akamukora abhe mukangati mukyaaro kya Misri ne enyumba yaye yoosi. ¹¹ Kyamwe erabhaho enzara kuru ne enyako nzaru mukyaaro kya Misri na Kanaani, na bhatata bhatabhweni bhyakurya. ¹² Nawe Yakobo hano akiigwa kubha ebhyakurya bhiri Misri, akabhatuma bhataata rwoobhutangi. ¹³ Kurugendo rwa kabhiri Yusufu akiyerekenia kubhawamwabhu, ehamati ya Yusufu ekamunyekana ku Farao. ¹⁴ Yusufu akabhatuma bha wamwabhubhagye bhabhurire Yakobo wise wabhu yiize Misri, hamwe ne ehamati yaye, kihiko kya bhaatu bhoosi ni mirongo muhungati na bhatano. ¹⁵ Kweego Yakobo akituma Misri; kyamwer arakwa ewe na bhatata bhetu. ¹⁶ Bhakagegwa tee Shekemu bhakabhikwa mumbhihira yino Aburahamu akagura kwe ebhitinika bhya ezihera kurwa kubhaana bha Hamori eyo Shekemu. ¹⁷ Kwibhaga ryobhurage bhurya Taatabhgya akamuraga Aburahamu hano bhahikiri haguhi, abhatu bhakabha bhuhiri eyo Misri, ¹⁸ eribhaga riyo akimukaho mutemi wundi iguru wa Misri, mutemi wuno atamenyiri iguru Yusufu. ¹⁹ Omutemi owundi wuyo akabhang'enererya abhatu bhetu no okubhakorera amabhi bha taata wetu, no okubharekera abhana bhabhu abharere bhataza kubhaho. ²⁰ Kwibhaga riyo Musa akibhurwa; ahabha muzomu embere wa Taatabhugya, akakinibhwa mieri etatu munyumba ya wise waabhu. ²¹ Eribhaga rino yarekerwe, mukya wa Farao akamugega akamukiinia kyoomwana waaye. ²² Musa akegibhwa amegyo goosi ge ekimisri, ahaabha na amanaga kumang'ana na amahokya. ²³ Nawe hano yahikirye emiaka mirongo enne, amiseego gakabha mukoro yaye agye abhataarire abhahiri bhaaye, abhana bha Israeri. ²⁴ Hano yaaruzi omwisraeri arakorerwa amabhi, Musa akamuhakania no okuriha ekisiiyomba kuwuno yari akumukorera amabhi akamutema omumisri; ²⁵ akisega kubha abhahiri bhaaya bharamenya kubha Taatabhugya arabhatuurya kwo okubhoko kwaye, nawe bhatamenyiri. ²⁶ Orusiku orundi kweki akagya kubhiisraeri abhandi bhano bhahiyogenia; akasakya okubhigwania; akabhuga; Bhaataata, Emwe ni bhahiri, ndora murasariryana emwe abhene kwa abheene? ²⁷ Nawe wuno yatindiri omunyarobho waye akamuhuna kuer, akabhuga, "Niwi akukoriri mukangati wetu na mutini wa kiina wetu? ²⁸ Awe orenda kunita, kyego okiita omumisri izo?" ²⁹ Musa akang'osa hano yigwiri gayo; akabha mugini mukyaro kya abhamidiani, akibhura abhana bhabhiri eyo. ³⁰ Hano emiaka mirongo enne gyahitiri, Maraika akiyerekenia kuneewe kukibhara kya ekiguru kya Sinai, kwo omururo mukisaka. ³¹ Hano Musa yaruzi omururo, akatang'ara nokuheema gano yaruzi, hano yasakirye kwisuka haguhi arore, eriraka rya Taatabhugya rikamuzaku rirabhuga, ³² Enye ni Taatabhugya wa bha uso wenyu, Taatabhugya wa Aburahamu, nawa Isaka, nawa Yakobo: Musa akarigita na atasakirye kurorerera. ³³ Taatabhugya akamubhurira: Rusya ebhirato bhyazo, ahagiro hano wimereri ni hagiro hoobhwaare. ³⁴ Nduzi ezinyako zya abhatu bhane bhano bhari Misri: Nigwiri okurwara kwaabhu, na nenye nitumiri nibhatuurye; bhono nauze, ndakutuma ewe ogye Misri; ³⁵ Musa wono bhahaabha bhaugiri, eribhaga rino bhakabhuga; niwi akukoriri mukangati na mutwanikania wetu? yaari niwe wuno Taatabhugya akamutuma abhe mukangati no omutuurya. Taatabhugya amutumiri kwookubhoko kwa maraika wuno akiyerekenia ku Musa mukisaka. ³⁶ Musa akabhakangata kureka Misri hano yamariri okukora amaryoryo na ebhituubhyo mukyaaro kya Misri na munyanza ya Shamu, na kukibhara kwe eribhaga ryeemyaka mirongo enne. ³⁷ Ni Musa wuno niwe yabhabhuriri abhaatu bha Israeri kubha, "Taatabhugya araza kubhimukirya omuroti kureka mubhahiri bhenyu, omuroti kya nenye. ³⁸ Wuno niomutu wuno