¹ Hano Petro na Yohana bhahakeerania nabhatu bharya abhasengeri nabharibhi bhe erisengerero na abhasadukayo bhabhagyaku. ² Bhari bhatindiri bhukong'u kukubha Petro na Yohana bharegya abhatu ighuru wa Yeesu kubha yakuuri na kuryooka kureka mubhaku. ³ Bhakabhagwata nakubhatura mukibhoho tee tabhori yaho kukubha ehabha ebheri emngorobha. ⁴ Nawe abhatu abharu bhano bhegwiri amegya ghayo bhakikirirya, eritemo rya bhasubhe bhano bhakikiriria bhahisegherwa kubha bhikwi bhitano. ⁵ Hano yahikiri etabhori yaruyo abhakuru abhasengeri bhakasikaana kurango Yersaremu. ⁶ Musango muyo ahabha arimu omusengeri omukuru Anasi nowundi Kyafa nowundi Yohana owundi Isikanda nabhosi bhayo bhahabha bhariho niio orughanda rwa omusengeri omukuru. ⁷ Hano bhahabha bhemireribhwe Petro na Yohana ghatighati wabhu bhakabhabhurya amang'ana ghano mukukora ighuru wobhunagya bhwakwina rina ryawi? ⁸ Hayo Petro yari yizurwe nekoro yehoreru, akabhabhurira, emwe abhakangati bha bhatu, hamwe na abhakaruka, ⁹ aribha arero muratubhurya ighuru wa mahokya mazomu ghano tukoreri omurweri wuno erabhabhwi kumutu wuno yaherwe obhuhoru? ¹⁰ Ambe bhono mumenye bhosi abhatu bha Israeri wuno yimereri embere wenyu rero nimuhoru kuhitira erina rya Yeesu Kristo Omunazareti. Niwe mukamwitira kumusarabha nawe akaryoorwa ne Eruyoobha kureka mubhaku nigo ghari kubha omutwoyo niwe yimereri embere wenyu eno nimuhoru. ¹¹ Yeesu Kristo niwe erighina erikuru rino ryazerirwe nabhmboki nawe niryo erighina erikuru ryokutura mubhurusa. ¹² Bhutareho bhuturya khurekha khumutu wowosi kukubha ritareho rina rindi mukyaro rino ryaherwe mutu rino rikutura kuhorya mutu. ¹³ Hano bharuzi Petro na Yohana bhahahu bhakamenya kubha bhari bhatu bhanao bhatan a mang'eni, bhakarughura, bhakikirirya kubha Petro na Yohana bhari hamwe na Yeesu. ¹⁴ Kukubha bhari bharuzi omutu wuno ahoribhwe yimereri hamwe nabho, bhatabheri nang'ana yindi yokuhaya khwiyo. ¹⁵ Nae hano bhahabha bhamariri kubhubhurira abhabhagati kureka kusango yo erirwaziro bhakakorenia abhene kwa abhene. ¹⁶ Bhakabhuga tubhakorebhwi abhatu bhano nihene kubha abhatu bhakoriri ekiko kyo kurugurya kino kimenyekeni kubhatu bhano bhakwikara Yerusaremu; rino tutakutuura kuryanga. ¹⁷ Tubhirikire abhatu bhano tu bharekye bhataza kukerenerya mutu wuyo wosi ighuru we rina riyo, kororokya eng'ana yino etaza kunyaragana kubhatu. ¹⁸ Bhakabhabhirikira Petro na Yohana bhakabhabhurira kubha kwekii bhataza kwegya ingabha kugya mbakuu erina rya Yeesu. ¹⁹ Petro na Yohana bhakabhakyora na kubhabhurira kubha eribha ni kisi mumeso gha Eryoobha kubhasuka emwe kukhira Eryoobha, muteme ekina kiyo emwe abhene. ²⁰ Etwe tutakutuura kutiga kukerernia amang'ana gano twigwiri nokugharora" ²¹ Hano bhamariri kubharekya kwibhaga itammbi Petro na Yohana, bhakaatiga bhagye. Kukubha bhatabhweni bhusarya bhwoobhwosi bhuno burakoora bhamwokye, kukubha abhatu bhosi bharakumia Eryoobha kughano gakorekiri. ²² Omutu wuno ahabha ahoribhwe kuhitira enzira ya amaryoryo ahabha ahikiirye emiaka mirongo ene. ²³ Hano bhahatirwe Petro na Yohana bhaakagyua kuubhatu bhabhu nookubhabhurira ghano gosi abhasengeri abhakuru hamwe na bhakaruka bhahabha bhakabhabhurira. ²⁴ Bhakigwa egho, bhakasabha Eryoobha kwiraka ikuru kwa kuubhugha, "Taatabhugya nawe watemiri erisaro nekyaro ne nyanza bhino bhyosi bhirimu, ²⁵ awe wuno kuhitira ekoro ehoreru, kuhitira omwana ghwa Taata wetu Daudi, omuhokya wazo akabhugha, kwaki abhatu bha mukyaro bharakora obhutindi eno bhatu bhayo bharisegha mang'ana ghano ghatakuung'arira? ²⁶ Abhatemi bha mukyaro hamwe nabhaakangati, vikuumenie hamwe ighuru wa Taata bhugya neno ighuru wa Isaabhugya. ²⁷ Ni hene Herodi na Pontio Pirato hamwe na abhatu bha mukyaro na bhatu bha Israeri, bhakikumania mumugye muno ighuru wa omuhokya wazo omware Yeesu wuno wakariri amaghuta. ²⁸ Bhakikumania hamwe kukora ghano goosi okubhoha kwazo no bhusegi bhwazo kyegho bhwerekyene kwema hano ghari ghakyari kurorekana. ²⁹ Bhono Taata obhakhangate abhahokya bhazo bhataza kwobhohu kukeerinerya eng'ana yazo kukubha bharakaangwa. ³⁰ Hano araghororkye kubhoko kwazo, obherekenia bhwo kurughurya bhirorekane kuhitira omuhokya wazo omwate Yeesu. ³¹ Hano bhamariri okusabha ahagiro hano bhahabha bhikumanirye hakhabhona ekisingiso kye esi bhosigho bakizuribhwa ekhoro ohoreru bhakakerania eng'ana ya Eryoobha kwa nguru bhukoong'u. ³² Abhatu abharu bhano bhakikirirya eng'ana bhahabha na koro yimwe no mutuma ghumwe kino kyosi bhahakore kihabha kya hamwe atareho wuno haakora kigiro abhughe nekyaye. ³³ Mitume bhakararika kwa nghuru eno bharerekya obhwerekenia ighuru wa obhufufuo bhwa Yeesu, eno bhakabha noorubhango rukhuru ighuru wabhu. ³⁴ Atabheriho mutu wuyo wosi wuno yasuhirwe kyokyosi kukubha abhatu bhosi bhano bhahabha nezinyumba nebhiwanja, bhakabhighurya nokhuhira ezihera ze bhighira bhino bhaha bhahabha bhaghurirye, ³⁵ na kubhitura iyasi mumaghuru gha bhabhagati ekakooreka esondo bhuhya eno waumini bhakasanda kiring'eni kuring'ana nenyako yaye yino ahabha nayo. ³⁶ Yusufu, Omurawi, mutu wakureka Kipro akahanwa erina Barnabasi kurekha ku abhabhagati (obhughaziro bhwo erina riyo niokubhugya omwana wa faraja). ³⁷ Ahabha no mughundu akagurya ezihera akareta nookuzitura mumaghuru iyasigha bhabhagati.