¹ Hano rwahikiri orusiku rwa Pentekoste, bhosi bhahabha hamwe hagiro hamwe. ² Kwoo kutukiriraniia guakaza omurundumo kurwa kwisaro kyo obhukama obhuhari, bhakizurya inyumba yoosi muno bhahaabha bhikeeri. ³ Hayo zikarorekana, ezindimi kye ezindimi zyoomuriro zino zitwanikeni, zihabha iguru yabhu kwa kira owumwe wabhu. ⁴ Ebho bhoosigo bhakizuriwa Ekoro muhoreru na bhakanza okugamba kuukigambo ekiindi kyeego ekoro yabhabhuriri okuhaya. ⁵ Bhoono bhahabhaho Abhayahudi bhano bhahikara Yersaremu, okutiga Taatabhugya, kurwa kyaro iguru kwisaro. ⁶ Omurundumo giyo hano abhatu bhakagiigwa bhakikimania hamwe okugamba emigambo gyabhu abheene. ⁷ Bhakatitimara no okutambara abhene bhakabhuga hene bhono bhoosi bhano bhakakugamba bhatari Wagariraya? ⁸ Ebheribhwi okwiigwa ekigambo kukira omutu uno yiibwirye. ⁹ Abhaparthia na abhamwendi na abhawaeramu na bhano bhakwikara Mesopotania, Abhayahudi na Kapadokia na Ponto na Asia. ¹⁰ Frigia, na Pamafilia, Misri, no orubhara rwa Ribia haguhi na Kirenena abhagini bhano bhakurwa Rumi, ¹¹ Abhayahudi na abhikirirya, Abhakrete na Abharabu, turabhitegerera hano bhakugamba ekigambo kyeeti iguru wa emirimo wa obhunagya bhwa Taatabhugya. ¹² Bhoosi bhahabha bhatangariri na okutitimara bhakagamba abhene kubheene, hino ena teemwakia? ¹³ Nawe abhaandi bhakazeera bhabhuga, "Bhano bhizwiribhwe na amarwa amahya". ¹⁴ Nawe Petro akimerera ahamwe na bharya ikumi na hamwe akinura ekiraka, akabhabhurira, "Abhaatu bha Yudea na bhoosi bhano mwokara hano Yerusaremu, ino imenyekeene kuubha mwitegerere bhuzoomu amang'ana gaane. ¹⁵ Abhatu bhano bhatakumenya akyeego mkwiiseega kwo kuubha bhoonego ni saa tatu tabhoori. ¹⁶ Nawe gano gaahabha gagambirwe kuhikira kwu abharoti Yoeli. ¹⁷ Elzakubha orusiku ryo obhutero Taatabhugya akabhuga, Ndaza kwitira ekoro yaane kubhatu bhaane. Abhaana bheenyu na abhaana na abhaakya bheenyu bhararusya abharooti, abhamura bheenyu bhararusya obhurooti, na abhakaruka bheetu bhararusya ebhirooto. ¹⁸ Kubhabhagati bhaaye na abhabhagati bhaye abhekikari kuu zisiku ziyo nditira ekoro yane bhoosi bhararoota. ¹⁹ Ndaaza kurekya amaryoryo iguru kwisaaro no obhutemya haaasi mukyaaro, omururo, na ingesi. ²⁰ Omboso gurigarazura okubha ekiirima no omweri okubha amanyinga, hano rukabha rukyaari kuuza orusiku orukuru rwa okwitimata rwa Taata. ²¹ Nee eraza okubha wuuno akuribhirikira eriina rya Taata aratuuribhwa. ²² Abhatu bha Israeri, mwigwe amang'ana gano: Yeesu wa Nazareti, omutu wuno terekeribhwe na Taata kuunemwe kwamahamakokyo goo obhunagya an amiitimato, no obhuturoo bhuno Taata yaari kuhitira ewe gatigati wenyu kyeego etwe abheene tumenyiri. ²³ Kuu miseego gookuhokibhwa kwemera ekare na amang'eni ga Taatabhugya ekarusibhwa na neemwe kuu mabhoko gaa abhatu abharosu, mukamnyakya nyakya no