yaari musaango ya abhaatu kukibhara na Maraika wuno akakerania anawe mukiguru kya Sinai. Wuno niwe omutu wuno ahaabhana bhataata bheetu, wuno niomutu wuno akagwata eng'ana yino enoobhuhoru kutuhaana etwe. ³⁹ Wuno ni omutu wuno bhaataata bheetu bhakanga okumusuuka; bhakamuhunira kure, na mumioyo gyabhu bhakikyorera Misri. ⁴⁰ Kwiibhaga riyo bhakamubhurira Haruni, tubhumbire erihunduguru rino riratukangata. Musa wuno, yaari atukangatiri kureka mukyaaro kya Misri, tutamenyiri kino kimubhweni". ⁴¹ Kwego bhakabhumba ekimori kuzisiku ziyo na bhakarusya ekimwese kwihunduguru ryeekimori bhakazomererwa kwookubha ye dmirimo gya amabhoko gabhu. ⁴² Nawe Taatabhugya akabhakyoora na okubhakoora bhasengere ezinzota zya mwoisaro, kyeego yaari ekaamirwe kumang'ana ga abharoti; Awe mundusirye enye ekimweso kye emitugo gino mwasinziri kukibhara kwe emiaka mirongo enne emwe enyumba ya abhaisraeri? ⁴³ Mwikirirye erihuuna ryo okusangiramu rya Moleki ne ezinzota zye erihunduguru ebhyo; na ndabhahira kure bhukong'u kuhitira Baberi.' ⁴⁴ Bhaztaata wetu bhahabha ne erihuuna ryokusangiramu ryoobherekenia kukibhara, kyeego Taatabhugya yabharagirirye hano akakerenia na Musa, kubha yariararikora kweetubho ya rirya mwaruuzi. ⁴⁵ Riho ni ihuna rino bhataata bhetu, kwibhaga ryaabhu bhakaretwa mukyaaro na Joshua. Yino ekororeka na kwibhaga rino bhasikiri okugega ekyaaro kino Taatabhugya akaheebhamu abaatu bheeenekyo kwemera bhataata weu bhakyari kubhaho. Yino yaariigo tee kuzisiku zya Daudi. ⁴⁶ Wuno akikiriribhwa mumeso ga Taatabhugya; na akasabha aokuhohya onbhwikari ku Taatabhugya wa Yakobo. ⁴⁷ Nawe Seremani akamwombokera enyumba ya Taatabhugya. ⁴⁸ Na kweego wuno ariiuru atakwikara muzinyumba zino zyombokirwe kwa amabhoko; gano ni kyeego omuroti akahaya. ⁴⁹ Mwisaro nikitumbi kyaane kya simuka, na ekyaro ni hagiro hane hakutuura maguru gane. Ni nyumbaki yino muraniombakire? arahaya Taatabhugya; hamwe ni hayi ahagiro hane hookumunyira? ⁵⁰ Kutari kubhoko kwane kuno kwakoriri bhino bhyoosi? ⁵¹ Emwe abhatu bhebhigoti bhihangararu bhano mutaakusarwa koro na amtwi, ibhaga ryoosi mutakumwenda ekoro ehoreru, murahokya kyeego bha wusowenyu bhahakora. ⁵² Ni muroti wuhe kubharooti wuno bha wuso wenyu bhatamunyakiry?. Bhakabhita abharooti bhoosi bhano bhiyerekenie kwibhaga rino owumwe weheene yaari akyari kuza, na bhoono mubheeri bhasarya na abhiiti bhaaye. ⁵³ Emwe abhatu bhano mwagwatiri emigiro girya gitakurwaho na maraika nawe mutagigwatiri". ⁵⁴ Kumara abhikari bha amiusango ya okutinira ekiina ahano bhakiigwa amang'ana gayo, bhakanyaharika mwikoro zyaabhu, bhakamushananirya ameno Stefano. ⁵⁵ Nawe ewe, ahaabha yizuribhwe ekoro ehoreru, akarorerera erisaaro kwobhwikeng'eri na akabhurora aobhwaare bhwa Taatabhugya; no okumurora Yeesu yimereri okubhoko kwoobhuryo kwa Taatabhugya. ⁵⁶ Stefano akabhuga, "Rora nduuzi erisaaro rirguka, no omwana wa Adamu yimereri okubhoko kwoobhuryo kwa Taatabhugya. ⁵⁷ Nawe abhikari bheesango yookutina ekiina bhakarora ekitiri kwe eriraka ryiiguru, bhakaribha amatwi gaabhu, bhakamuryarira bhosigo hamwe, ⁵⁸ bhakamurekera igutu woomugye na abhakamutema na amagina.: na abhatania abhakarusya ezingibho zyabhu ziigutu nookuzituura hasi haguhi na amaguru go omumura wuno abhirikirwa Sauri. ⁵⁹ Hano bhahamutema na amagina Stefano, akabha aramubhirikira Taatabhugya no okubhuga, "Taata Yeesu, ngwatira ekoro yaane,". ⁶⁰ Akahigama no okubhirikira kwiraka ikuru, "Taata, otaaza kubhabharira obhusarya bhuno. "Hayo yahayiri gano, akatinia akakwa.