¹ Hano bhahitiri mumugye gya Amafipori nogundi Aporonia bhakahika tee mumugye gwa Thesasalonike hayo enyumba yri eriho yerongo ku Bhayahudi. ² Kyeego ghari enyangi yaye Pauro akagya owabhu, kwibhagha, rya isiku isatu zyo bhuturo bhwo kumunya akakeerenia munyumba yesango akabhabhurira abhatu amang'ana ighuru wo mukhama omuhereru. ³ Yaari araturwa akuubhweru kubherekya kubha, Kristo akenderwa yitwe kuhitira enzira ya kuunya kwiibhaga hano akumara aryookee kureka mubhaku. akabhabhura kubha Yeesu wuno nkubhabhurira amang'ana ghaye niwe Kristo. ⁴ Abhayahudi abhandi bhakukirirya amang'ana gha Pauro na Sira hamwe na bhagiriki bhano bhakwikirirya Eryoobha, abhakaari abhaaru bha mang'eni bhakagwatana hamwe. ⁵ Nawe Abhayahudi abhandi bho mugye no bhakagya kumuutera, bhakakumania abhaatu bhetemwa embi, abhatu bhayo bhakaatanga kuukora ekuriri mumugye gwoosi. Bhakaagya mumugye gwa Yasoni kuubhakomia, Pauro na Sira, bhabharete kusango yabhatu bhayo. ⁶ Hano Pauro na Sira bhabhuriri bhakaamugwata Yasoni hamwe na abhahiri bhaye nyarurebhe. Bhakabhakangatya tee ku hakuru bhomugye bhakabha bharaghamba kwiraka ikuru kubha, abhatu bhano bhakukora ekuriri mukyaro bhahikiri kuno hosi, ⁷ Abhasubhe bhano bhaginihibhwe yika wa Yasoni, bharazera emigiro ghino ghiturweho kureka kwa Kaisari, eno bharabhugya bhanwe nokwigungya kubha, bhano mutemi wabhu owundi, erina ryaye Yeesu. ⁸ Hano abhakuru hamwe nabhatu bhandi bho mugye ghuyo bhigwiri amang'ana ghayo bhakwongera okukora omukongo bhukong'u. ⁹ Hano abhakuru bhe ekyaro bhariri enzaghu Yasoni nabharikyaye bhakabhahatira bhagye owabhu. ¹⁰ Obhutiku bhuyo abhikirirya bha Pauro na Sira bhakabhaheregesha kugya amumugye gwa Beroya hano bhahikiri Beroya, bhakasikira munyumbayesango yo Bhuyahudi. ¹¹ Abhayahudi bha mumugye muyo bhari bhang'eni ne temwa enzomu kukira Thesaronike kyego bhakamwitegerera Pauro hano yari okubherekya eng'ana ye Eryoobha, bhakigomba kuitegerera bhakaabha bharisunza obhwandiko amang'ana amahoreru kuzisiku kukora kubha hene nigho ghandikirwe. ¹² Kweegho bhaaru bhakamwikirirya Yeesu bhakari bhari bharimu bhano bhakusuukwa bhykong'u mubhagiriki hamwe nabhasubhe bharu. ¹³ Nawe hano Abhayahudi bha Thesalonike bhamenyiri kubha Pauro aregya eng'ana ye Eryoobha eyo Beroya, bhakagyeyo bhakasigirirya abhatu bha kusaango kukora ekuriri. ¹⁴ Bhwangu bhwangu abhasegi bha Pauro bhakamuheregesha Pauro kuhitira enzira ya mumanzi nawe Sira hamwe na Timoseo bhakasaaga hayo. ¹⁵ Abhasegi bha Pauro bhakagya nawe tee Aseno hano bhkakyoora akureka eyo Pauro akabharagirirya kubha Sira na Timaseo bhamugyeku bhwangubhwangu kukubha ewe ahabha asagiriyo. ¹⁶ Hano Pauro yari arabhaganya Sira na Timotheo mumugye gwa Athene ekoro yaye ekanyaharika bhukong'u iguru wemisambwa