¹ Ego, Agripa akamubhurira Pauro, wikiriribhwe okwizozoma niho Pauro akinura okubhoko kwaye akiizozoma ego. ² Ndiirora mwane bhuzomwererwa, omutemi Agripa kwo okukoora amasemo gaane wazorero kuumasemo gha abhayahudi. ³ Kweego, kwo okubha awe nio omuroti we emiigiro gya abhayahudi no okubhurya, kwego ndakusabha oniitegerere kwo okwiikarira ekibhandira. ⁴ Heene, Abhayahudi bhoosi bhmenyiri ekikarire kyaane kwema obhumura bhane mukyaaro kyaane kya Yerusaremu. ⁵ Bhanimenyiri kwemera obwe kubhwa nikikara kyo omutarisayo, enisengerero erihaari ryo obhusengerero bhweetu. ⁶ Bhono nimereri hano nisinzirwe, kwookubha enye nkaroora amang'ana gano Eryoobha ryakoriri na abhasukuru. ⁷ Gaano niamang'ana gano ezitubho zyetu ikumi nii ibhiri zikuuza kuubhona kurwa ku Eryoobha haano bhararisengere obhutiku no omwisi kwo amiseego gayo omutemi Agripa, Abhayahudi bharaseema. ⁸ Kweki kunemwe muriisega kubha Eryoobha ritakunagya kuryoora abhaku? ⁹ Eribhaga owumwe miritengerera omwene kubha niari ndakora amang'ana maaru kurina rya Yeesu Kristo wa Nazareti. ¹⁰ Nkakoora ghayo Yerusaremu nkabhaabhooha bhaaru mukibhohe, niahabha no obhuhaangya kuurwa kubhakuru bha abhasengeri okukoreego; ne eribhaga ndabhiita nkateema ezikura iguuru wabhu. ¹¹ Eribhaga ryaru nihabhakorego mumasengerero ghoosi nkaasakya kubhakoora bhange obhwikirirya bhwaabhu, nihabha no obhutindi kunebho, nkabhahebha mumiigye gya mubhugini. ¹² Hano nihakora ghayo nkaagya Dameski nihabha no obhukuru no obhuherekererya kuurwa kubhasengeri abhakuru. ¹³ Hano nihabha kunzira eribhaga rya mumwisi omutemo nkaroora obhweru kubha mwisaro bhuhabha bhuhari kukira Eryoobha, bhukeera kutuirugutirirya enye nabhatu bhano bhahagenda hamwe ne nenye. ¹⁴ Tuosiigo tukaagwa hasi, nikiigwa eriraka riragamba ne nenye kukigambo kye kiebrania; Sauri, Sauri! kwaki oraninyaakya? ni bhukong'u kuneebho okugutema no okuguru omuchokoo. ¹⁵ Niho nkabhuga, awe ni wewi, Taata? Taata akanikyoora, Enye ni Yeesu wuno okunyakya. ¹⁶ Bhoono wimuke wimwrere kwo amaguru gazo kwao okubha enye niyerekenie kunawe, nkuturiri obhe mubhagati iguru wa amang'ana ghaane ghano omenyiri bhono na ghano ndaakwerekye eribhaga rino rikuuza. ¹⁷ Ndakusakirya kuurwa ku bhatu bhe bhiaro eno nkunkutuma. ¹⁸ Okuramukya ameso ghabhu no okubharusha mukiirima okugya kubhueru no okuurwa muziinguru zye ebhibhwi, bhikyorere Eryoobha; Bhaabhone ku Eryoobha obhwabhirwa bhwo obhubhihu no okugabha ob huzomu kuurwa kunenye. ¹⁹ Kweego omutemi Agripa, ntaangirye kutiga amerekenio gha mwisaro. ²⁰ Nawe kubhano bhari Dameski, Yerusaremu ne ekyaaro kyoosi kya Yudea no kubhatu bhe bhiaro ebhindi, nkabhabhurira bhatiige bhikyorere Eryoobha bhakoore amang'ana gano gakunagila okusindurwa. ²¹ Kwo okubha ego abhayahudi bhakaniigwata muisengerero, bhakasakya kuniita. ²² Eryoobha rinsakirye ne bhono, kweego ndimerera kubhabhurira abhatu abhasuhu ne abhakuru iguru ya gano abharoti ne Musa bhabhugiri gharaaza kubhoneka bhutari bhundi. ²³ Kubha Kristo araza kuteseka arabha wo obhumero okurioka okuerwa mubhaku no okurekya obhuheru ku bhayahudi ne abhatu bhe bhiaro. ²⁴ Puro hano yamariri okuizozoma, Festo akagamba kwe eriraka ikuru, Pauro awe ni muyanga ori! obhwegi bhwazo bhukukoriri obheri muyanga. ²⁵ Nawe Pauro akabhuga, enye ntari muyanga omuare Festo, nawe kwo obhuhari ndahaya amang'ana go obhuhene. ²⁶ Kwo okubha omutemi omenyiri amang'ana ghano, kweega ngakerania kwo obhuheene kunewe, kwo okubha nimenyiri rutariho rino ribhisirwe kunewe, kwo okubha riino ritakoriwe embarika. ²⁷ Hene orabhikirirya abharoti, omutemi Agripa? Nimenyiri kuubha orabhikirirya. ²⁸ Agripa akamubhurira Pauro, kwibhaga isuhu okoriri enye mbeeri mukristo? ²⁹ Pauro akabhuga, ndisasama Eryoobha kubha kwiibhaga iguhi ne eritaambi, otari awe bhoosi bhano bhakunitegerera rare bhabhe kya neenye bhabhe bhataana eminyororo gya mwisinziro. ³⁰ Niho omutemi akimerera no omwanangwa ne Bernikia woosi na bhano bhahabha bhiikeri nabho haamwe. ³¹ Hano bharuiri murwaziro bhakagamba abheene kwe abhene no okubhuga, omutu ono aranderwa akwe atakwenderwa kubhuhwa. ³² Agripa akamubhurira Festo omutuono yaari otura kutuura ambarika hano yiigatamiri okuisinzonza ku kaisari.