¹ Hano erihi ryahwiri, Pauro akabhabhurira abheegya no okubhasigirirya. Kyymwe arabharaga na akarwaho kugya Makedonia. ² Neewe hano yamariri kuhita ezimbara zirya akabhasiiga abhikirirya kwa amang'ana amazomu, akasikira Uyunani. ³ Hano yamariri kwikareeyo myeri etatu mukoonyo gukakorwa iguru waye na Abhayahudi hano ahaabha arihaguhi kutanga orogendo rwa okugya Shamu kuhitira enzira ya munyanza, kweego akakubhya akahita enzira ya Makedonia. ⁴ Abhatu bhano bhakagya nawe, Sopatiro, omwana wa Piriho okurwa Berea; Aristariko na Sekundo, bhosi kureka kubhikirirya bha Abhathesaronike; Gayo wa Derbe; Timotheo; Tikiko na Trofimo okurwa Asia. ⁵ Nawe abhatu bhano bhamariri kukangata nawe bharibharatuganya erya Troa. ⁶ Kwe enzira ya munyanza kureka Firipi hano ezisiku zya emikate gino gitaturirwemu obhutunduru zyahitiri, kurusiku rwa katano tukabhahikaku eyo Troa. Tukikara eyo siku muhungati. ⁷ Kurusiku rwobhutangiro rwe ewiki, hano twaari twikumanirye hamwe tubhega omukate, Pauro akakerenia na abhikirirya. Ahiseega okutanga orugendo tabhori waho, kweego akarekania tee mubhutiku gati. ⁸ Bhihaabhamu bhimuri bhyaaru muukinyumba kyiiguru muno tuhaabha twikamanie hamwe. ⁹ Muumura wumwe, erinaryaye Eutiko, ahabha yikeri mwidirisha, akahizwa neezintiro. Kwibhaga rino Pauro ahabha akyaroobhesha kwibhaga itambi, omumura wuyo, ahabha akyasundigiri, akagya hasi okurwa iguru kunyumba yeegorofa yakatatu na akatoorwa amariri kukwa. ¹⁰ Nawe Pauro akituma hasi, akiigorora omwena iguru waye, akamukundikirya. Kyamwe akabhugha, "Mtige kwita orwondo, kwaokubha wuno ni muhoru". ¹¹ Kumara akatiira kweki mugorofa akagubhega omukate, akarya. Hano ysmsriri kukerenia nabho kwibhaga itambi tee mumakya, akarwaho. ¹² Bhakamureta omumura wurya abheri muhoro bhakamuzomererwa. ¹³ Etwe abhene tukakangata embere tukagya mumeri, tukirirania okugya Aso, tukiisega okumugega Pauro eyo, kwookubha nigo ahaabha atumenie, ewe omwene ahabha yisegiri kugya kwa aguru. ¹⁴ Hano yahikiri kwitwe eyo Aso, tukamutiirya mumeribtukagya Itirene. ¹⁵ Kyaamwe etwe turatanga orugendo okurwa eyo no orusiku rwa kabhiri tukahika urubhaara rwa kabhiri rwa ekisiwa kya kio. Etabhori waho, tukahika ekisiwa kya Samo, ne etabhori waho tukahika mumugye gwa Mireto. ¹⁶ Kwookubha Pauro yaari yisegiri okutanga orugendo kuhitira Efeso, kwookubha ataaza kumara ibhaga ryoryosi, Asia; kwookubha yaari neemamano yo okwanguha Yerusaremu kwiguru ya orusiku orukuru rwa Pentekoste, aribha yari eraturikana ewe kukora ego. ¹⁷ Okurwa Mireto akatuma abhaatu tee Efeso na akabhabhirikira abhakaruka bha mwisengerero. ¹⁸ Hano bhahikiri kwiiwe, akabhabhurira, emwe abheene mumenyiri kwemera orusiku rwookutenga hano nataziri hano Asia, kyeego