gya kubha mumugye muyo. ¹⁷ Kweego akabha arakeerania munyumba ye sango nabhayahudi bhano bhari bhikirirye emungu nabhano bhosi bhahasikana nabho kumutera. ¹⁸ Nawe abhasomi kuureka Waepikueo hamwe nabha Wastoike bhakassikana nawe, abhandi bhakabhuga niki kino akuukeerenia makeerenio ghe kyana abhandi bhakaabhugha, wuno aratwegya mang'ana ghe misambwa mighini, kukubha ghe iguru wa Yeesu nakuryoka kwa abhakuru. ¹⁹ Bhakamugwata Pauro bhakamusira Areoppago bharabhuga turatura kuumenya iguru waamegya mahya ghano okuukerenerya? ²⁰ Kukubha oratubhurira mang'ana mahya mumatwi getu. Kwegho turenda kuumenya obhughazuriro bwa mang'ana ghayo?" ²¹ (Eno abhatu bhosi bha Athen hamwe nabhagini bhano bhahabha muwabhu muyo bhakaghegha ibhaitambi kwitegerera eng'ana ehya iyo) ²² kweegho Pauro akimerera ghatighati yabhatu bha Areopago eno arabhuga, emwe abhatu bha Athene ndarora kubha mbatu bhano musegiri amang'ana ghe nyangi bhukong'u. ²³ Ndarora hano niihitire mumigye gyenyu ndarora mumasengerero ghenyu hakamiirwe amang'ana ghano ghakubhugha KWE ERYOOBHA RINO RITAMENYEKENI. Kweegho wu o mukusengera mutamumenyiri ni nkuubhakerenerya emwe. ²⁴ Eryoobha rino ryatemiri kekyaro nabhyosi bhino bhirimu kukubha, niwe Taata wamwisaro ne ekyaro, atakwikara muzinyumba zino zombokirirwe na amabhoko gha abhatu. ²⁵ Kweki atakwenda kukorerwa kigiro kyokyosi kuuhitira amabhoko gha b hatu kukubha ewe niwe akuuhana abhatu obhuhoru nebhigiro bhyosi. ^{26 27} Okurwera kumutu wumwe yakoriri ebhyaro bhyosigho nabhatu bhano bhakwikara mukyaro kiyo akabhaaturira eribhagha kwemera ekaare, akabhatirira ezimimbi hano bhakwikara. Kwegho Eryoobha ryakoririgho abhatu bharyendere tee bhatike, kubhuhene bhuyo atari kure natwoosigho. ²⁸ Kuhitira ewe Eryoobha tureho turagendererya kubha bhahoru. Nikyo abhakami bha membo ghenyu bhakeemba kub ha, "Etwe nibhano bhagye. ²⁹ Kwookubha etwe bhe Eryoobha tutisegha kubha atubheni nemisambwa ghino gyakorirwe kuureka kuu ezahabha, ezimbirya, aribha ghino ghibhaziwe kuumagina. ³⁰ Ekaare hayo abhatu bhahakora ghayo kwa bhugheghe, Eryoobha rikakira. Nawe bhano arabhabhurira abhatu bhoosi bhakyore kwisasama, ³¹ Nikyo kukuukora atereho orusikurwookuutina ekina kya abhatu bhosi mukyaro bhano bhamusegiri. Eryoobha atwerekirye abhuhene kuhitira kumutu kuhitira hano yamuryoriri kureka mubhatu. ³² Hano abhatu bha Athene bigwiri amang'ana ghano Pauro akabhabhurira ighuru wo ku Eryoobha abhatu, abhandi bhakamuzera, nawe abhandi bhakabhugha tusegiri okukwitegerera kweki ighuru we ng'ana iyo. ³³ Hano bhamariri, Pauro akabhatigha. ³⁴ Nawe abhatu abhandi bhakamwikirirya, nokugwatana na Pauro, ahabha arimu wuno akubhirikirwa Dionisio Mwariopago, owundi ni mukari wuno akubhirikirwa Damari hamwe nabhatu abhandi.