¹ Bhoonego Petro na Yohana bhabhanga bharang'aha mwisengero kwibhaga rya obhusabhi, kwibhaga rya esa ya kenda. ² Omutu omurebhe, omurema kwema okwibhurwa, yabhanga aragegwa kiro orusiku na yabhaga arahindiribhwa mukiseku kye erisengero kino kikubhirikirwa kizomu, abhone obhunagya bwo kuubhatu bhano bhabhnga bhakugya mwisengero. ³ Hano yabharuzi Petro na Yohana bharisuka okusikira mwisengero, akasabha ekimweso. ⁴ Petro, akamumogerera ameso, hamwe na Yohana, akabhuga, "Turore etwe." ⁵ Omurema akabharorerera, araganyirira okubhona ekigiro ekirebhe kureka unebho. ⁶ Nawe Petro akabhuga, "Ezimbirya ne edhahabu enye ntanabio, nawe kirya ninakyo nirakirusha kunewe, kwe erina rya Yeesu Kristo wa Nazareti, genda". ⁷ Petro akamugega kwookubhoko kwaye koobhuryo, nookumugororokya iguru: rugendo rumwe amaguru gaaye ne ezikoro zya amaguha bikanyora amanaga. ⁸ Akibhururuka iguru, omutu omurema akimerera no okutanga okugenda, akasikira mwisengerero hamwe na Petro na Yohana, aragenda, aribhururuka no okurikumia Eryoobha. ⁹ Abhatu bhoosi bhakamurora aragyenda na ararikumia Eryoobha. ¹⁰ Bhakamenya kubhha yaabhanag ni wuurya omutu wuyo yabhanga akwikara arasabha ekimweso kukiseku ekizomu gwe erisengero; Bhakizuribhura ne okutangara ne ekiruguro ku kirya kino kirorekeni kun ewwe. ¹¹ Kyeego yabhanga abhagwatiriri Petro na Yohana, abhate bhoosi kwa hamwe bhakaryarira murukungu runo rukubhirikirwa rwa Suremani, bharuguriri bhukong'u. ¹² Petro hano yirizuri rino, emwe abhakyoora abhatu, "Emwe abhatu bha Israeri, kwaki murarugura? ni kwaki murerekerya ameso geenyu kunetwe, kya muuna tumukoriri wuyo agende kwa amanaga geetu abheene hamwe. ¹³ Eryoobha rya Ibrahimu, na rya Isaka na rya Yakobo, Eryobha rya bhatata bhetu, arikumirye omuhokya waye Yeesu. Wuno niwe wuno emwe mukamuhaana no okumugwata kubhukangatio bwo obhusho bwaa omusinzi weekina, yangabha ewe yabhanga amariri kumuhatira abhe mwasi. ¹⁴ Mwamugwatiri omweru no omwene heene, na kumweya gwaye mukenda omwiti ahatirwe mwasi. ¹⁵ Emwe mukamwwita omutemi wo obhuhoru, wuno eryoobha rikamuryokya kureka kuubhaku - Etwe ni abhatania bha riino. ¹⁶ Boono kwe eheene kurina ryaaye, omuto wuno yari mukumurora no okumenya, akakorwa okubha na amanaga, eheene yino ekuhitira ku Yeesu emuheri ewe obhuhoru bhuno bhwa haneeheene, kubhukangati bhwenyu emwe mwoosi. ¹⁷ Bhoono omuhiri nimenyiri okubha mwakoriri kwo obhugege, niigo kweki bhakoriri abhatake bhenyu. ¹⁸ Nawe amang'ana gano Eryoobha rikabhabhurira bhwaangu kweemina gyaa abharoti bhosigo, kubha wuno Kristo araza kunyaka, bhono amariri kugamara. ¹⁹ Kweego, mwikirirye mumare mwikore amabhihu geenyu ganagye kurusibhwaho chwenyi enagye kwibhaga ryo okuzomererwa kukurwera no okubhaho kwa Isabhugya. ²⁰ No okubha anagye okumutemania Kristo wun o amariri kusorwa kwo okubha yaneemwe, Yeesu. ²¹ Emwe niiwe wuno tee erisaro rimuturuang'ane tee kwibhaga ryoo kuhikibhwa kweebhigiro byoosi, bhino Eryoobha ryakereneryo kwibhaga rya ekare kwe eminua gya abharoti abheru. ²² Amaheene Musa akabhuga; Isabhugya Eryoobha arimererya omuroti kya ninye kurwera mubhahiri bhenyu muramwitegerera kira ekigero kino arabhabhurira emwe. ²³ Eraza kurorekana kubha kiro omutu wuno atakwitegerera kumuroti wuyo arasikibhwa heeneheene arwe mubhatu." ²⁴ Niho na abharoti bhosi kurwera Samweli, na bharya bhakurwa inyuma kunewe, bhakakerania no okurarika ezisiku ziino. ²⁵ Emwe nia abhana bha abharoti na bhobhuragano obhurage bhuno Eryoobha ryabhukoriri hamwe bhazazi, kyabhurya yakerenie ku Abrahamu; kumbibho yaazo ezinganda zyoosi kukyaro zirabhaneenokwe; ²⁶ Hano Eryoobha ryamariri okumwemererya omuhokya waaye, akamutumania kunemwe hinga abhahane enokwe emwe kwookwikyora okurwa kubhubhihu bhweenyu.