haari kuneemwe ibhaga ryaasi. ¹⁹ Nimuhokererye Taatabhugya emirimo gyaye kwa bhusuuki bhoosi na kwenzingusuri, ne eziinyako zino ziimbweni kwe omukoonyo gwa Abhayahudi. ²⁰ Mumenyiri kyego nikiiriha okurarika kunemwe kugiro kyokyosi kino kyaari kizomu, na kyeego enye nikabheegya mwasi mwasi eno ndaagya nyumba kwe enyumba. ²¹ Mumenyiri kyeego nikabha ndabhariihya Abhayahudi na Abhayunani iguru wookutiga ebhibhi ku Taatabhugya no obhwikirirya ku Yeesu. ²² Na bhono, murore, enye ndabha ndamusuuka ekoro ehoreeru okweekera Yerusaremu, ntige kumenya mang'ana gano gakuza kwinye eyo, ²³ nawe kwokubha Ekoro ehoreru eranierekenia enye kumigye gyoosi naho eramburira kubha eminyoro ne enyaako nibhyo bhikunganya. ²⁴ Nawe enye ntiseegiri kubha obhwikari bhwane kukyaaro ni kwa nzira yoyosi yoobhwera kwinye, niho ninagye okumara orugendo rwane na emirimo gino nikahanwa kurwa ku Taata Yeesu, kwerekania ekiina kya amabhira ga Taatabhugya. ²⁵ Na bhoono, rora, nimenyiri kubha bhoosi, muubhano nagiri kurwazira ubhutemi, mutakundora mubhusyo kweki. ²⁶ Kweego ndabherekenia rero yino, kubha ntana bhubhi kwa amanyinga ga omutu wowosi. ²⁷ Kwookubha ntiri bhuri kubhararikira amega goosi ga Taatabhugya. ²⁸ Kweego mubhe bhookwiriiha iguru wenye abheene, na iguru we erigandabhare ryoryosi rino ekoro ehoreru ebhateeriho emwe mubhe abhangariri. Mubhe bhariibhi okuririsya esango ya Taatabhugya, rino yaguriri kwa amanyinga gaaye omwene. ²⁹ Nimenyiri kubha hano ndarweho enye ezisuuzi ezihaari zirasikira kwimwe, nookutama okuryaabhira erihizo. ³⁰ Nimenyiri kubha gatigati wenyu abhene abhaatu abheene bharaza no okuhaya amang'ana goolubhurya, niho bhabhrute abheega bharabhatuniriore ebho. ³¹ Kweego mubhe meso, Muhiite kubha kumiaka etatu nitatigiri kubheegya kiraoumwe wenyu kwe ezingusuri obhutiku no omwisi. ³² Na bhoono enye ndabhatuura ku Taata bhugya, na kweng'ana ya amabhira gaaye, yino ikunagya kubhomboka no okubhaha engabho hamwe na bhoosi bhabhindikirwe ku Taata bhugya. ³³ Nitagongerye hera, zahabhu, hamwe miibhoho. ³⁴ Mumenyiri abhene kubha amabhoko gano gamboneri gano gosi narinikwenda agane omwene na gabhano bhaari hamwe nanenye. ³⁵ Kumang'ana goosi nabhaheeri ekituubhyo kyeego ekwenderwa okubhasakirya bhano bhatakutura kwa okukora emirimo, na kyeego mukwenderwa okurireta amang'ana ga Taata Yeesu, amang'ana gano ewe omwene akabhuga; "Ni bhuzomu okuruusya kutiiga okugega". ³⁶ Hano yamariri okugambeego, akahigana akasabha hamwe nabho. ³⁷ Bhoosi bhakarira bhukong'u no okumugweera Pauro mubhigoti no okumumesa. ³⁸ Bhakarumika kukira goosi kwookubha ya kino yaari ahayiri, kubha rusiku na rumwe bhatakuza kurora bhusyo bhwaye kweki. Kyamwe bharamuheregesya tee mumeeri.