okumwita. ²⁴ Huno Taatabhugya akamwinukya akamurusya obhusungu bhwo oruku kuneewe kwookubha etaturikeni kunewe okubha nabhwe. ²⁵ Daudi akabhuga kunewe akamurora Taata embere yo obhusyo bhaye eewe aari kukubhoko kyaaye kwoo obhuryo bhoono ntakwisukibhwa. ²⁶ Bhoono ekoro yane yaari nobhusomererwa no orurimi rwane rukazomererwa. Noo ombhiri gwaane gukikara no obhunagha ²⁷ Otakugutiga omutima gwane gugye mumbirira kweki otakwikirirya mhoreru okurora obhubhoru. ²⁸ Awe wikirirye kunenye enzira yoo obhuhoru nizure obhuzomererwa embere ya mubhusyo bhazo. ²⁹ Omuhiri ndanagya okugamba kunewe kwo ubhunagya kutaata wetu Daudi, ewe akawa na akabhikwa nee embehira yaaye eri hamwe na netwe rero. ³⁰ Kukubha ni mroti akamenya Taatabhugya akirohira no okwihimirirya kwaye kubha aratura aowumwe kurwibhuro rwaye rwe ekitumbi kyo obhuhoru. ³¹ Akarirora rino kare na akabhga okusisimuka kwa Kristo, tena atahabha atigirwe mumbihira no ombiri gwaaye gutabhoriri. ³² Huno Yeesu - Taatabhugya akamuryora bhaano yeeti twosi ni abhatwaniakania. ³³ Hano akumara kutiribhwa no okubhako kwo obhusubhe Taatabhugya ahabha bhweni obhurage bhwa mhoreru kurwa kuu taata wuno yiitiri obhurage bhaano emwe mukarora na okwigwa. ³⁴ Daudi okugya kwisaro nawe akabhugha Taata akamubhurira Taatabhugya wane. ³⁵ Ikara orubharika rwane rwo obhuryo tee ha no ndabhakorere omubhi wazo ekitumbi iyasi wa amaguru gaazo. ³⁶ Enyumba yoosi ya Israeri emenye amahene Taatabhugya akoriri Taata na Kristo wuno Yeesu mkamunyaakya. ³⁷ Hnao bhakigwa gayo bhaakokibhwa ezikoro zabhu bhakabha bhurira Petro na abhabhgati abhaandi, "Mhiri tukorebhwi". ³⁸ Niho Petro akabhabhurira, mwihimirirye musabhe kira owumwe weetu kuu rina rya Yeesu Kristo kwa amabhira gee ebhibhi, mrabhona omubhano nee ekoro mhoreru. ³⁹ Kwo obhurage bhwenyu na abhana bhenyu na abhatu bhenyu bhano bhari kure bhano bhakubhirikirwa Taatabhugya amwizire. ⁴⁰ Ku amang'ana amaru akahaya obhuhene, akamukimirirya, akabhuga, mwituumye murwe kurwibhuro runo ekibhihu. ⁴¹ Niho bhakagikirirya amang'ana gaye bhakasubha hayo bhakiyongerya kurusiku ruyo tee koro bhikwi bhitatu. ⁴² Bhakikwa mumegyo gha abhabhagati no obhumwe kukubhegya omukate na mumasabhi. ⁴³ Obhobha bhukaza iguru ya ekoro na amaryoryo maru na obhuteemya zikakoreka kuhitira abhabhagati. ⁴⁴ Bhoosi bhaano bhakikirirya bhahabha hamwe no okubha ne ebhitu bhabhu kwa hamwe. ⁴⁵ Bhakagurya ebhigiro na amarina gabhu no okusondona bhoosigo kukutubhana na abhendi bha muutu. ⁴⁶ Ego orusiku ku orusiku bhakenderera bhahabha na amiseego gamwe mwisengerero, bhakabhega omukate mumugye na bhakarya ebhakurya kwo obhuzomererwa no obhihombi bhwe ekoro. ⁴⁷ Bhakamukumya Taatabhugya na bhakabhazomerya abhatu bhoosi. Taatabhugya akongerya abhatu kuzisiku zyoosi bhano bhahatuuribhwa.